1Oikuaávo Demetrio, Nicanor ha iñorãirõhára kuéra omanomba hague Israel ndive oñorãirõhápe, omondo jey Báquides ha Álcimope Judéape iñorãirõhára aty akatúa pegua ñorãirõhára reheve.
2Oho hikuái Galiléa rape rupi ha ondyry Mesalot rehe, Arbela yvýpe, omoĩ ipópe upe táva guasu ha ojuka hikuái hetápe.
3Mes ijypy pegua áño 152 ramo, oñembyaty hikuái Jerusalén ypýpe.
4Upégui ohasa Beerótpe, 20.000 ñorãirõhára yvy rupigua ha 2.000 kavaju arigua reheve.
5Judas ha 3.000 iñorãirõhára poravo pyre katu oñembyaty Elásape.
6Ohechávo heta eteiha umi hese kuéra ija'e'ỹva, umi Judas ñorãirõhára oñemondýi ha okyhyjepa ha heta okañy. Aipórõ opyta hendive 800 añóntema.
7Judas, ohechávo iñorãirõhára kuéra okañymbaha, ha ndaikatu mo'ã veimaha ojoko ñorãirõ, ho'a ipy'a yvýre, mbyky etereíma niko ombyatyve haguã ñorãirõhára.
8Py'a kangýpe he'i umi opyta vaekuépe: “Jaha katu! Jajeity umi ñande rehe ija'e'ỹvare, ikatu vaerã gueteri ñañorãirõ hendive kuéra!”
9Ha'e kuéra katu he'i chupe: “Ndaikatu véima! Ñakañy mante ko'ágã ija ñamano'ỹ haguã. Upéi jaju jeýne ñane pehẽngue kuéra ndive ha ñañorãirõ ko'ã ñande rehe ija'e'ỹva ndive. Ko'ágã ñane mbovy eterei.”
10Judas ombohovái chupe kuéra: Toñeimo'ã'ỹke che akañytaha umi ñande rehe ija'e'ỹvagui! Oime ramo oguahẽma ñande ára, ñamano hekópe ñane pehẽngue kuéra rehehápe, ani jaheja iky'a ñande réra!
11Umi ñorãirõhára ija'e'ỹva hese kuéra osẽ pe oĩhágui ha oñemoĩ Israelgua kuéra renondépe. Kavaju ariguáva, peteĩ aty oho asu gotyo ha ambue aty akatúa gotyo, umi ita ha hu'y poiha katu oho tenonderã. Umi ipy'a guasuvéva tenondete.
12Báquides oĩ akatúape. Hetaveháicha, umi ñorãirõhára oñepyrũ oñemomýi tenonderãvo, mokõi henda guio, trompéta púpe.
13Judas irũ nguéra oñepyrũ avei oñemongu'e, ha pe ñorãirõhára aty ryapukue omboryrýi yvy. Pe ñorãirõ ipuku pyhareve guive ka'aruete peve.
14Judas, ohechávo Báquides ha pe iñorãirõhára aty imbaretevéva oĩha akatúa gotyo, ha'e ha iñirũ nguéra ipy'a guasuvéva
15ojeity hikuái upépe ha omosarambipa chupe kuéra, ha oho hapykuéri kuéra yvyty Hasor peve.
16Umi ñorãirõhára asu gotyogua ohechávo umi akatuagua oñehundipaha, ojere Judas umívare ha ondyry hese kuéra hapykue guio.
17Heta oñorãirõ hikuái ha heta omanóva mokõivegua guio.
18Judas avei ho'a ha umi hembýva okañymba.
19Jonatán ha Simón ohupi Judas re'õngue ha ogueraha oñotỹ hogagua tyvýpe, Modínpe.
20Opa Israelgua ojahe'o ohechaukávo hemimbyasy heta ára pukukue. He'i hikuái:
21“Ipy'a guasu vaicha ho'a, ko oguenohẽ vaekue Israélpe jejopy vaígui!”2 S 1.19,27.
22Hetaiteve mba'e hecha ramomby ha imombe'u pyrãva Judas ojapo vaekue noñemoĩ véima kuatiápe, hetaitereígui.
Jonatán, mburuvicha pyahu23Judas omano rire, opa Israelgua osẽ vaekue Tupã rekógui omopu'ã jey iñakã, ha tetã tuichakue ojekuaa jey umi mba'e vai apoha.
24Umi ára umívape tuicha vaekue ñembyahýi ha opavave ohasa jey upéicha rupi ijykére kuéra.
25Báquides oiporavo umi heko jerovia'ỹvévape oisãmbyhy haguã tetã.
