Eclesiástico 36 - Biblia Guaraní con Deuterocanónicos

Ñembo'e Israel rehe

1Ore poriahurerekóna Tupã,

opa mba'e Jára, ha ema'ẽ,

emyasãi nde kyhyje

opa tetã apytépe.

2Ehupi nde po

umi tetã mombyry guáre

oikuaa haguã nde pokatu.

3Rehechauka haguéicha

chupe kuéra ne marangatuha

ore nupãvo,

ehechaukána oréve ko'ágã

nde pokatuha,

reinupãvo chupe kuéra.

4Oikuaa haguã ha'e kuéra

ore roikuaaháicha,

ndaiporiha ambue Tupã,

nde rekoviarã.

5Embopyahu

umi mba'e rechaukaha,

ejapo jey hechapyrãva,

ehechauka nde reko mimbipa

ha nde pyapy mbarete.

6Embojepota nde pochykue

ha ehekuavo hi'ári kuéra,

embokusugue

umi ore rehe oñemoĩvape,

ha emyangu'ipa

umi ore rehe ija'e'ỹvape.

7Emoguahẽ pya'e upe ára,

ne mandu'ána

ne ñe'ẽ reme'ẽ vaekuére,

oñemyerakuã haguã

imombe'upyrã rejapo vaekue.

9Ore rehe ija'e'ỹva akãre

epyrũmba, umi he'íva:

“Oreichagua ndaipóri”.

10Embyatypa

Jacob ñemoñaregua

ha eme'ẽ jey chupe kuéra

ijyvyrã yma guaréicha.

11Eiporiahurereko,

ore Jára,

ne retãgua Israel,

nde rérape ojeheróva,

ere hague nde ra'y ypykueha.

12Eiporiahurereko

nde táva marangatu

Jerusalén, repytu'uha.

13Emyenyhẽ Sión

nde pokatúgui,

ha nde tupao

nde reko mimbipágui.

14Umíva umi mba'e

rejapo vaekue tenondete,

ehechauka rehayhuha,

ha ere toiko umi marandu

nde rérape oje'e vaekue.

15Emyengovia

nde rehe ojeroviávape,

ha ehechauka ne maranduhára*f**

he'i hague añetegua.

16Ejapysaka ne rembiguái

rembijerurére

ne retãgua rayhupápe,

17ha tojekuaa

ko yvy jerekuévo

ndeha Tupã

opa ára reikovéva.

Iporãvéva poravo

18Opaichagua tembi'u

omokõ ñande ahy'o

ha oĩ hevéva ambuégui.

19Ñande juru oikuaaháicha

umi tembi'u he,

ñane akã oikuaa

umi ñe'ẽ japu.

20Upe ijapu kuaáva

ogueru ivaíva,

upe iñakã porãva katu

hese omopẽ ijapu.

21Kuña omendase

oime raẽvarente voi,

ha oĩ kuñataĩ

iporãvéva ambuégui.

22Kuña porã ojehechase,

ha kuimba'e ohayhuve chupe

opa mba'égui.

23Ha upéva ári

hory ha oñemongeta kuaárõ,

iména ndaijojaha véima

yvypóra apytépe.

24Omendáva oñepyrũma

imba'e rereko heta,

oguerekóma

ipytyvõ ha imo'ãha,

ijyta ha ijekoha.

25Parralty ndaikorapýiva

oñemonda,

ha hembireko'ỹva

ovaháre oiko mante.

26Máva piko ojeroviáta

ñorãirõhára ohóvare

peteĩ távagui ambuépe?

27Péicha hína

kuimba'e hoga'ỹva

ha ipyharehápente okéva.