Salmos 34 - Biblia Guaraní con Deuterocanónicos

Ñamomba'e guasu Tupãme imba'e porãgui

1David oñembotarova ramo guare Abimélec renondépe, ha upéi osẽ oho.

2Amomba'e guasúta opa ára

Ñandejárape,

chupe aropurahéita tapiaite.

3Ñandejára ombovy'a che rekove.

Imboriahúva tohendu ha tovy'a!

4Oñondive ñamomba'e guasu Ñandejárape,

héra jaropurahéi oñondivepa.

5Ñandejárape añembo'e,

ha'e che rendu,

ha oipe'apa che hegui

umi mba'e che mongyhyjéva.

6Umi Ñandejára rehe ojeroviáva

vy'águi ojajaipáne,

ha hova noñomi chéne ñemotĩgui.

7Che, tekove poriahu,

Ñandejárape añembo'e.

Ha'e, che rendu

ha che pe'a jejopy vaígui.

8Ñandejára remimbou oñangareko

ha oguenohẽ jejopy vaígui

opa umi hese ojeroviávape.

9Peha'ã ha pehecha

Ñandejára imba'e porãha.

Ovy'a rasa upe hese ojeroviáva.

10Tomomba'e Ñandejárape,

umi oñemboyke vaekue chupe guarã,

umíva noikotevẽi chéne mba'evére.

11Umi opa mba'e oguerekóva

ágãnte imboriahu ha iñembyahýine.

Umi Ñandejárape oñembo'éva

noikotevẽi chéne mba'eve.

12Peju che ra'y kuéra ha pehendu:

pombo'éta pemomba'e haguã Ñandejárape.

13Oĩpa oikove pukuséva?

Oĩpa vy'ápe oikoséva?

14Anítei nde jurúgui osẽ mba'e vai

ha anítei nde japu.

15Eheja mba'e vai ha ejapo iporãva,

eñeha'ã py'a guapýpe opa árape eiko.

16Ñandejára oñangareko

umi ijohéi pyrévare,

ha ohendu umíva ñembo'e.

17Heko vaívagui katu

ndoikuaaséi mba'eve,

umíva opa vaerã tesaráipe.

18Ñandejára ohendu

umi ijohéi pyréva ñembo'e

ha oguenohẽ chupe kuéra

upe ojejopy vaihágui.

19Ñandejára oñemboja

umi ohasa asývare

ha oguenohẽ umi ikangypávape

jejopy vaígui.

20Heta mba'e vai rupi

imarangatúva ohasa,

ha Ñandejára oguenohẽ chupe

umívagui,

21oñangareko ikãnguére,

peteĩnte jepe nopẽi chéne.

22Iñañávape ojuka iñañangue,

ha oñemyengoviáne umi ndaija'éivape

imarangatúvare.

23Ñandejára oguenohẽ jejopy vaígui

hembiguái kuérape,

ha mba'eve ivaíva ndojejapói chéne

umi hendápe oguahẽvare.