Tobit 3 - Biblia Guaraní con Deuterocanónicos

Tobit ñembo'e

1Añembyasy eterei upe oikóvare ha añepyrũ che rasẽ, ha añembo'e kóicha:

2Nde nde reko joja

che Jára,

opa mba'e rejapo

teko jojápe.

Opa mba'e rejapo

mborayhu ha jeroviapópe.

Nde upe reporombojovakéva

ko yvy ári.

3Ko'ágã, che Jára,

ne mandu'amína che rehe.

Ema'ẽ che rehe.

Ani che nupã

che angaipáre,

umi mba'e vaíre

che térã che ypykue

rojapo vaekue roikuaa'ỹre.

Ore ore rembiapo vai

ne renondépe,

4ndorojapói

ne rembiapoukapy.

Upévare reja roñemonda,

rojereraha tembiguáirõ

tetã ambuépe ha Rómape.

Ha opa umi tetã

rojereraha hague rupi

oñeñe'ẽ vai ore rehe

ha iñe'ẽ guasu hikuái

oréve.

5Ahecha kuaa remyengoviaha

hendapete

che angaipáre.

Ndajapói nde eréva

ha ajei nde hegui.

6Ejapo rejaposéva

che hegui.

Eipe'a che hegui che rekove

yvýpe jeýnte apa haguã.

Amanoseve aikove rangue.

Heta ñe'ẽ rei aropu'aka

ha añembyasy eterei.

Tupã che Jára,

che renohẽna ko ñembyasýgui!

Ehejána taha ojepytu'uhápe

opa árape guarã.

Che Jára,

anína rejei che hegui!

Amanoseve uvei

ajepy'apy rangue aikove aja

ha ahendu rangue

iñe'ẽ guasúva chéve.

Sara ohasa asy ha oñembo'e

7Upe árape voi, peteĩ kuña hérava Sara, Raguel rajy, oikóva táva Ecbatánape, tetã Médiape, ojepy'apy avei itúva rembiguái kuñáva iñe'ẽ guasu haguére chupe.

8Sara omenda vaekue 7 jevy. Ha peteĩ aña hérava Asmodeo ojuka umi iménape ojoapykuéri oiko mboyve oñondive.

Upévare itúva rembiguái he'i chupe: “Nde hína pe rejukáva ne ména kuérape! Siétema ne ména, ha mavavégui ndaikatúi ne memby.

9Umi ne ména omano haguérente piko rejúta rejopy ore ndive? Emano mba'éna nde avei, ne memby'ỹre!”

10Sara oñembyasy ha oñepyrũ hasẽ. Upéi ojupi itúva róga ári ojejuvy haguãicha. Ojepy'a mongeta rire katu he'i ipy'apýpe: “Ñemotĩrãta niko che rúpe ágã upéi oje'e ramo chupe ‘Nde rajy peteĩete rehayhuetéva ñembyasýgui ojejuvy’. Py'a rasýpe niko ajukáta upéicharõ che ru tujápe. Ndajejuvy mo'ãi. Ajerurétante Ñandejárape oipe'a haguã che hegui che rekove, anive haguã ahendu iñe'ẽ guasúva chéve.”

11Upévo oipyso ijyva pe hovetã gotyo ha he'i:

Tereñemomba'e guasuete

Tupã reporoporiahurerekóva.

Toñemomba'e guasu

nde réra opa ára.

Opa umi ne rembiapokue

ta ne momba'e guasu

opa ára.

12Ndéve añembo'e,

nde rehe ajeko.

13Che rerahána

ko yvy árigui

anive haguã ahendu

iñe'ẽ guasúva chéve.

14Nde Tupã reikuaa

che marã'ỹha

ha mba'eveichagua kuimba'e

ndopokói hague che rehe.

15Che réra

térã che ru réra namongy'ái,

ko tetãme

rojereru haguépe

tembiguáirõ.

Che hína

che ru rajy peteĩ ete

ha ndoguerekói

oheja haguãme imba'eta

ha ndaipóri hogagua

térã ipehẽngue

che momenda haguã hese.

Omanóma che hegui

7 che ména.

Maerã piko aikoseve?

Ndereipotáirõ amano,

emaña che rehe

ha che poriahurereko.

Nahendusevéi

iñe'ẽ guasúva chéve.

16Upe javete, Tobit ha Sara ñembo'e Oguahẽ Tupã omombipáva rendápe. Ohendu chupe kuéra ha'e,

17ha omondo hemimbou Rafaélpe omonguera haguã mokõivépe. Tobítpe omyesakã haguã hesa ha ohecha jey Tupã ára resa. Ha Sara, Raguel rajýpe, oipe'a haguã aña Asmodeo poguýgui, ha ome'ẽ Tobit ra'y, Tobíaspe, hembirekorã. Tobías ra'e pe tenondete oĩva, ikatúva omenda Sara rehe.Nm 36.6-9; Tob 6.10-12. Tobit, oike jey javete okágui ikotýpe, Sara, Ecbatánape oguejy hóga árigui, ojejuvy mo'ã haguépe.