Salmos 77 - Biblia Guaraní con Deuterocanónicos

Che mandu'a Tupã rembiapokuére

1Salmo, Asaf rembiapokue.

2Hatã añembo'e Tupãme,

chupe asapukái che rendu haguã.

3Añembyasy jave Tupãme ahenói,

pyharekue che po amopu'ã manté,

ha ndajuhúi pytu'u.

4Tupã rehe che mandu'a ha che ãho,

ajepy'a mongeta ha che kangypa.

5Nde Tupã nda che rejái ake,

py'a tarovágui ndaikatúi añe'ẽ.

6Che mandu'a yma guarére,

che akãme oguereko

umi ára ohasa vaekue.

7Pyharekue ajepy'a mongeta,

ambojere che akãme

ha añeporandu:

8Ipochyetétama voi piko

Ñandejára ñane ndive?

Ndohecha kuaa mo'ã véima piko

ñandéve?

9Na imandu'a véima nga'u piko

ñande rehe

ajeve hesarái

iñe'ẽ ome'ẽ vaekuégui?

10Hesarái mba'e piko Tupã

imba'e porãha ñane ndive,

térã piko ipochýgui

na ñande poriahurerekosevéi?

11Ha'e che py'a pýpe:

“Upe hasyvéva chéve

Tupã hesarái hague

ñande hegui.”

12Che mandu'a imombe'upyrã

Tupã ojapo vaekuére,

ha mba'e hechapyrãva

yma guarére.

13Che akãme ambojere

opa mba'e ojapo vaekue,

ha ajepy'a mongeta

hembiapokuére.

14Há Tupã!

Ne rembipota niko imarangatu.

Ndeichagua, Tupã tuicháva,

piko oiméta?

15Nde hína Tupã

rejapóva mba'e rechapyrã,

ha rehechauka vaekue

nde pokatu opa apytépe.

16Nde po rupiete

renohẽ ne retãgua,

Jacob ha José ñemoñare kuérape.

17Nde rechávo Tupã

yguasu oñemondýi,

nde rechávo yguasu oryryipa,

amo huguaite peve osusũmba.

18Araígui ohekuavo ama,

ára osunu,

ha ára tiri ojuasasa.

19Ára sunu amo yvágare hyapu,

ára tiri yvy ape ohesapepa,

yvy katu okuchu ha osusũmba.

20Yguasu rupi

rejapo nde raperã,

yeta remopa'ũ ha rehasa,

ha nde rapykuere ndojekuaái.

21Moisés ha Aarón rupi

ovecháicha ne retã reisãmbyhy.