Eclesiástico 28 - Biblia Guaraní con Deuterocanónicos

Mba'e vai apoha omyasãi jeiko vai

1Avavépe

oheja rei'ỹva mba'eve,

Upévape Ñandejára

mba'eve ndoheja rei mo'ãi,

oipapáta

opa iñangaipa.

2Eheja rei nde rapichápe

ijejavykue,

reipotárõ Ñandejára

oheja rei ndéve.

3Mba'éicha piko oha'arõta

Ñandejáragui tesãi

ipy'aróva hapicha ndive?

4Ha'eichaguápe

ndoiporiahurerekói,

ha piko ojeruréta

Ñandejárape poriahurereko?

5Ha'e omano vaerãnte avei

ha ipy'aro hapicha ndive,

máva piko ojeruréta hese

ojeheja rei haguã chupe

iñangaipa?

6Ejepy'a mongeta

remano rire guarãre

ha epoi py'a rógui,

ne mandu'a

remano ha nde tujutaha,

ha ejapo Ñandejára

rembiapoukapy.

7Ne mandu'a

hembiapoukapýre,

ha ani nde py'aro.Ani rehatapyña tata

8Ejei ñe'ẽ joapígui

ha nderejapo mo'ãi ivaíva

ipochy vaíva niko

oporombohuguy raku

ñorãirõrã.

9Iñangaipáva

oporomopu'ã oñoakãre

ha oĩháme py'a guapy,

omyasãi joavy.

10Hetahápe jepe'a

ojepota tata,

ha oĩháme mbarete

hendy ñorãirõ.

11Tata pirirígui

osẽ jehapy guasu,

ha ñe'ẽ joapi pochýgui

tuguy ñeñohẽ.

12Reipejúrõ tatapỹi

ojepota,

rendyvúrõ hese katu ogue

ha mokõive

nde jurúguinte osẽ.Juru my'ỹi

13Ijuru my'ỹi ha ijapúvare

tove terejahéi,

umíva niko hetápe

omoingo vai oñondive.

14Hetápe ombyai juru my'ỹi,

ápe ha pépe omosarambi,

táva mbarete oity yvýre,

ohundi ipoguasúva rogapy.

15Juru my'ỹi,

kuña ha'evévape omosẽ,

ha hembiapokue repy

chugui kuéra oipe'a.

16Ñe'ẽ reíre ojapysakáva

ndojuhu mo'ãi pytu'u,

ndoiko mo'ãi py'a guapýpe.

17Teju ruguái rapykuere

opyta ñande pirére,

ha ñe'ẽ rei rapykuere

ñane mokãngue rasy.

18Heta oĩ omanóva

kyse puku rãimbépe,

ha hetave juru my'ỹi rupi.

19Ovy'aite vaerãpa

umi chugui ojejokóva,

ndoisu'úiva irokue,

ndo'áiva ipoguýpe,

ha ndopytáiva iñuhãme.

20Imba'e pohýi,

mba'e pohýi fiérro

ha ijokuaha,

jokuaha vrónse.

21Kyse yvyrápe oporojuka,

ha iporãve

remanoite mandi voi.

22Imarangatúvare katu

ndaipu'akái,

hata chupe kuéra ndohapýi.

23Ñandejáragui ojeíva katu

pype ho'áta,

tata ogue'ỹvape okáita.

Aguara guasúicha

hese ojepoíta,

ha jaguaretéicha

ho'úta chupe kuéra.

24Emongorapy hatãke

nde kokue,

ha eñongatu porã

nde pláta ha nde óro,

25Eiporavo upe erétava,

emboty ha ejokua nde juru.

26Ani nde juru ne mopysyrỹi

ha nde rayhu'ỹva pópe

nde reity.