Eclesiástico 40 - Biblia Guaraní con Deuterocanónicos

Yvypóra rembiasa asy

1Heta tembiapo

ojejapo yvypórape guarã,

mba'e pohýi oĩ

yvypóra ati'y ári,

ára osẽ hague guive

isy ryégui,

oho jey peve opavave sy

yvýpe:

2angekói, kyhyje

ha mano ra'arõ

oipy'apy chupe.

3Poguasu iguapyha yvatéva

ha mboriahu tanimbukuápe

oñenóva,

4umi isyváre jeguaka

ogueraháva ha ijao pytãva

ha umi ao vosakuépe

oñemondéva,

peteĩcha chupe kuéra

oha'arõ

pochy vai, mba'e pota,

py'a perere, angekói,

kyhyje manógui,

py'aro ha ñorãirõ.

5Opytu'u ramo hupápe,

ikepegua

ombopy'a tyai chupe.

6Oñeha'ã ramo jepe,

sa'i opytu'u,

ha oke aja

ipáype ramo guáicha,

ombopy'a tarova chupe

ikerasy,

ñorãirõhágui

okañýva ramo guáicha.

7Iko'ẽvo ára opáy

ha ojera ohechávo

okyhyje rei hague.

8Kóicha ojehu

mymba ha yvypórape,

ha heko añávape katu

hetaiteve:

9mano, jejuka,

ñorãirõ, kyse puku,

jeiko asy, ñembyahýi,

vy'a'ỹ ha tukumbo.

10Heko añávape guarã

ojejapo ko'ã mba'e,

ha umívape guarã oiko vaekue

upe ama guasu

ojaho'ipa vaekue yvy,

11Opa mba'e osẽva yvýgui,

yvýpe opa jey,

ha yguasúgui oúva,

yguasúpe oho jey.

12Opáta

pokarẽ ha teko joja'ỹ,

pe añetegua katu

opa árape guarã.

13Heko joja'ỹva viru

ysyry sununúicha opa reíta,

ára sunúgui

oikoháicha ára pochy.

14Okakuaa ramo

oguerotyryry ita guasu,

ha upéi sapy'aitépe opa rei.

15Heko añáva ndahoky mo'ãi,

tekove ahẽ

oñembohapo ita pa'ũme.

16Piri heñóiva

oimeraẽ ýpe

térã ysyry rembe'ýpe,

ipiru ha ojehapo'o raẽta

oimeraẽ ñanágui.

17Py'a poriahurereko katu

ndopái araka'eve,

ha tupãmba'e,

opa árape guarã.

Iporãvéva opa mba'égui

18He'ẽ upe ijeheguíva

ha omba'apóva rekove,

ha mokõivégui he'ẽve

pláta yvyguy oguenohẽva

rekove.

19Táva ñemopu'ã

ha ta'ýra kuéra

oporomoherakuã porã,

ha mokõivégui ojehayhuve

kuña joheipyre.

20Kaguy ha mba'epu

ñane mbopy'a rory,

ha mokõivégui ñane mbovy'ave

kuña rayhu.

21Mimby ha arpapu

omoirũ porã pe purahéi,

ha mokõivégui iporãve

ñe'ẽ he'ẽ asýva.

22Kuña porã ha ijukýva

ojehechase,

ha mokõivégui iporãve

ñu hovyũmbáva.

23Oñoirũ ha ojokuaáva

oñopytyvõ tekotevẽ jave,

ko'yteve umívagui

tembireko ha ména.

24Ñane pehẽngue

ha ñande rayhúva

ou porã ho'a vai jave,

ha mokõivégui ou porãve

tupãmba'e.

25óro ha pláta

oporomopyrũ hatã,

ha mokõivégui iporãve

oñemoñe'ẽ porãva.

26Viru heta ha pokatu

oporombopy'a rory,

ha mokõivégui iporãve

Ñandejára ñembyaje.

Ñandejára ñembyaje reheve

jarekopáma,

nañaikotevẽ véima mba'eve.

27Ñandejára ñembyaje,

yvotyty ipoty hetáva,

upépe javy'a iterei.

28Che ra'y,

ani rejerure tupãmba'e,

iporãve remano,

rejerure rangue.

29Osãingóva hapicha mesáre

ndaikatúi ja'e oikoveha,

tembi'u ñane mba'e'ỹvape

ñamongy'a ñande juru,

iñarandu ha ojeheko mbo'éva

ojererekóta upévagui.

30Ijuru akuáva ojerurénte,

pe ho'úva katu

ombopy'a hái chupe.