26Umíva oñemoĩ oheka ha ojuhu Judas irũ nguerakue ha opa hayhuhárape, ogueraha Báquidespe ha ha'e oinupãuka ha oñembohory hese kuéra.
27Umíva umi árape tuicha teko asy ha ñembyasy Israélpe, ojehecha'ỹ haguéicha, maranduhára kuéra ndaiporivéi guive.
28Aipórõ, opa Judas reheguáva oñembyaty ha oho he'i Jonatánpe:
29Nde ryke'y Judas omano guive, ndaiporivéi peteĩ ha'eichagua ore sãmbyhy vaerã roñorãirõ haguã Báquides ha opa ñane retãre ija'e'ỹva ndive.
30Upévare péina ko'ágã roju nde poravóvo, nde haguã ore ruvicha ha ore myenonde haguã ñorãirõháme.
31Upete guive Jonatán oñemoĩ mburuvicha ramo tyke'ýra Judas rekovia.
32Báquides, oikuaa vove upéva, ojukase mo'ã chupe.
33Jonatán katu, tyvýra Simón ha iñirũ nguéra ndive oho hikuái yvy ojeiko'ỹha Tecóape ha upépe okañy Asfar ykua ypýpe.
34Báquides oikuaa upéva ha, pytu'u ára ramo jepe, pya'ete ohasa ysyry Jordán.
35Jonatán omondo ambue ipehẽngue Juánpe peteĩ atýra ndive umi nabatéo rendápe, ojerurévo chupe kuéra oheja haguã upe oĩhápe imba'eta kuéra.
36Ha oguahẽ mboyve, osẽ Medebágui umi Jambrí kuéra ha ojapyhy ha ogueraha Juánpe opa oguerekóva reheve
37Upe rire kurivévo, Jonatán ha ityvýra Simón oikuaa hikuái, umi Jambrigua ojapoha vy'a guasu oguerahávo peteĩ poguasu Canaán pegua rajy Nadabot guive omenda haguã.
38Upépe imandu'a mba'éichapa ha'e kuéra ojuka ra'e Juánpe, ha ojupi hikuái okañy peteĩ yvytýpe ha ohape ra'arõ chupe kuéra.
39Peichahágui ohecha hikuái tenonderã guio ouha hína ha'e kuéra gotyo umi Jambrigua heta mba'e reheve, pe menarã, ipehẽngue ha iñirũ nguéra ndive. Mba'e pararã ha hetave mba'e púpe ou hikuái ha ojehecha imba'e porojukaha porãha.
40Israelgua kuéra osẽ pe okañyhágui ha ojeity hese kuéra, hetápe ojuka, hetápe oheja ojekutupa haguére ha oñemomba'e hikuái opa oguerahávare. Hembýva, omano'ỹ vaekue okañymba pe yvytýre.
41Ha upéicha ñemendágui oiko tasẽ guasu ha mba'e púgui jahe'o soro.
42Péicha umi Israelgua omyengovia Juan jejukakue, ha oho jey hikuái pe ysyry Jordán rembe'y karuguápe.
43Báquides oikuaa upéva ha peteĩ pytu'u árape oho ysyry Jordán rembe'ýpe, ñorãirõhára aty nde tuicháva reheve.
44Aipórõ Jonatán he'i iñirũ nguérape: “Tenonderãvoke! Ñañorãirõke ha ñamo'ã ñande rekove! Ne'ĩrava gueteri jajecha peichagua jejopy vaípe.
45Umi ñande rehe ija'e'ỹva ondyrýta ñande rehe ñane renonde guio ha ñande rapykue guio ha mokõive ñande yképe oĩ pe ysyry Jordán rembe'y karugua meme ha ñanandy vai. Ndaipóri moõ rupípa ikatu ñakañy!
46Pesapukáike Tupãme ta ñande mo'ã umi ñande rehe ija'e'ỹvagui.”
47Ha oñorãirõ hikuái. Jonatán omopu'ãma ipo ojuka haguã Báquidespe, ha'e katu ojei chugui hapykuévo.
48Upémarõ Jonatán ha iñirũ nguéra ohasa ytápe ysyry Jordán. Umi hese kuéra ija'e'ỹva katu ndohasái omuña haguã chupe kuéra.
49Upe árape, Báquides kuérava ho'a omano amo 1.000 rupi.
50Báquides ojevy Jerusalénpe ha oñemoĩ omombarete heta táva Judea pegua: omombarete táva Jericó, Emaús, Bet-Horón, Betel, Timná, Piratón ha Tapúah, korapy yvate, okẽ ha yvyra poguasu reheve.
