Tobit 13 - Biblia Guaraní con Deuterocanónicos

Tobit omomba'e guasu Tupãme

1Tobit he'i:

Toñemomba'e guasu Tupã.

Oikove

ha oporosãmbyhýva opa ára.

2Ha'e ñane nupã

ha ñande poriahurereko,

ñane mboguejy

omanóva ohohápe,

ha ñande pe'a

ñañehundi haguãgui.

Ndaipóri avave

okañýva chugui.

3Pemomba'e guasu chupe,

Israel ñemoñare,

opa tetã renondépe.

Ha'e pene mosarambi vaekue

opa rupi,

4ha ojechauka peẽme

Mba'éichapa tuicha ha'e.

Pemomba'e guasu chupe

maymáva renondépe.

Ha'e Tupã Ñandejára

ha ñande ru.

Ha'e Tupã oikovéva opa ára.

5Ha'e pene nupã

pene rembiapo vaikuére,

ha upéinte

pende poriahurerekóne,

ha pene mbyatypáne

opa umi tetãgui

peñemosarambi hague rupi.

6Pejere ramo Tupã gotyo

pene py'aite guive,

ha peiko ramo

hekoitépe henondépe,

ha'e oma'ẽ jeýta pende rehe

hova nomokañy mo'ãi

pende hegui.

Pehechami ojapóva

pende rehe,

ha pehepy me'ẽ chupe

pende py'aite guive.

Pemomba'e guasu Ñandejárape

heko jojágui, peropurahéi

pe mburuvicha guasu

opa ára oikovévape.

Che amomba'e guasu chupe

ko tetã aikohápe

mombyrygua ramo,

ha ahechauka

ko'ã hembiapo vaívape

Tupã pokatu ha ituichakue.

Ha'e chupe kuéra:

“Peẽ pene rembiapo vaíva,

pejeheja pende reko vaígui

ha peiko teko jojápe

hesa renondépe.

Ikatu mba'e niko

pe'a porã chupe

ha pende poriahurereko.

7Che amomba'e guasu

Tupãme,

mburuvicha guasu yvagagua,

ha che py'aite guive

amomba'e guasu ipokatu.

8Opavave

tomomba'e guasu chupe

Jerusalénpe,

9ku táva marangatu.

Tupã ne nupã vaekue

ne memby kuéra

rembiapo vaikuére, upéinte

oiporiahurereko jeýta

heko jojávape.

10Emomba'e guasu hekoitépe

Ñandejárape,

ha eropurahéi

mburuvicha guasu

opa ára oikovévape,

pe tupao

oñemopu'ã jey haguã

vy'apópe.

Ha ojerévo

umi oho vaekue

ambue tetãre,

Ha'e tomyenyhẽ

vy'a ha torýgui

ha tohechauka imborayhu

mayma ohasa asývape,

opaite ára peve.

11Remimbíta

opa rupi ko yvy ári.

Tetã nguéra

mombyryveguáva oúta,

mayma yvy arigua

oúta omomba'e guasúvo

Tupã Ñandejára réra.

Oguerúta ipópe kuéra jopói

Mburuvicha yvága guápe.

Opaite ñemoñare ovy'áta

nde rupi, ha nde réra

Tupã oiporavo vaekue réra

opytáta opa árape guarã.

12Heko aña

umi oñe'ẽ vaíva nde rehe,

Heko aña

opa umi ne mbyaíva,

umi oitýva nde korapy jere,

umi oitýva

nde róga yvate kuéra,

umi ohapýva nde róga kuéra.

Toñemomba'e guasu

opa árape

umi ne myatyrõ jeýva!

13Upérõ ae revy'áta

umi imarangatúva ndive.

Opavave oñembyatýta

ha omomba'e guasu

Tupã Ñandejárape.

Tovy'a umi nde rayhúva!

Tovy'a umi horýva

reñakã rapu'ã haguére!

14Tovy'a umi oñembyasýva

umi ñenupã rehupytývare,

ovy'átagui upe rire nde pype

ohechávo vy'a

opa árape guarã!

15Omomba'e guasu che ánga

Tupã, Mburuvicha Guasuetépe,

16oñemyatyrõ jeýtagui

Jerusalén ha avei itupao,

opa árape guarã!

Avy'aite vaerã niko

opytárõ che ñemoñare

ikatúva ohecha ne mimbipa

ha oguerohory

Mburuvicha Guasu

yvága guápe!

17Jerusalén rokẽ nguéra

ojejapóta ita jegua

pytã ha hovýva reheve,

ha ita ojeguapávape avei

pe táva mongoraha.

Umi óga yvate

Jerusalén pegua

oñemopu'ãta órogui,

umi táva roka oñemopyendáta

ita porã poravo pyrépe.

18Jerusalén

rokẽ nguéra rupi

oñehendúta Tupãme purahéi

ha hóga kuéra rupi oje'éta:

Toñemomba'e guasu Tupã,

Israel Jára!

Nde pype oñemomba'e guasúta

Héra Marangatu

opa árape guarã.