1 Macabeos 2 - Biblia Guaraní con Deuterocanónicos

Matatías oñepyrũ ojepytaso

1Umi ára umívape osẽ Matatías, Juan ra'y ha Simeón remiarirõ. Ha'e pa'i, Joiarib ñemoñare.

13Maerãpa jaikoveseve jahávo.

14Ha Matatías ha ita'ýra kuéra omondoro ijao, omonde ao havaráva ha oñemoĩ ojahe'o joa hikuái.

15Oguahẽ ramo Modínpe mburuvicha guasu rembiguái kuéra ojopývo umi upépe guápe oikuave'ẽ haguã mymba juka,

16heta Israelgua oñemoĩ hendive kuéra. Matatías ha ita'ýra kuéra katu ndojehe'ái hese kuéra.

17Aipo ramo, umi mburuvicha guasu rembiguái he'i chupe kuéra: “Nde niko peteĩ yvypóra ojeroviaha maymáva ko táva kóvape, ha oĩ ne ndive nde ra'y kuéra ha opavave nde rogagua.

18Eñemboja nde raẽ ha ejapo pe mburuvicha guasu he'íva opa tetãme ojejapoháicha, ha upéicha avei Judeagua ha umi hemby vaekue Jerusalénpe. Upéicha ramo, nde ha nde ra'y kuéra pepyta porãta mburuvicha guasu ndive ha ha'e ome'ẽkáta peẽme óro ha pláta ha opaichagua jopói.”

19Matatías katu he'i hatã chupe kuéra: “Jepe ra'e opa tetã oĩva mburuvicha guasu poguýpe iñe'ẽ rendu chupe ombotapykue itúva kuéra ypykue rembiroviakue ha ojapo ha'e he'íva,

20che, che ra'y kuéra ha che pehẽngue maymáva, rombojeroviáta akói pe ñe'ẽ ñome'ẽ ojapo vaekue Tupã ore ru kuéra ypy kuerakue ndive.

21Anímo Tupã oheja rombotapykue hembiapoukapy ha opa ore reko jeroviaha!

22Ore ndorojapo mo'ãi pe mburuvicha guasu he'íva ha noroñemboyke mo'ãi ore asúvo térã ore akatúavo ore reko jeroviahágui.”

23Matatías oñe'ẽmbávo, oñemotenonde peteĩ Israelgua omymba juka haguã pe altar ári, Modínpe omopu'ã vaekue umi mombyrygua, mburuvicha guasu oipotaháicha.

24Upépe, Matatías ipochyeterei, oryrýi osusũ pochýgui, ha opu'ã oñakã'o pe altar ári voi upe Israel guápe,

25ha ojuka avei pe mburuvicha guasu rembiguáipe, ojopýva Israelgua kuérape oikuave'ẽ haguã mymbajuka, ha omyangu'ipa upe altar.

26Matatías ohechauka mba'eichaite pevépa hakate'ỹ Tupã rembiapoukapýre, ha ojapo Finees ojapo haguéicha Zimrí rehe, Salú ra'y.

29Umíva umi árape, heta umi oikoséva teko potĩme, Tupã rembiapoukapy ohechaukaháicha, ohopa oiko umi yvy ojeiko'ỹháme rupi

30ta'ýra, hembireko ha hymba kuéra ndive, ndaikatu véimagui ogueropu'aka upe ojeikoveháicha.

31Tembiguái kuérape ha umi ñorãirõhárape oguerekóva David táva guasu Jerusalénpe oñemombe'u, peteĩ atýra tekove ohenduse'ỹva mburuvicha guasu ñe'ẽ, oimeha oho okañývo yvy ojeiko'ỹha rupi,

32ha heta ñorãirõhára pya'e oho hapykuéri kuéra. Ohupyty chupe kuéra, oñemohatã henondépe kuéra ha ojeity hese kuéra pytu'uha ára jave.

35Upepete voi, umi ñorãirõhára ojeity hese kuéra.

36Umi Israelgua katu nde'íri chupe kuéra mba'eve, ndopoíri ita, noñemohatãi umi itakuápe oñorãirõ haguãicha,

37ha he'i hikuái: “Ñamano teko potĩme! Yvága ha yva ohecha peẽ ore jukaha hekope'ỹ.”

38Ha upéicha, umi ñorãirõhára ojeity hese kuéra pytu'uha árape. Ha umi Israelgua, hembireko, ita'ýra ha hymba kuéra reheve omanomba. Oĩ ra'e hikuái 1.000 rupi.

39Oikuaa vove, Matatías ha hesegua kuéra ojahe'o heta hikuái hese kuéra.

40Ha he'i hikuái ojupe: “Opavave ñande jajapo ramo umi ñane pehẽnguéicha, ha ndajajepytasói umi Tupãre ojahéiva renondépe, pya'ete ñande pe'áne ko yvy árigui.”

