Sabiduría 5 - Biblia Guaraní con Deuterocanónicos

1Upérõ imarangatúva

oñembo'ýne

umi hendive

ojopy vaekue renondépe

ha ndohecha kuaái vaekue

hembiasa asy.

2Oñemondýi ha ipirĩmbáne

ohechávo Mba'éichapa

ha'e oñeha'arõ'ỹhágui,

ivaívagui osẽ.

3Ñembyasy ha jahe'o sorópe,

he'íne ojupe hikuái:

4“Kóva ha'e

ku ñañembohory hague,

ha toryjárõ jareko vaekue.

Ñande tavy ra'e!

Tavy reko ja'e vaekue

hekovére

ha imanóre katu ñemotĩ.

5Mba'éicha piko ha'e

ko'ágã Tupã ra'y,

ha imba'e avei

Tupã oheja vaekue

imarangatúvape guarã?

6Mombyry ete piko

ñaime ra'e añeteguágui,

na ñande resapéi

teko joja rendy,

ha kuarahy nosẽi

ñandéve guarã!

7Jaguata ra'e jaikóvo

teko vai rapére, jahasa

umi yvy ojeiko'ỹha rupi

ha Ñandejára rape

ndajaikuaái!

8Mba'épepa ñande jejapo

iporã ñandéve,

mba'épa ñanohẽ ra'e

ñane mba'e retágui?

9Opa umi mba'e

ohasa kuarahy'ãicha,

marandúicha

ho'áva tesaráipe.

10Ypegua mbayrúicha

yguasu oikytĩva

ikatu'ỹre jajuhu hapykuere

térã mba'e ryjúi

ohejáva y apére;

11ỹrõ guyráicha

árare ovevéva,

ndohejái ojehecha haguã

hapykuere

ipepópe yvytu oinupã

ha turu ñe'ẽ po'ípe oikytĩ

ojapo haperã

ipepo ñembovavápe,

ha ndaipóri mamópa

rehecha oho hague;

12térã hu'y

ojepoíva ojekutu haguãme,

ikuare oñemboty jey

ha ndojekuaái

mamo rupípa ohasa.

13Péicha avei ñande,

jaju riremínte ko yvy ári

jaguéma

ha ndajahejái mba'eve iporãva

ojehecha haguã,

ha ñande reko añanguépe

ñande kusugue.

14Umi iñañáva

rembipota niko

kapi'i pirukue

ogueraháva yvytu,

mba'e ryjúi

oguerovevéva yvytu ratã,

tatatĩcha yvytúre

isarambíva,

mbohupa sapy'áre mandu'áicha

opa reíva.

15Imarangatúva oikove

opa ára guarã,

Ñandejára ohepyme'ẽ chupe,

ha pe Yvatetegua

oñangareko hese.

16Upévare

Ñandejára pógui ohupytýne

jeguaka omimbipáva

iñakãre guarã,

ha ipópe omo'ãta chupe kuéra,

ha ijyvápe

oipe'áta jejopy vaígui.

17Ipochykuépe

Ñandejára oñemo'ãne

tete mo'ãha peguáicha,

ha opa hembiapokue oiporúne,

oinupã haguã

umi hese ija'e'ỹvape.

18Oñemondéne teko jojápe

tete mo'ãha peguáicha,

ha oñemyakã reheguáne

ñembojovake ivã'ỹvape,

19ha pe imarangatuha katu

tete mo'ãha ikatu'ỹva ikua.

20Ohãimbe'éne kyséicha

pe ipochy ojera'ỹva,

ha arapy opu'ãne umi itavývare

ijykére.

21Hu'ýicha ára tiri opoíne

ha ojapíne ojekutu haguãme.

22Ipochy rendýpe amandáu

itáicha ombopororóne,

yguasu opu'ãne

ha ipojáine hese kuéra,

ha umi ysyry ojaho'íne

chupe kuéra.

23Yvytu ne ratãva

opu'ãne hese kuéra,

ha kapi'i pirukuéicha

oguerovevéne chupe kuéra.

Péicha teko aña

yvy tuichakue ohundíne,

ha tembiapo vai

omongúine poguasu kuérape.