Eclesiástico 42 - Biblia Guaraní con Deuterocanónicos

Ani retĩ

1Ko'ã mba'égui

neretĩ vaerãi,

ha ani reheja rejapo'ỹre

rekyhyjévo upe oje'etavagui.

2Ani retĩ upe Yvatetegua

rembiapoukapy

ha hembipotágui,

térã repoi haguére

hembiapo vai'ỹvagui,

3térã reñemboja'o porãrõ

nde guata irũ ndive

térã ne ñemuha irũ ndive

pe viru ojeporúva,

térã remboja'o ramo hekópe

ne irũ ndive

peteĩ mba'e rejakue,

4térã reiporu ramo ñemuháme

mba'e pohýi ra'ãha

ijapu'ỹva,

5térã reñemboviruvégui

tepy ñemboguejýpe,

reñemúvo,

térã reheko mbo'e py'ỹigui

ne mitã nguérape,

térã tembiguái ate'ỹme

rejokapa haguére tukumbópe,

6térã rerekógui

koty ñembotypýpe

kuña nemyakã ratĩ vaekuépe,

térã remboty hatã ramo

nde viru ryru

oñepo'ẽ ramo pype,

7térã reipapágui

viru reñongatúva

ha remoĩgui kuatiáre

pe viru rehupytýva

ha upe nde reme'ẽva,

8térã reñemoñe'ẽgui

itavýva

ha mba'eve oikuaa'ỹvape,

térã itujávape

oikógui kuña vai ndive.

Péicharõ rehechaukáta

ne akã guapyha,

ha opa rupi rejehayhúta.

Tajýra kuéra

9Tajýra hína

jepy'apyrãnte voi,

hese iñangekóigui

itúva ndokevéi:

imitãme

nomendái ramo guarã,

ha omendáva ramo

ojeheja ramo guarã.

10Ikuñataĩme

oñemomarã ramo guarã,

ha itúva rógape voi

opyta hye guasu,

omenda rire

oporomyakã ratĩrõ guarã,

ha oikóvo iména ndive

naimembýivarõ guarã.

11Nde rajy rova atãme

ereko sambyky,

cháke nde apo'íne

umi nde rayhu'ỹva,

opavave jurúpente oikóne,

ha oime raẽva oñembohorýne

nde rehe.

12Ani rema'ẽ asy

kuña porãre,

ha kuña ndive

ani reñeme'ẽ eterei.

13Aógui osẽháicha ao raso,

kuñágui osẽ kuña añangue.

14Iporãve ména pochy

kuña rorýgui,

kuña herakuã vaíva

hóga guápe omotĩ.

Ñandejára rembiapokue

15Che mandu'áta

Ñandejára rembiapokuére,

pe ahecha vaekue amombe'úta.

Ñandejára ñe'ẽ rupi

ojejapo opa mba'e,

ha hembiapokue ojapo

ha'e oipotáva.

16Kuarahy iñapysẽvo

opa rupi omimbi,

Ñandejára mimbipágui

henyhẽ hembiapokue.

17Hembijokuái

marangatu kuéra jepe

ndaikatúi oipapávo

opa imba'e rechapyrã.

18Ha'e ojepovyvy

yguasu ryepýpe

ha yvypóra py'apýpe avei,

mba'eve nokañýi chugui,

upe Yvatetegua niko

oikuaa opa mba'e,

árare oma'ẽvo oikuaa

upe ojehútava.

19Omombe'u upe oiko vaekue

ha upe ojehútava,

ha ojuhukuaa

mba'e kañy rapykuere.

20Nokañýi chugui

mba'eveichagua apytu'ũ reñói

ha ñe'ẽ ñemi jepe oikuaapa.

21Iñarandu rupi

ko'ã mba'e omohendapa,

ha'e oikógui

opa mba'e mboyve,

ndaikatúi okakuaávo

térã oñemomichĩvévo,

ha noikotevẽi imbo'eharãre.

22Iporãitéma niko

opa ne rembiapokue

ha peteĩ tata pirirínte

upe jahecháva!

23Opa mba'e oikove

ha opyta opa árape guarã,

ha iñe'ẽ rendu

opa ojapóvape.

24Opa mba'e oikoe ojuehegui

ha noĩ reíri mba'eve.

25Peteĩ ambuégui iporãve,

ha máva piko ikane'õta

oma'ẽvo hese kuéra?