2 Macabeos 11 - Biblia Guaraní con Deuterocanónicos

Lisias osẽ vai iñorãirõme

1Nda aretéi rire, Lisias mburuvicha guasu pytyvõha, hóga guáva, ha oisãmbyhýva hérape tetã,1 Mac 3.32-33; 6.17; 2 Mac 13.2. ojepy'apy etereígui opa mba'e ojehúvare,

2ombyaty haimete 80.000 ñorãirõhára yvy rupigua ha heta avei kavaju arigua ha ojeity umi Israel guáre. Hi'ãnte chupe ojapo Jerusaléngui peteĩ táva umi Greciagua oiko haguã.

3Ha itupao ohepyme'ẽ haguã ohepyme'ẽháicha umi tupao opa tetã megua, ha áño jerépe ome'ẽ jepi haguã hepýre pa'i ruvicha guasúrõ ojeiko haguã.

4Hesarái Tupã pokatúgui, ojeroviánte iñorãirõhára kuérare, yvy rupiguáva ha kavaju ariguáva, ha umi 80 elefánte rehe.

5Oikévo Judéape, oñemboja Bet-Sur rehe, táva mbarete opytáva 25 kilómetro rupi Jerusaléngui, ha ondyry hese.

6Oikuaávo Macabeo ha iñorãirõhára kuéra Lisias ondyryha hína pe táva mbaretére, oñembyaty hikuái opa tetãgua ndive, ha jahe'o ha tesaýpe ojerure Ñandejárape peteĩ hemimbouEx 23.20; Jos 5.13-15; Jue 6.11-24; 2 R 19.35. oguenohẽ vaerã Israélpe jejopy vaígui.

7Macabeo, ha'e raẽvete osẽ vaekue oñorãirõvo, omyakã raku opavavépe oñondivepa osẽ haguã ojepytaso ipehẽngue kuéra rehehápe. Maymáva opu'ã kyre'ỹme oho haguã oñorãirõvo.

8Oĩrõ gueteri hikuái Jerusalén ypýpe, osẽ sapy'a ñorãirõhára kuéra renondépe peteĩ kavaju arigua ijao morotĩva, ombovava yvate mba'e ñorãirõrã óro.

9Aipórõ, opavave omomorã Tupã ipy'a poriahurerekóvape ha iñakã raku hikuái osẽ haguã oñorãirõ ndaha'éi yvypóra ndive año, opa tymba ñarõ ha tápia fiérro ndive katu.

10Oñemoĩ hikuái oñorãirõ haguãicha, henondépe kuéra yvága remimbou, Ñandejára ombou vaekue ipy'a poriahurerekógui.

11Jaguaretéicha ojeity hikuái umi hese kuéra ija'e'ỹvare ha ojuka 11.000 ñorãirõhára yvy rupigua ha 1.600 kavaju arigua, umi ambuépe katu omosarambipa.

12Opavave nunga ojekutupa, opyta imba'e ñorãirõrã'ỹre ha okañymba. Lisias katu oñemotĩ ha okañy.

Lisias oikuave'ẽ py'a guapy Israel guápe

13Lisias, ndaitavýiva, oñamindu'u pe ojehu vaekuére chupe ha ohecha kuaa, umi Israelgua ndaikatuiha oñemboguevi oguereko rupi ijykére kuéra Tupã ipu'akapávape. Aipómarõ, omondo hendápe kuéra hembijokuái,

14oikuave'ẽ haguã chupe kuéra py'a guapy hekópe porã, ha he'i oñe'ẽtaha mburuvicha guasúpe ipy'a porã haguã hendive kuéra.

15Macabeo, ohecha kuaávo iporã vaerã opavavépe, omonei opa mba'e Lisias oikuave'ẽ vaekue chupe, ha mburuvicha guasu ome'ẽ opa Macabeo ojerure vaekue Lisíaspe kuatiápe, opa Israelgua rehehápe.

16Kuatia oguerahaukáva Lisias Israelgua kuérape he'i péicha:

“Lisias omomaitei Israelgua kuérape.

17Juan ha Absalón, pene rembijokuái, ogueru chéve pe kuatia, ha he'i chéve amonei haguã opa ipypegua.

18Che amombe'uka mburuvicha guasúpe opa ha'e ohecha vaerã, ha ha'e ome'ẽ opa ikatúva.

19Peẽ pehechauka ramo pende py'a porãha mburuvicha guasu ndive, che añeha'ãne peiko porã haguã.

20Péina ha'e umi pene remimboúpe ha umi che rembijokuáipe oñemoĩ haguã pene ndive peteĩ ñe'ẽme opa mba'ére.

21Ta peime porãite.

Ára 24 ramo, mes hérava Dióscorope, áño 148.”

22Pe kuatia, mburuvicha guasu oguerahauka vaekue Lisíaspe, he'i kóicha:

“Mburuvicha guasu Antíoco omomaitei Lisíaspe.

23Ko'ágã che ru ojererahámava tupã nguéra rendápe, aipota opa che retãgua oiko py'a guapýpe, ikatu haguã omba'apo imba'évape.

24Ha ahendu niko umi Israelgua ndoikoseiha Greciagua kuéra oikoháicha, oipota haguéicha che ru, oikosénte hikuái heko teépe, ha ojerure ojeheja haguã chupe kuéra tojapo hembiapoukapy he'iháicha.

25Aipotágui avei upe tetã upéva oiko py'a guapýpe ha'e oñeme'ẽ jey haguã chupe kuéra itupao ha toiko hikuái itúva kuéra ypy kuéra oiko haguéicha.

26Emondomi tembijokuái ojapo vaerã py'a guapy hendive kuéra, ikatu haguã, oikuaágui che aipotáva, oiko hikuái py'a guapýpe ha omba'apo imba'évape.”

27Kuatia omondo vaekue mburuvicha guasu Israelgua kuérape he'i péicha:

“Mburuvicha guasu Antíoco omomaitei myakãhára*f** ha opa Israel guápe.

28Hi'ãnte chéve peime porãmbaite. Ché che resãi.

29Menelao he'i chéve peẽ pehose jeyha pende rógape.

30Aipórõ, ndaheja mo'ãi ojepoko oho jeývare, ára 30 mes Xántico ramo guarã.

31Israelgua kuéra ikatúta okaru ojepokuaaháicha ha ojapo ha oiko tembiapoukapy he'iháicha yma guaréicha. Mavave rehe ndojepoko mo'ãi mba'eve ojapo vaekuére ymave.

32Amondo peẽme Menelao oñangarekóvo pende rehe, oiko haguã ko che ha'eháicha.

33Ta peime porãite.

Ára 15, mes Xántico ramo, áño 148.”

34Umi Romagua avei oguerahauka Israelgua kuérape kuatia he'íva:

“Quinto Memio ha Tito Manio, Romagua rérape, omomaitei Israelgua kuérape.

35Opa umi ome'ẽ vaekue peẽme Lisias, mburuvicha guasu pehẽngue, romoneimbaite ore avei.

36Pehecha porãke umi ha'e omboyke vaekue he'i haguã mburuvicha guasúpe, ha pembou oréve pene rembijokuái, ore ro'e haguã mburuvicha guasúpe iporãve haguãicha peẽme, roho niko hína Antióquiape.

37Upévare, pya'e porã pembou oréve pene rembijokuái, roikuaa haguã mba'épa peipota.

38Ta peime porãite.

Ára 15, mes Xántico, áño 148.”