51Umívape oheja ñorãirõhára ojapi manté vaerã umi Israel guápe.
52Omombarete avei Bet-Sur, Guézer ha Jerusalén mbyte ha omoĩ umi rupi ñorãirõhára ha tembi'u.
53Omyakãsã myakãhára kuéra Israelgua ra'y kuérape ha omboty atã chupe kuéra Jerusalén mbyte oñemombarete vaekuépe.
54Mes mokõiha, áño 153 jave, Alcimo oityka pe tupao rogaguy hyepyvogua ogyke, ha upéicha ombyaipa umi maranduhára rembiapokue. Oñepyrũ jave ojeity katu,
55Álcimore ho'a peteĩ mba'asy ndohejái vaekue chupe ojapopa upe hembiapo. Hatã chugui ijuru, ndaikatuvéi oñe'ẽ ha pe kuatia hembireja rehegua jepe ndaikatúi ojapo.
56Ha péicha omano hetaite mba'e rasy pa'ũme.
57Báquides oikuaávo Alcimo omano hague, ojevy mburuvicha guasu rógape, ha Judea upéicha rupi ipy'a guapy mokõi áño pukukue.
58Opa Israelgua heko jeroviahave'ỹva oñembyaty hikuái ohecha haguã mba'épa ikatu ojapo, ha he'i: “Jonatán ha iñirũ nguéra oiko py'a guapy ha jeroviápe. Jaru Báquidespe omyakãsã haguã chupe kuéra peteĩ pyharépe voi.”
59Aipórõ oho hikuái oñemongetávo Báquides ndive,
60ha ha'e oñemoĩ tapépe peteĩ ñorãirõhára aty nde tuicháva reheve. Opa hendive oĩvape Judéape oguerahauka kuatia ñemi ojerurehápe oñemyakãsã haguã Jonatán ha iñirũ nguérape. Ãva katu oikuaa pe iñakãme kuéra oguerekóva, ha upéicha rupi, upéva ndikatúi oiko.
61Jonatán irũ nguéra katu aipórõ, ojapyhy 50 umi omyakãva hína pe mba'e ojaposéva hikuáipe, ha ojuka.
62Jonatán, Simón ha iñirũ nguéra oho hikuái Betbasípe, yvy ojeiko'ỹháme, táva guasu ho'apa vaekue, ha omopu'ã jey ha omombarete.
63Báquides, oikuaávo upéva, ombyaty opa iñorãirõhára ha omomaranduka iñirũ nguéra Judea peguápe.
64Ojeity tapére ha oho oñemohatã Betbasí renondépe, ha heta ára pukukue ondyry hese umi mba'e porojukaha ojapouka vaekue reheve.
65Jonatán oheja táva guasúpe ipehẽngue Simón, ha osẽ oho mbovymi ñorãirõhára reheve.
66Otaky umi Odomerá ha Fasirón guáre oikohápe. Upe rire ojevy iñorãirõhára kuéra ndive.
67Simón ha iñirũ nguéra osẽ avei upe táva guasúgui ha ohapypa hikuái umi mba'e ojeporojukaha.
68Oñorãirõ hikuái Báquides ndive ha oheja chupe yvýre, ombojecha chupe kuéra jejopy vaípe ha omopane chugui kuéra ojapose vaekue.
69Báquides upépe ipochy eterei umi Israelgua heko jeroviahave'ỹva ndive, he'i vaekue chupe iporãha oho Israel ári, ha ojukauka heta ha'e kuéravape. Upéi, ha'e ha iñirũ nguéra oho jey hetãme.
70Jonatán oikuaávo upéva, omondo Báquides rendápe ojapóvo kuatia oñorãirõve'ỹ haguã ha oheja haguã umi Israelgua oguerekóva myakãsamby ou jey hógape kuéra.
71Báquides omonei pe Jonatán he'ikáva chupe ha ome'ẽ iñe'ẽ ndojapo véima vaerãha araka'eve ivaíva hese oikove aja pukukue.
72Opoipaite umi Israelgua oguerekóvagui, ogueraha vaekue Judéagui, oho jey hetãme ha ndojerevéi Judéape.
73Péicha opa ñorãirõ Israélpe. Jonatán opyta Micmáspe, oñepyrũ oisãmbyhy hetã guápe ha ojukapa umi ojere vaekue Israelgua rekógui.
Who We AreWhat We EelieveWhat We Do
2025 by iamachristian.org,Inc All rights reserved.
