Eclesiástico 51 - Biblia Guaraní con Deuterocanónicos

Aguije purahéi

1Ame'ẽse ndéve aguije,

che Jára, che ruvicha guasu,

ha roguerohoryse,

Tupã che Jára,

ivaívagui che pe'áva,

aguije nde rérape, che Jára.

2Nde ha'égui vaekue

che mo'ãha

ha che pytyvõha,

che pe'a haguére ñemanógui,

rejoko che rete

tyvy rembe'ýpe,

renohẽ che py

Yvatetegua pyapẽ guýgui.

Umi oñe'ẽ reíva ñuhãgui,

umi ijapúva jurúgui,

umi che rayhu'ỹva renondépe,

che pytyvõ ha che renohẽ

ivaívagui.

3Nde py'a poriahurereko

itereígui

ha nde réra rehehápe

che pe'a umi che mokõséva

rãinguágui,

umi che jukaséva pokatúgui,

hetaite ivaíva

arohasa vaekuégui,

4tata che mbopytupávagui

ha tata rendy

che amyendy'ỹ vaekuégui,

5omanóva retã kuára pypuku

hugua'ỹvagui,

ijuru ky'áva ha ijapúvagui,

6ikũ rãimbevéva hu'ýgui.

Aiméma che tyvy rembe'ýpe,

ha che rekove oguejýma

omanóva retã ypy peve.

7Opa guio añemongora,

ha ndaipóri che pytyvõva,

ama'ẽ opa gotyo

ha ndaipóri ipo ombohasáva.

8Upémarõ che mandu'a

nde rehe, che Jára,

nde py'a poriahurerekóre,

che mandu'a

ne mborayhu opa'ỹvare,

nde remopu'ãha

nde rehe ojeroviávape,

ha reipe'aha

hese ija'e'ỹva pógui.

9Ha añembo'e ndéve

ko yvy guive,

ajerure asy ndéve

che pe'a haguã manógui.

10Asapukái che Járape:

Nde niko che Ru,

nde pyapy mbaretépe

che pe'áva,

anína che reja

ho'a vaívo chéve,

akyhyje jave, ndaikuaái jave

mba'épa ajapóta.

Roguerohorýta manterei,

ha romboaguijéta purahéipe.

11Nde che rendu vaekue,

che pe'a jey vaekue

añehundimahágui,

ha remboyke che hegui

opa kyhyje.

12Upévare rombyaguijéta

ha roguerohorýta:

Perohory Ñandejárape

imba'e porãgui,

imborayhu ndopáigui

araka'eve.

Perohory Tupã

ojererohorývape,

imborayhu ndopáigui

araka'eve.

Perohory

Israel rerekuápe,

imborayhu ndopáigui

araka'eve.

Perohory

opa mba'e Apoharépe,

imborayhu ndopáigui

araka'eve.

Perohory

Israel sã mondohohárape,

imborayhu ndopáigui

araka'eve.

Perohory ombyatývape

Israelgua isarambipáva,

imborayhu ndopáigui

araka'eve.

Perohory

upe omopu'ã jeývape

itáva guasu ha itupao,

imborayhu ndopáigui

araka'eve.

Perohory

upe ombopoty jeývape

David róga pokatu,

imborayhu ndopáigui

araka'eve.

Perohory

upe omoingo vaekue pa'írõ

peteĩ Sadoc ra'ývape,

imborayhu ndopáigui

araka'eve.

Perohory Abraham Mo'ãhárape

imborayhu ndopáigui

araka'eve.

Perohory Israel Mo'ãhárape

imborayhu ndopáigui

araka'eve.

Perohory

Jacob rerekua Ipokatúvape

imborayhu ndopáigui

araka'eve.

Perohory

upe oiporavo vaekuépe Sión

imborayhu ndopáigui

araka'eve.

Perohory

mburuvicha guasu kuéra

ruvicha guasúpe,

imborayhu ndopáigui

araka'eve.

Ha'e omombaretevéta

hetã guára pokatu,

oguerohory haguã chupe

opa hese ojeroviáva,

opa Israelgua,

ha'éva hembiporavo.

Aleluya!

Arandúre jeporeka

13Che mitã rusúrõ gueteri,

aiko mboyve opa rupi,

aheka vaekue arandu

che py'aite guive,

14Che mitã rusu guive

aheka vaekue, ha amano meve

akóinte ahekáta.

15Parral apesãicha

hi'aju vaekue ohóvo

ha che mbopy'a rory.

Apia'ỹre, hape rupi aguata

aikóvo ipyporére

che mitã rusu guive.

16Ajapysakamírõ guarã hese

hetaite ajuhu pype ikuaapyrã.

17Hese ae heta mba'e aikuaa,

upévare pe che mbo'eharépe,

ajapo iterei mba'érõ.

18Ha'e vaekue aiko haguã

ha'e che mbo'eháicha,

che akã raku hese

ha nambyasy mo'ãi.

19Che tarovaite vaekue hese

ha che resa

ndaipe'avéi chugui,

che pojái vaekue hese

pe yvate oĩháme,

ha ambyasy

ymavéma ndaikuaái hague.

20Hesehápe ajei vaekue

ivaíva apógui,

teko potĩ rupi ahupyty chupe,

hese ae ahupyty akã porã

iñepyrũha guive,

upévare ndaheja mo'ãi.

21Che py'a pererepa vaekue

ahekávo,

ha heseve ahupyty

mba'e ne porãitéva.

22Ñandejára

ome'ẽ chéve che juru

omyengoviávo chéve

ha pype chupe arohorýta.

23Peju che rendápe

pene arandu'ỹva,

peiko che ndive

arandu rógape,

24Araka'e peve piko

peikóta hese'ỹ,

ku chugui pende yuhéi etéva!

25Aipe'áma che juru

añe'ẽ haguã,

peraha pejogua'ỹre.

26Imba'e pohýi guýpe

pende atúa pemoinge

ha he'íva peẽme pejapo,

aguĩ etereíko oĩ

ha ndahasýi jahupyty haguã.

27Peẽ voíke pehecha

pende resa tee rupi

sa'i ete añeha'ã hague,

ha tuichaite pytu'u

ajuhu hague.

28Pehendúrõ che remimbo'e,

sa'imínterõ jepe,

óro ha pláta

peipotaháicha perekóne.

29Pevy'a Ñandejára

ipy'a poriahurerekógui,

ha ani petĩ

perohory haguã chupe.

30Pejapo pene rembiaporã

hi'árape porã,

ha Ñandejára

omyengoviáta peẽme

ha'e oipota vove.