1Upe aja katu, Judas Macabeo ha iñirũ nguéra oike ñemiháme umi tava'i rupi ha oñepyrũ ombyaty hogagua kuérape ha umi ndojeíri vaekuépe Israel rekógui, ha ombyaty 6.000 rupi.
2Ojerure hikuái Ñandejárape oma'ẽmi haguã Israelgua opavave omuñávare, oiporiahurereko haguã pe tupao umi mombyrygua omomarãva.
3Oiporiahurereko haguã avei Jerusalén oñembyaipáva ha oĩva oñehundi ete haguãicha, ohendu haguã pe sapukái ojeruréva oñemyengovia haguã umi omano vaekue ruguýre.
4Imandu'a haguã umi mitãmimi ojejuka reívare, omyengovia haguã umi hérare ojahéivape, ha tohechauka ndaija'eiha mba'e vaíre.
5Judas ombyaty rire iñorãirõhára kuéra, ndaipóri omboguevíva chupe, Ñandejára niko ipochyhágui oiporiahurerekóma chupe kuéra.
6Ojeity jepi oñeimo'ã'ỹhágui umi táva guasúre ha umi tava'íre ha ohapy, oñemohatã umi iporãvehápe ha omosarambi ha omuña umi mombyrygua ija'e'ỹva hese kuérape,
7oha'arõ pyhare ojeity haguã hese kuéra. Ipy'a guasuha herakuã mbuku opa rupi.Nicanor ha Gorgias oike Judéape(1 Mac 3.38-45)
8Filipo ohechávo Mba'éichapa Judas Macabeo oñakã rapu'ã ohóvo ha heta hetave ha ko'ẽre osẽ porãveha, oguerahauka peteĩ kuatia Toloméope, ñorãirõhára ruvicha Celesiria ha Feníciape, oho haguã oipytyvõ chupe oñangarekóvo mburuvicha guasu mba'évare.
9Toloméo oiporavo pya'ete Patroclo ra'y Nicanórpe,1 Mac 7.26-27. mburuvicha guasu jerovia peteĩva, ha omondo chupe, haimete 20.000 ñorãirõhára opa rupigua reheve, ohundipaite haguã umi Israel guápe. Hendive omondo Górgiaspe, mburuvicha ha'evéva ñorãirõme.
10Nicanor he'i ijupe, umi Israelgua omyakãsãva repykuépe ohepyme'ẽtaha pe 66.000 kílo pláta ome'ẽ vaerã umi Roma guápe.
11Pya'ete he'ika umi táva guasu yguasu rembe'y peguápe, ojogua haguã tembiguái ramo umi Israelgua oñemyakãsãvape, mbohapy peteĩ kílo plátare, ha ndohechái pe ñenupã Tupã ipu'akapáva ikatúva ombou chupe.
12Judas oñemomarandu ohoha hína Nicanor, ha oikuaauka iñirũ nguérape ñorãirõhára aty mombyrygua hi'aguĩha.
13Upépe, umi ipy'a mirĩva ha ndojeroviáiva Tupã reko jojáre oho rei ha okañymba.
14Heta ambue katu, oñemumba umi oguerekomívare ha ojerure asy Ñandejárape oipe'a haguã hi'ári kuéragui Nicanor, pe teko aña, oñorãirõ mboyve voi ome'ẽmava chupe kuéra hepýre.
15Ojerure hikuái Tupãme, upéva ndojapói ramo hesehápe kuéra, tojapo imandu'ávo iñe'ẽ me'ẽreEx 19.5-6; 2 Mac 1.2. itúva kuéra ypykue ndive, ha pe téra marangatu ha mimbipa ha'e kuéra oguerahávare.
Judas Macabeo omboguevi Nicanórpe(1 Mac 3.46-60)16Macabeo ombyaty iñirũ nguérape, ohupytýva 6.000 ñorãirõhára, ha he'i chupe kuéra ani haguã ipy'a mirĩ umi ija'e'ỹva hese kuéra renondépe, ha ani okyhyje umi tekove jeroviaha'ỹgui ojeitýva hese kuéra, ipy'a guasu haguã uvei ñorãirõme,
17imandu'ávo mba'e vaieta ojapóvare tupaóre ha Jerusalén rehe, ha amo ipahápe, ndojehejavéi ojeiko Israel rekópe.
18Judas he'i: “Ha'e kuéra ojerovia ihu'y ha ikyse pukúre ha ijehe kuéra, ñande katu, jajerovia Tupã ipu'akapávare,Sal 20.8. peteĩ tesa pirĩme ikatúva ohundi umi oúva ñande áripe, ha opa yvy ári guápe avei.”
19Imandu'a chupe kuéra Mba'éichapa Tupã oipytyvõ raka'e itúva kuéra ypykue, ojehu haguéicha Senaquerib oikoveha árape, omano ramo guare 185.000 ñorãirõhára,2 R 19.35; Is 37.36; 1 Mac 7.41.
