Eclesiastés 11 - Biblia Guaraní con Deuterocanónicos

1Ýpe eity ne rembi'u;

aremi rire rejuhúta.

2Emboja'o nde rapichápe rerekóva

ikatu háicha,

ndereikuaái niko mba'e ivaívapa

ikatúne ou ko tetã ári.

3Arai iñanambusu ramo

ama ho'a yvy ári.

To'a yvyra ho'ahápe,

yvatévo térã yvývo gotyo,

upe ho'a haguépe

upepete opytáne.

4Oma'ẽva yvytúre

noñemitỹi,

ha oma'ẽva araíre

nomono'õi.

5Pe ndereikuaaiháicha mamópa oho yvytu,Sal 139.13-16. ha mba'éichapa oiko ypy mitã isy ryépe, upéicha avei ndereikuaái mba'épa ojapo Tupã, opa mba'e apoharéva.

6Eñemitỹ pyharevekue ha ka'arukue eñemitỹ avei, ndojekuaáiko araka'etépa osẽ porãta hína, pe oñeñotỹ raẽ vaekuépa térãpa pe upe riregua, ỹrõ katupa mokõivéva osẽ porãta.

7Iporã pe ára jekuaa, ha iporã ojehecha kuarahy;

8ha ojeikove pukúta ramo jepe ha ojevy'áta umi mba'éreve, tekotevẽ ojekuaa pytũ avei ipuku vaerãha, ha opaite mba'e oúva tenonderãvévo tavy reko poru reiha.

Ñemoñe'ẽ mitã rusúpe

9Evy'áke, nde mitã rusu, ko'ágã ne resãiva; evy'a iporãvagui, ko'ágã ikatúva. Ejapo nde py'a oñandúva ha opa mba'e rehecháva, ne mandu'ánteke Tupã omba'e jerure vaerãha rejapo vaekuére.

10Eipe'a nde jehegui jepy'apy ha mba'embyasy, iporãve ramo jepe mitãrusu rekove, tavy reko poru reínte avei.