Eclesiástico 24 - Biblia Guaraní con Deuterocanónicos

Arandu rerohory

1Arandu ojererohory ijupe

ha oñe'ẽ kyhyje'ỹre

hetãgua apytépe.

2Upe yvatetegua

ñembyatyhápe

ohenduka iñe'ẽ,

ipokatúva renondépe

oñe'ẽ porã ijehe ha he'i:

3“Che asẽ vaekue

upe yvatetegua jurúgui,

ha añuãva ko yvy

tatatĩnáicha.

4Amoĩ che rekoha

ijyvatehápe,

che guapyha katu,

arai oñembo'ýva ári.

5Che añoite

arapy tuichakue rupi

aguata,

ha tugua pypuku rupi

ahasa.

6Che po guýpe oĩ

yguasu ha yvy tuichakue,

opa tetã ha opa ojeikoha.

7Ha opa umi rupi aheka

apytu'u ha ajogapo

haguã.”

8Upérõ opa mba'e Apohare,

upe che Apohare,

che mombytu'u

ha he'i chéve:

“Ejogapo Jacóbpe,

eike Israel retãme”.

9Che apo iñepyrũháme,

mba'eve ojapo mboyve,

ha ndapa mo'ãi araka'eve.

10Che ha'e hembijokuái

Hekoha marangatúpe,

ha añemohatã Siónpe.

11Che mombytu'u

itáva poravo pyrépe,

ha Jerusalénpe oĩ

che pokatu.

12Añembohapo vaekue

tetãgua herakuã porãva

apytépe,

Ñandejára oiporavo vaekue

imba'erã.

13Akakuaa vaekue cedro

Líbano peguáicha,

ha kuri'y yvyty Hermón peguáicha.

14Pindóicha En-Gadípe

apu'ã,

rrósa potýicha Jericópe,

olívo rovyũicha ñu mbytépe

ha yvyra pukúicha

y rembe'ýpe.

15Opaichagua yvoty

ha ñana rogue

hyakuã asývaicha

amohyakuã porã opa rupi,

ha insiénso ratatĩcha

tupaópe.

16Aipyso che rakã

yvyra poguasúicha,

hakã porãme

oporomo'ã asýva.

17Parral rakãicha

che roky kyrỹi,

che poty ha che'a

iporã ha heta.

19Peju che rendápe

peẽ che rayhúva,

ha pe'u pe yvágui

pene ryguãtã meve.

20Che kuaávape guarã

che re'ẽve eíragui,

ha che rerekóva

oguereko eirete.

21Che rehe okarúva

ho'usevéta,

ha hoy'úva che hegui

hoy'usevéta.

22Che rendúva

noñemotĩ mo'ãi,

ha omba'apóva chéve guarã

nahembiapo vai mo'ãi.

23Opa ko'ã mba'e oĩ

Tupã yvatetegua

Rembiapoukapýpe

ohai vaekue Moisés,

ha opytáva Jacob pegua

ñembyatyhápe guarã,

24Peheka pene mbarete

Ñandejárape,

pejoaju mante hese,

Ha'e pene mombarete haguã.

Ñandejára ipu'akapáva,

ha'eñoite Tupã,

Ha'e'ỹrõ, ndaipóri

oporope'áva jejopýgui.

25Ko tembiapoukapy

henyhẽ arandúgui,

ojogua ysyry Pisónpe

térã ysyry Tígrispe

ára hakúpe henyhẽmbáva.

26Akã porãgui

henyhẽ chovi,

Éufrates ysyrýicha

térã Jordán ysyrýicha

okakuaave jave.

27Mbo'epýgui henyhẽte

ysyry Níloicha,

térã Guihón ysyrýicha

okakuaa jave.

28Upe tenondeguáva

ndoikuaapái gueteri,

ha pe tapykue peguáva

vai-vai jepe ne'ĩra oikuaa.

29Hemiandu niko

ipyrusuve yguasúgui,

ha hemimbo'e ipypukuve

tugua pypukúgui.

30Che katu peteĩ y rapéicha

osẽva ysyrýgui,

peteĩ y rerahaháicha

ohóva yvotytýpe.

31Ha'e vaekue:

“Amohe'õta che yvotyty

ha ambohykuéta che ñu”.

Che y rapégui oiko ysyry,

ha che ysyrýgui, yguasu.

32Kuarahy resẽicha

amyendýta che remimbo'e,

ha ohesapéta

mombyry eterei.

33Che remimbo'e ahekuavóta

marandúicha,

ha ahejáta ñemoñare kuéra

oúvape guarã.

34Pema'ẽ

namba'apói hague

chéve guarãnte,

amba'apo hague uvei

opavave

arandu ohekávape guarã.