1Umíva umi árape, Antíoco osẽ mante Pérsiagui.
2Oike ra'e peteĩ táva guasu hérava Persépolispe, ha oñeha'ã omonda umi mba'e tupao pegua ha omoĩ ipoguýpe upe táva. Tavagua katu opu'ã hese, ha omboguevi chupe. Antíoco osẽ mante upégui tuichaite ñemotĩme.
3Oĩvo hína Ecbatánape oñemombe'u chupe mba'épa ojehu Nicanórpe, ha Timoteo ñorãirõhára kuérape.
4Ipochy eterei ha he'i omopẽtaha umi Israel guáre pe ñemotĩ ohasa vaekue umi Persiagua renondépe, ohejávo chupe yvýre ha omosarambipávo iñorãirõhára kuéra. Upévare, he'i pe imbayru mboguatahápe ani haguã opyta oguahẽ peve pe ohohápe. Hi'aguĩma katu hína ra'e Tupã ñenupã oguahẽ haguã chupe, he'i haguére jejapo guasuetépe: “Aguahẽvo Jerusalénpe ajapóta chugui peteĩ Israelgua tyvy renda.”
5Tupã Israel Jára katu, opa mba'e ohecháva, oinupã chupe peteĩ mba'asy nde vaívape, okuera'ỹva ha ojehecha'ỹva. he'ívo pe he'i vaekue, ou chupe peteĩ tye rasy ohasa'ỹva mba'evépe.
6Upéva ojehu chupe hekópe porã, opa umi ñemboharái rasy ombohasa vaekuére opavavépe.
7Upéicha ramo jepe, Antíoco ndohejái pe ijejapo. Ipochy rendy umi Israel guáre ha he'i ojeho pya'eve haguã. Ha pe imbayru oho hatã itereígui, ho'a ha opẽmba.
8Ha upéicha, pe ramoiténte, ijejapo tuicha itereígui, oimo'ã vaekue ikatutaha oguereko ipópe yguasu ha oha'ã yvyty pohyikue, ho'a yvýpe ha ojereraha mante peteĩ tupa'ípe. Péicha opavave ohecha Tupã pokatu.
9Pe tekove aña resápe omumu yso, ha oikovépe gueteri, mba'e rasyeta pa'ũme, okukúi pe ho'o. Hete oñepyrũ ituju ha inetereígui iñorãirõhára kuéra jepe ndaikatúi ohetũ.
10Pe inengue tuicha itereígui, avave ndaikatúi ogueraha pe nda aréi eténte oimo'ã vaekue ohupytytaha umi mba'e rendy yvága pegua.
11Aipórõ, tuicha hasy, ha hasy hasyvégui jepi chupe Tupã ñenupã, oñepyrũ omboguejy pe ijejapo ha iñakã porãmive vaicha.
12Ha ndaikatúigui ha'e voi oñehetũ, he'i: “Iporã ñaime Tupã poguýpe ha ñamano vaerãgui, ani ñañembojojase hese.”
13Ha upévo, pe porojukahára oñepyrũ ojerure asy Ñandejárape. Tupã katu ndoiporiahurereko mo'ã véima ra'e chupe.
14Upe mboyvemínte oho pya'etese vaekue hína táva guasu marangatúpe oheja haguã yvýre ha ojapo chugui tyvy renda,2 Mac 9.4. ko'ágã ome'ẽ iñe'ẽ Tupãme oipe'ataha jejopýgui.
15Upe mboyvemínte he'i vaekue oikóvo Israelgua kuéra ndaikatuiha oñeñotỹnte jepe ha iporãnteha guyra ñarõ rembi'urã térã oñemombo haguã, ita'ýra kuéra reheve, tymba saitépe, ha ágã ome'ẽ iñe'ẽ umi ome'ẽ iñe'ẽ oikotaha Atenasgua oikoháicha.
16Kuehe omonda vaekue tupao marangatu,1 Mac 1.21-24; 2 Mac 5.15-16. ágã ome'ẽ iñe'ẽ ombojeguataha iporãvéva jopóipe, ha ome'ẽ jeytaha opa tembiporu marangatu ogueraha vaekue. He'i avei ha'ete imba'évagui ome'ẽtaha oñekotevẽva mymbajukarã,
17Ha ipahávo he'i, ha'e voi oikotaha Israelgua ramo ha oikotaha opa rupi omoherakuã haguã Tupã pokatu.
18Imba'e rasy kuéra ndopái rupi mba'evéicharõ, Tupã ñenupã hekopegua ho'águi hi'ári, ha ojecha py'a tarovápe, ojapo peteĩ kuatia ojerure asyhápe Israelgua kuérape, kóicha he'íva:
19“Mburuvicha guasu ha ñorãirõhára ruvicha Antíoco omomaitei Israelgua kuérape, tetãgua iporãmba jepéva, ha oipota chupe kuéra guarã tesãi ha jeiko porãmbaite.
20Aipota peẽ ha pende ra'y kuéra pejejuhu porã ha opa mba'e toiko peẽ peipotaháicha. Tupãre ajerovia.
21Avy'a che mandu'ávo che moguahẽ hague torypaitépe. Aju jey ramo guare Pérsiagui ha'a peteĩ mba'asy nde vaívape, ha upévare ahecha tekotevẽha ajepy'apy opavave oiko porã haguã.
22Ndaha'éiko che py'a tarováva aikógui péicha, aha'arõ uvei akuerataha che mba'asýgui.
23Upéicha ramo jepe che mandu'a, che ru oho jave jepi oñorãirõvo ysyry Éufratesgui kuarahy resẽvo, ohejavaha hekoviarã,
24ikatu haguã, sapy'a rei ojehu ramo guarã oñeha'arõ'ỹva, térã Oguahẽ marandu oporopy'apýva, tetãgua maymáva oiko py'a guapýpe oikuaávo oĩha tetã sãmbyhyhára.
25Aikuaa avei, umi mburuvicha ñane retã ykeregua oha'arõ ou porãva chupe kuéra ikatu haguã ojapo ojaposéva. Upévare aheja mburuvicha guasúrõ che ra'y Antíocope, hetave jevýma aheja vaekue oñangareko haguã Israel rehe, aiko ramo guare aguata pe ysyry Éufratesgui kuarahy resẽ gotyo. Péina amondo chupe kuatia arahaukáva avei peẽme.
26Aipórõ ajerure peẽme, pehecha kuaávo chéve hetaite mba'e porã ajapo vaekue pende rehe, pehechauka avei che ra'ýpe pe py'a porã pereko vaekue che ndive.
27Che aikuaa porã ha'e ojapotaha che ajapo haguéicha py'a guapýpe ha py'a porãme, ha pene rendu kuaataha.”
28Ha upéicha, ko porojukahára, ojahéi vaekue Tupãre, oho ko yvy árigui mano vaípe, mombyry hetãgui ha yvyty pa'ũme, jehasa asy ijoguaha'ỹvape, ha'e ombohasa haguéicha heta ambuépe.
29Filipo, iñirũ ete vaekue, ogueraha pe he'õngue, ha ndojeroviáigui Antíoco ra'yre, oho okañy Egíptope, mburuvicha guasu Toloméo Filométor rendápe.
Who We AreWhat We EelieveWhat We Do
2025 by iamachristian.org,Inc All rights reserved.
