1Opa ko'ã mba'e oiko aja, Mburuvicha guasu Antíoco oiko umi tetã yvatevogua rupi. Upépe oikuaa, Pérsiape oimeha peteĩ táva guasu hérava Elimaida, herakuã mbukúva pláta ha óro oguerekóvare.
2Oime peteĩ tupao heta etei mba'e oguerekóva, tete mo'ãha óro, ñemo'ãha anambusu ha heta mba'e ojeporúva ñorãirõháme, oheja vaekue upépe Alejandro, Macedoniagua, Filipo ra'y, tetã Grecia mburuvicha guasu tenonde guare.
3Antíoco oho upe táva guasu upévape, ha omoĩse mo'ã ipópe ha omondapase mo'ã ha ndaikatúi, ipypegua kuéra apysápe oguahẽ mba'épa ojapose,
4ha osẽ ojepytaso henondépe, aipórõ, oguevi mante ha oho jey Babilóniape.
5Oĩ jave gueteri Pérsiape oguahẽ chupe marandu he'íva, pe ñorãirõ omondo vaekue Judea ári osẽ vai hague,
6Lisias ra'e, jepevénte oho peteĩ ñorãirõhára aty ne mbaretéva reheve, osẽ vai ha oguevi Israelgua renondépe, oñemombarete porã vaekue mba'eta ojapyhýva reheve, hese kuéra ija'e'ỹva ohundipa vaekuégui;
7umi Israelgua oity hague avei pe altar vai1 Mac 1.54; 4.45. omopu'ã vaekue ambue altar oñemymbahapyha ári Jerusalénpe; omopu'ã hague pe tupao jerére korapy yvate, ymave guareichagua, ha omombarete jey hague táva guasu Bet-Sur.
8Oikuaávo ko'ã mba'e, mburuvicha guasu oñembyasyeterei, ha upevakuégui hasy, mba'eve nosẽ porãi haguére ha'e oipota haguéicha.
9Ha upépe oĩ heta ára, oñembyasýrõ oñembyasyve, ipahápe oimo'ãma omanóta.
10Upémarõ ohenoika umi hayhupárape ijykére ha he'i chupe kuéra: “Ndaikatuvéi ake ha che py'a itarova.
11Mba'ére piko aguahẽ ko ñembyasy guasuetépe, che, che mbaretete vaekue ha avy'a ha ajehayhu?
12Ha ágã ae che mandu'a hína, hetaite mba'e vai ajapo hague Jerusalénpe, amondapa opa mba'e óro ha pláta guigua ha amondo ñorãirõhára ojukapa vaerã Judea guápe, reiete.
13Ahecha kuaa upe haguére ouha chéve ko'ã mba'e vaieta. Péina amano aína peteĩ tetã che mba'e'ỹvape.”
14Ohenoika Filípope, peteĩ poguasu ijykeregua ha'e ohayhúva ha omoĩ chupe oisãmbyhy haguã tetã.
15Ome'ẽ chupe iñakãregua, imburuvicha guasu ahoja ha ikuãirũ ha he'i chupe oheko mbo'e haguã ta'ýra Antíocope ikatu haguã upéi oisãmbyhy tetã.
16Ha upépe omano mburuvicha guasu Antíoco, áño 149 jave.
17Lisias, oikuaa vove omano hague, ohupi hendaguépe mburuvicha guasúrõ ta'ýra Antíocope, ha'e voi oheko mbo'e vaekue oúvo michĩete guive, ha omoĩ chupe herarã: Eupátor.
Judas Macabeo omongora Jerusalén(2 Mac 13.1-22)18Opa ko'ã mba'e oiko aja, umi ñorãirõhára Jerusalén pegua ndohejái osẽ tupao jeréregui Israelgua kuérape, ojapo manté hese kuéra ivaíva ha omo'ã umi heko jeroviaha'ỹvape.
19Aipórõ Judas he'i ojeity haguã hese kuéra, ombyaty Israel retã guápe ha omongora pe ñorãirõhára kuéra oĩha.
20Upéicha ojapo, áño 150pe, ha omongora hikuái umi ñorãirõhára mombyry guápe, omopu'ã umi mba'e yvate guive ojeporoapiha ha ojapo umi mba'e ojeporúva ñorãirõrã.
21Heta umi ñorãirõhára osẽ upe oñemongorahágui, ha oñemoirũ hese kuéra umi Israelgua heko jeroviaha'ỹva.