20ha avei upe Babilóniape oiko vaekuére oñeñorãirõ ramo guare umi gálata ndive. Upérõ oñorãirõ vaekue 8.000 Israelgua oipytyvõvo 4.000 Macedonia guápe, ha Tupã oipytyvõ rupi chupe kuéra, ohundi vaekue 120.000 hese kuéra ija'e'ỹvape, ha oñemomba'e hetaiterei mba'ére.
21Péicha oñe'ẽvo, omyakã raku chupe kuéra ha oheja ku omano haguãicha tembiapoukapýre ha hetãre, omboja'o iñorãirõhára kuéra irundy atýpe.
22Omyakã haguã umi aty omoĩ ityvýra kuéra, Simón, José ha Jonatánpe, ha peteĩ-teĩme ome'ẽ 1.500 ñorãirõhára.
23Upéi katu he'i Azaríaspe omoñe'ẽ haguã pe kuatia marangatu, ha ome'ẽ chupe kuéra ojokuaa haguã ñe'ẽ he'íva “Tupã ñane pytyvõ”, oñemoĩ pe ñorãirõhára aty hembýva renondépe ha ondyry Nicanor rehe.
24Oguerekógui ijykére kuéra pe Ipu'akapáva, ojuka hikuái 9.000 rasa rupi ha oheja vaipaite Nicanor ñorãirõhára atýpe, ha opavave isarambipa.
25Hi'arietegua, oñemomba'e hikuái pe virúre ogueru vaekue umi oúva ojogua haguã chupe kuéra.2 Mac 8.11,34. Omuña rire chupe kuéra mombyry peve, ojevy hikuái, ka'aru etereímagui.
26Pytu'uha ára mboyve hína, ha upévare nomuñavéi chupe kuéra.
27Omono'õmba rire umi mba'e ñorãirõrã, hu'y ha kyse puku umíva ha hetave mba'e oheja reipa vaekue umi mombyrygua, ombyarete hikuái pytu'uha ára. Ha ogueropurahéi ha omomba'e guasu jey-jey Ñandejárape oguereko haguére chupe kuéra hekove reheve upe ára peve, ha ohechauka ñepyrũvo chupe kuéra iporiahurereko.
28Ohasávo upe pytu'uha ára, omboja'o hikuái umi mba'eta ñorãirõ rire. Oime oñeme'ẽva umi oñemuña vaekuépe, ha iména mano ha ityre'ỹ vaekuépe, hembyre katu ijupe kuéra ha ita'ýra kuérape.
29Péicha ojapopa rire, oñembo'e hikuái oñondivepa Ñandejára oporoporiahurerekóvape. Ha ojerure chupe ha'e oiko porãmbaite jey haguã hembiguái kuéra ndive.
Judas ohundi Timoteo ha Báquidespe30Judas ha iñirũ nguéra oñorãirõvo Timoteo ha Báquides ñorãirõhára kuéra ndive,1 Mac 7.8. ojuka 20.000 rasápe ha oñemomba'e hatã porã hikuái umi táva mbarete ijyvatévare. Upépe omboja'o mokõi atýpe, umi mba'eta oñembyatýva ñorãirõ rire. Peteĩ aty imba'e kuerarã ha pe ambue katu, umi oñemuña vaekue, ityre'ỹva, iména manóva ha itujámavape guarã.
31Omono'õ hikuái umi mba'e ñorãirõrã oheja vaekue umi hese kuéra ija'e'ỹva ha ogueraha oñongatu porã. Hembyre ogueraha Jerusalénpe.
32Ojuka hikuái Timoteo ñorãirõhára aty ruvicha, kuimba'e iñañavéva opavavégui, heta Israel guápe ombohasa asy vaekue.
33Oguerohorývo hikuái ohundi hague hikuái umi mombyry guápe, ohapy hikuái umi tupao rokẽ hapyharépe, ha Calístenespe ave, okañy vaekue hína peteĩ tapỹime. Péicha ha'e ohupyty ñenupã ojeruréva hembiapo vaikue.
34Nicanor, pe tekove aña ogueru vaekue 1.000 ñemuhára ha'e ome'ẽ haguã chupe kuéra hepýre Israelgua omyakãsãvape,2 Mac 8.11,25.
35opyta yvýre, Ñandejára pytyvõ rupi, umi ha'e ija'e'ỹveha renondépe. Ijao ojegua porãitéva sorokuepa oiko ápe ha pépe umi oka'úvaicha pe ñúre, oguahẽ peve Antióquiape. Ipo'ave katu ko ha'e iñorãirõhára kuéragui, oñehundipa vaekue.
36Ha ha'e, he'i vaekue ohepyme'ẽtaha umi Roma guápe, Israelgua kuéra oñemyakãsãva repykuére, he'i mante Israelgua kuéra oguerekoha peteĩ ipytyvõhára. Ha ndaikatuiha ha'e kuéra oñehundi ojapógui tembiapoukapy Tupã ipytyvõhára, ome'ẽ vaekue chupe kuéra.
Who We AreWhat We EelieveWhat We Do
2025 by iamachristian.org,Inc All rights reserved.
