Eclesiástico 47 - Biblia Guaraní con Deuterocanónicos

Natán ha David

1Upe rire ou Natán

omomarandu vaekue

Davídpe guarã.

2Pe ikyrakue mymbajukápe*f**

oñemboykévaicha,

péicha vaekue David

Israelgua apytépe.

3León ndive oñemboharái

kavara ra'y ndive ramo guáicha

ha jaguarete ndive

ovecha ra'y ndive ramo guáicha

4Imitãme ojuka

kuimba'e hete rusúvape,

oipe'ávo

hetã guára ñemotĩ,

opoírõ ita

ha yvýre oity Goliátpe.

5Ohenói upe Yvatete guápe

omombaretéva chupe ipo akatu

ohundi haguã

kuimba'e mbaretetépe

ha hetã guápe

omokyre'ỹ jey.

6Upévare 10.000 rekovia

ojererohory chupe,

ha Ñandejára rovasápe

oñemomorã,

oñekuave'ẽvo chupe

akã jeguaka omimbipáva.

7Ha'e oipete yvýre

Israel rayhu'ỹha ijereregua,

ohundi umi filistéo

ija'e'ỹha,

ha omopẽ ete ipokatu.

8Opa mba'e

chupe osẽ porãvare

oaguijeme'ẽ

upe Yvatete guápe,

heko mimbipa

ogueropurahéivo.

Ipy'aite guive ojapo purahéi

ohechauka haguã imborayhu

Ijapoharépe.

9Omoĩ umi altar renondépe

opurahéi vaerã

ohenduka haguã purahéi

he'ẽ asýva.

10Arete kuéra ombojegua porã

ojapoukávo hekoitépe

tupao pegua tembiapo,

he'ívo ojererohory haguã

Ñandejára réra marangatu,

ha hyapu haguã ko'ẽtĩ guive

pe tupao.

11Ñandejára oheja rei

chupe iñangaipa

ha omyatã ipokatu

opa árape guarã,

omoingo chupe

mburuvicha guasúrõ

ha omohenda

Israélpe iguapyha.

Salomón

12Hembiapo porãnguére

hendaguépe oisãmbyhy

peteĩ ita'ýra iñarandúva

oiko vaekue py'a guapýpe.

13Salomón oisãmbyhy

py'a guapýpe,

ha Tupã ome'ẽ chupe

hetã tuichakue, py'a guapy,

ojapo haguã chupe hogarã

ha omopu'ã haguã tupao

opa árape guarãva.

14Ne arandu ete vaekue piko

ne mitã rusu ramo guare!

Ysyry guasúicha

ne renyhẽ vaekue arandúgui!

15Ne rerakuã ojaho'ipa vaekue

ko yvy,

remyenyhẽ vaekue ñe'ẽnga

rypy'ũgui.

16Ne rerakuã vaekue tetã

imombyryvévape,

ha rejehayhu vaekue

reikógui vy'a pa'ũme.

17Nde purahéi, ne remiandu,

ne ñe'ẽnga ha umi erévare

oñemba'e porandúrõ ndéve,

tetã nguéra

opytáva ijurujái.

18Tupã Israel Jára rérape

rembyaty vaekue óro

fiérroicha

ha pláta plómoicha,

19Opáichavo reheja

kuña nguéra nde rehe ipu'aka

ha ha'e kuéra

nde retére oñembojára.

20Remongy'a nde réra

ha remomarã ne ñemoñare,

reitývo jeharu

nde ra'y kuérare,

ha jejahéi

nde reko tarovakuére.

21Upéicha ne retã

oñemboja'o,

ha Efraíngui oiko

tetã itĩ pu'ãva.

22Ñandejára katu ndopoíri

ipy'a poriahurerekógui,

nopyrũi iñe'ẽnguére

ha nohundi mo'ãi David,

chupe ohayhu vaekue

ha ha'e oiporavo vaekue,

ñemoñare.

Upévare ha'e ome'ẽ Jacóbpe

peteĩ hembyremi

ha Davídpe peteĩ hapokuemi.

Roboam ha Jeroboam

23Salomón opytu'u

itúva kuéra ndive

ha oheja hapykuerépe

peteĩ iñemoñaréva,

Roboam, upe itarovavéva

hetãgua kuéra apytépe,

peteĩ iñakãnéva,

omopu'ãva hetã guápe ijehe.

Opu'ã peteĩ, —aníke

hérante jepe oñemombe'u—

hembiapo vai vaekue

ha Israélpe ojapouka iváiva.

Ha'e rupi oñehundi Efraín

24ha tembiguáirõ

tetã mombyrýpe ojereraha.

25Opaichagua ivaíva

ára ko'ẽre ojapove ohóvo

ou peve hi'ári kuéra ñenupã.