22Ha'e kuéra oho mburuvicha guasu rendápe, ha he'i chupe: “Araka'e peve piko roha'arõta reho haguã rembyekovia ore reko asykue umi ore retã guápe?
23Ore niko roñemoĩ vaekue, orete roipotágui, nde ru pópe ha roiko ha'e he'iháicha ha rojapo ha'e he'íva.
24Upevakuére, ore retãgua kuéra omboty ore hegui pe táva mbyte ha ndaija'evéi ore rehe, ha oimeve, ojukapa katu opa oréva ojuhúva guivépe ha oipe'apa ore hegui ore mba'éva.
25Ha ndaha'éi voi ave ore rehénte ojeitýva, ondyry katu avei opa nde ykereguáre.
26Péina ko'agãite oñemohatã hikuái Jerusalén mbytépe omoĩmbaite haguã ipópe kuéra. Hi'arietegua, omombarete hikuái tupao ha Bet-Sur.
27Ko'agãite voi nereñemotenondéi ramo ha resẽ rejoko chupe kuéra, ojapóne hikuái ivaivéva ha ndaikatuvéi chéne rejoko.”
28Ohendúvo chupe kuéra, mburuvicha guasu ipochy eterei ha ohenoika imburuvicha kuérape, kavaju arigua ha yvy rupigua ruvicha kuérape.
29Oñemoirũ avei hese ñorãirõhára mombyryguáva ha umi yguasu rembe'y pegua tetã ngueragua.
30Mburuvicha guasu ñorãirõhára kuéra ohupyty 100.000 yvy rupigua, 20.000 kavaju arigua ha 32 elefánte ojeheko mbo'e vaekue ñorãirõrã.
31Ohasa hikuái Idumea rupi ha oñembyaty Bet-Sur renondépe ha heta ára pukukue ondyry hikuái Israel guáre, heta mba'e ijapo pyre ñorãirõ haguã reheve. Umi Israelgua katu osẽ hikuái okávo, ondyry hese kuéra py'a guasúpe ha ohapypa chugui kuéra umi mba'e ogueraha vaekue oñorãirõ haguã.
32Aipórõ Judas osẽ upe táva mbytégui ha oñembyaty Bet-Zacarías ypýpe, mburuvicha guasu oĩha renondépe.
33Ára ko'ẽvo, voi porã, mburuvicha guasu omopu'ã iñorãirõhára kuéra ha pya'ete oho Bet-Zacarías gotyo. Oñembosako'i hikuái oñorãirõ haguã, ha oñembopu turu kuéra.
34Umi elefántepe ohechauka hikuái parral'a ha mora rykue omyakã raku haguã.
35Peteĩ-teĩ elefánte rapykuéri oñemoĩ 1.000 ñorãirõhára, hete mo'ãha ha iñakã mo'ãha vrónseva, ha avei 500 yvy rupigua iporavo pyre,
36ha umi ñorãirõhára oñemomýi pe elefánte oñemomýi javeve, ohohápe ha'e ohopa umi hapykuerigua.
37Peteĩ-teĩ umi elefánte ári oĩ peteĩ óga yvate yvyra imbaretéva, oñeñapytĩva hese tukumbópe. Ipype oĩ pe imboguataha India guáva ha irundy ñorãirõhára, opoíva ihu'y kuéra upe guive.
38Umi ñorãirõhára kavaju arigua oñemoĩ mokõive ijyképe, upe guive ondyry haguã umi hese kuéra ija'e'ỹvare; yvy rupigua katu oñemoĩ mbytépe oñangareko haguã umi kavaju ári guáre.
39Ohesapévo kuarahy umi tete mo'ãha óro ha vrónse guiguávare, overa umi yvyty ha ojekuaa tata rendýicha.
40Mburuvicha guasu ñorãirõhára kuéragui, peteĩ atýra guasu oñemoĩ umi yvyty ári ha pe hembyre katu opyta iguýpe. Hysyihápe porã ha tuicha jeroviápe oñemotenonde ohóvo hikuái.
41Opa ohendúva mba'éichapa hyapupa umi ñorãirõhára oñembotávo ojuehe ipopegua oguerekóva ñorãirõrã, oñemondýi ha okyhyje joa. Añetehápe, tuicha ha imbarete upe ñorãirõhára aty.
42Judas ha iñorãirõhára kuéra oñemotenonde avei oñorãirõ haguã, ha ondyrývo ojuehe, mburuvicha guasu ñorãirõháragui 600 rupi ho'a omano.
