Eclesiástico 16 - Biblia Guaraní con Deuterocanónicos

Hembiapo vaíva ñenupã

1Ani reipota heta mitã

ipituáva,

térã revy'a reguerekógui

mitã ñaña.

2Heta ramo jepe,

ani revy'a

nombyajéi ramo

Ñandejárape.

3Ani reha'arõ

oikove pukutaha,

ha reñeñandu porã

heta haguére.

Iporãve peteĩ heko porãva

heta iñañávagui,

ha iporãve remanórõ mitã'ỹre,

rereko rangue heko añáva.

4Oĩrõ peteĩnte jepe

iñakã porãva,

chugui ikatúma oñemuña

peteĩ távape guarã,

tekove ahẽ ñemoñare katu

oñehundipáta.

5Heta mba'e ko'ãichaguáma

che resa tee rupi ahecha,

ha ivaivéva

ko'ãvagui ahendu.

6Iñañáva angaipáre

hendy vaekue tata,

ha hendy vaekue pochy guasu

iñañáva atýrare.

7Ndoiporiahurerekói

hete rusúva yma guare,

hese opu'ã vaekuépe.

8Ndoiporiahurerekói

Lot táva guápe

oñeme'ẽ vaekue teko ky'ápe

ojejapo itereígui.

9Ndoporiahurerekói

yma guare Canaangua

iñangaipáre

ojeroviávape.

10Péicha ojapo avei

umi 600.000 Israel guáre

opu'ã vaekue hese

oikoségui iñakãre.

11Ha peteĩnterõ jepe

upe oikoséva iñakãre,

ndopytái chéne oñenupã'ỹre.

Ñandejára niko

oporoporiahurereko

ha ipochy kuaa avei.

Ha'e oheja rei angaipa

ha ohekuavo ipochy

hembiapo ahẽva ári.

12Oporoporiahurereko

itereiháicha,

upéicha avei ipochy eterei.

Ha'e ome'ẽ peteĩ-teĩme

hembiapokue ojerureháicha.

13Ndohejái iñañáva

ojapo ojaposéva,

ha imarangatúva

ohupyty'ỹre hembipota.

14Chugui nokañýi

tupãmba'e oñeme'ẽva,

ha peteĩ-teĩme

ojehecha kuaáta hembiapokue.

15Ñandejára ombopy'a hatã vaekue

Faraónpe ndoikuaaséi vaekue

chugui mba'eve ohechauka haguã

hembiapokue yvága guýpe.

16Opavave oikuaa

ipy'a poriahurereko,

imba'e resape ha imba'e ypytũ

ha'e omboja'o yvypóra kuérape.

17Ani ere:

“Akañýta Ñandejáragui,

ha amo yvágape piko

máva imandu'áta che rehe?

Hetaite apytépe

avave nda che recha mo'ãi.

Chéko ndaha'éi voi mba'eve

ko yvy tuichaitépe.”

18Ema'ẽ,

yvága ha yvága ru'ã,

yvy ha yvy rugua oryryipa,

ha'e oguahẽvo.

19Umi yvyty ha yvy pyenda

kyhyjégui osusũmba

ha'e oma'ẽvo hese kuéra.

20“Che rehe noma'ẽ mo'ãi

ha ndojepy'apy mo'ãi pe ajapóvare.

21Ajapo ramo ivaíva

avave nda che recha mo'ãi.

Che japúrõ ñemiháme,

ava piko oikuaáta?

22Ajapórõ iporãva,

ava piko omombe'úta

Ñandejárape?

Mba'e piko aha'arõta

ajapo haguére che rembiaporã?”

23Péicha ojepy'a mongeta

umi iñapytu'ũ oiporu'ỹva.

Umi itavy ha okañýva

výro reínte

iñakãme oguereko.

Ñandejára arandu imba'e apópe

24Ehendu che ra'y,

toroheko mbo'e,

ejapysaka che ñe'ẽre:

25Ha'e porãtante añandúva,

ha hekópe amombe'úta

ko aikuaáva.

26Ñandejára he'i haguére,

opa mba'e

oiko iñepyrũha guive,

ojapo guive he'i

mamoite pevépe oguahẽta.

27Omoĩ chupe kuéra

henda ha hembiaporã,

opa árape guarã.

Ha'e kuéra naiñembyahýiri

ha naikane'õi araka'eve,

ndopytu'úi ramo jepe.

28Noñembotái ojuehe

ha araka'eve nosẽi

Ñandejára rapégui.

29Upéi Ñandejára

oma'ẽ yvýre,

ha mba'e porãitágui

omyenyhẽ,

30omyenyhẽ avei

opaichagua oikovévagui,

ha maymáva,

yvýpe opa jeýta.