41Ha upe árape voi oñemoĩ hikuái peteĩ ñe'ẽme: “Oimérõ ojeitýva ñande rehe pytu'uha árape, ñañorãirõne hendive kuéra, ha péicha nañamanombái chéne, omanomba haguéicha umi ñane pehẽngue pe oñemo'ã haguépe.”

42Aipo ramo, ojoaju hese kuéra peteĩ atýra hasideo, Israelgua kuéra ipy'a guasúva ha heko jeroviaháva, hakate'ỹva Tupã Rembiapoukapýre.

43Upéicha avei, opa umi oñemo'ãséva umi mba'e vaietágui; ha upéicha hetave hikuái.

44Ojapo hikuái peteĩ ñorãirõhára aty ne mbaretéva ha ojeity pochy guasúpe umi mombyry guáre ha umi Israelgua ko'ãvape oipytyvõvare. Umi hemby vaekue, omano'ỹva, ohopa hikuái tetã mombyry rupi.

45Matatías ha umi hendive oĩva, oho hikuái tetã tuichakue oitypa umi altar ahẽ tupã gua'u pegua,

46ha oapi'o mbaretépe umi mitã ojeapi'o'ỹ vaekue ojuhúva guivépe.

47Omuña hikuái umi tekove jejapo, hese kuéra ija'e'ỹvape, ha opa mba'e ojapóvape osẽ porãmba.

48Ha upéicha oguenohẽ jey Tupã Rembiapoukapy umi mombyrygua poguýgui ha noñeme'ẽi hikuái umi teko aña, Tupã rerovia'ỹhárape.

49Matatíaspe katu oguahẽ hi'ára, ha omanonguévo he'i ta'ýra kuérape:

“Tova atã ha jeja'o ky'águi

ñane renyhẽ;

jaiko ñaína mba'e vaieta

ha ñenupã vai guasu árape.

50Ha peẽke, che ra'y kuéra,

pene rakate'ỹ tembiapoukapýre,

ha peme'ẽ pende rekove

pe ñe'ẽ ñome'ẽ ojapo vaekuére

ñande ru kuéra ypykue Tupã ndive.

51Pene mandu'a umi ha'e kuéra

ojapo vaekuére hi'árape,

pene rerakuã porãne opa rupi

ha ojejeroviáne pende rehe.

52Tupã oheko ra'ã vaekue Abrahámpe;

ojuhu heko jeroviaha porã,

ha oguereko chupe heko jojávarõ.

53José katu, teko asyeta apytépe

omoañete Tupã rembiapoukapy

ha oiko poguasu ramo Egíptope.

54Finees, ñande ru ypykue,

heko karẽ'ỹ rupi ohupyty

heko marangaturã opa árape guarã.

55Josuégui oiko mbojovakehára

omoañete kuaáre tembiapoukapy.

56Caleb, he'i haguére añetegua

opa tavagua renondépe,

ohupyty yvy oisãmbyhy vaerã.

57David, imba'e porã haguére,

oiko mburuvicha guasúrõ,

opa árape guarã.

58Elías hakate'ỹ rupi

Tupã rembiapoukapýre,

ojereraha yvágape.

59Ananías, Azarías ha Misael

heko jeroviaha porã vaekue,

ha upévare ha'e oñemboyke tatágui.

60Daniel, heko potĩ haguére

ndo'ái jaguarete jurúpe.

61Ha upéicha ojoapykuéri,

ojeroviáva guive Tupã rehe

araka'eve naikangýi.

62Ani pekyhyje heko añávagui,

hekove kuéra opáne yty apýpe,

okarúne hese kuéra yso.

63Oimérõ opu'ã ko árape,

ko'ẽrõ ho'a vaerã;

oiko jey yvytĩmbo ramo,

ha ñuhã ombosako'íva

mba'evépe opa vaerã.

64Aníke pemboguapy

pende jehe ivaíva,

Tupã rembiapoukapýre

pene rakate'ỹ haguã;

ipype año pejuhúta

pene mbovy'a vaerã.

65Péina pépe opyta Simón,

pene pehẽngue heko kuaáva,

pehendu chupe opa ára,

pende rúichata ha'e.

66Pereko Judas Macabéope,

mitãrusu imbaretéva,

ha'e omohenondéta

pene ñorãirõhára aty,

ojepytaso haguã

umi mombyrygua rovái

ñane retãgua rehehápe.

67Pembyaty pene ndive

opa iñe'ẽ rendúva

Tupã rembiapouykapýpe,

ha pembyekovia ñane retã guápe

opa heko asykueta.

68Pembojevy umi mombyry guápe

umi pende rehe ojapo vaekue,

ha pene mandu'a pembyaje haguã

Tupã rembiapoukapy.”

69Ohovasa chupe kuéra upéi, ha ojehekýi túva kuéra ypykue rekávo.

70Áño 146 ramo omano ha oñotỹ chupe hikuái ijypy kuerakue oñeñotỹ haguépe, Modínpe. Israel tuichakue ojejahe'o joa hese.