43Eleazar, ojeheróva Avarán, ohecha peteĩ elefánte ojegua ha ijape atãmbáva, ojekuaa porãva umi ambue apytépe, ha ojepy'a mongeta upéva ári oiméne haguã mburuvicha guasu.
44Aipo ramo, ha'e ome'ẽ hekove oipe'a haguã jejopýgui hetãgua ha opyta herakuã mbuku opa árape guarã.
45Py'a guasúpe oñemotenonde ñorãirõhára pa'ũme, ijasúpe ha ijakatúape oporojuka ohóvo ohasa haguã.
46Eleazar oho oike pe elefánte guýpe, oikutu ha ojuka, ha upe elefánte ho'a hi'ári ha omano avei ha'e.
47Israelgua kuéra katu, ohechávo imbaretetereiha mburuvicha guasu ñorãirõhára aty, oguevi mante hikuái.
48Mburuvicha guasu ñorãirõhára kuéra omuña umi Israel guápe Jerusalén gotyo ha omongora Judea ha yvyty Sión.
49Oñemoĩ peteĩ ñe'ẽme oñorãirõ'ỹ haguã umi Bet-Surgua ndive, ohejapáva hikuái upe táva guasu ndoguerekovéigui ho'u vaerã, upe año upéva áño sabático rupi, yvy opytu'u vaerãha.Ex 23.11; Lv 25.1-7.
50Upéicha, mburuvicha guasu oñemohatã Bet-Súrpe ha oheja upépe ñorãirõhára oñangareko vaerã hese.
51Upégui oho omongora ha ondyry tupaóre heta ára pukukue opaichagua mba'e ñorãirõ apoha reheve: mba'e yvate hu'y poiha, ita ha tata poiha.
52Israelgua kuéra katu omopu'ã avei heta mba'e oñorãirõ porã haguã ha ombohovái chupe kuéra heta ára pukukue.
53Jepe upéicha, áño sabático rupi hína, sa'íma oguereko hikuái hi'upyrã, umi Israelgua ou vaekue Judéape tetã mombyry rupigui, ho'upáma voi ra'e pe hembymi vaekue.
54Upéi, oñepyrũvo ojopy chupe kuéra ñembyahýi, mbovymíntema opyta pe tupaópe, peteĩ-teĩ ohopa hikuái hógape kuéra.
Mburuvicha guasu oheja Israel guápe omomba'e guasu Tupã(2 Mac 13.23-26; 11.22-26)55-56Mburuvicha guasu Antíoco omano mboyve oheja ra'e ta'ýra Antíoco Filípope oheko mbo'évo mburuvicha guasurã. Ha'e katu, ojevývo Persia ha Médiagui, oñemoĩ omba'apo ñemi oity haguã Antíocope ha ojupi ha'e hendaguépe. Lisias, oikuaávo upéva,
57pya'ete oñembosako'i oho haguã ha he'i mburuvicha guasu, ñorãirõhára kuérape ha huvicha kuérape: “Ko'ẽre niko ñane mbovyve, sa'íma jareko ja'u vaerã; ko ñandyryha ñaína imbarete, ha upéi ave, ñane retã oikotevẽ ñande rehe.
58Ñañemoĩna peteĩ ñe'ẽme Israelgua kuéra ndive ñañorãirõve'ỹ haguã.
59Jaheja chupe kuéra toiko jey yma guaréicha, ñande niko jajokopa vaekue chugui kuéra ijepokuaaha ha upéicha rupi ipochy ha ojapo ñande rehe ko'ã mba'e.”
60Mburuvicha guasu ohecha porã upe he'íva ha aipórõ oikuave'ẽ umi Israel guápe py'a guapy ha ha'e kuéra he'i néi.
61Mburuvicha guasu ha imburuvicha kuéra ome'ẽ iñe'ẽ upeichataha, ha Israelgua kuéra osẽ upe oñemohatã haguégui.
62Mburuvicha guasu katu, oguahẽvo yvyty Siónpe ohecha mba'éichapa imbarete ra'e pe Israelgua oñemohatã hague. Osẽ iñe'ẽgui ha ojere oitykapaite pe korapy yvate oĩva ijerére.
63Upéi osẽ oho pya'ete Antióquiape ha ojuhu Filipo oñemomba'e upe táva guasúre. Ondyry hese ha mbaretépe oipe'a chugui.
Who We AreWhat We EelieveWhat We Do
2025 by iamachristian.org,Inc All rights reserved.
