Eclesiástico 39 - Biblia Guaraní con Deuterocanónicos

Kuatia haiha

1Ndaupeichaguái

umi oñeme'ẽmbaitéva

ojepy'a mongetávo

upe Yvatetegua

rembiapoukapýre,

oipyguara umi yma guare

arandukuépe

ha maranduhára*f** ñe'ẽnguére

oñamindu'u.

2Karai kuéra herakuãva

ñe'ẽngue oñongatu

ha umi ñembojoja hasyvéva

oñeha'ã ohesa'ỹijo.

3Oheka mba'épa he'ise

umi ñe'ẽnga hypy'ũva,

ha hasýva ijekuaa.

4Poguasu kuéra apyte rupi

omyesakã imba'e kuaa,

mburuvicha kuérape ojechauka,

oho tetã ambuére,

ivaíva ha iporãva oikuaa

yvypóra ndive oikóvo.

5Opu'ã ko'ẽ mboyve

Ijára ha Ijapoharépe

ohekávo,

upe Yvatete guápe oñembo'e

ha ojerure

ojeheja rei haguã chupe

iñangaipa.

6Ñandejára oipotárõ

henyhẽta arandúgui,

amáicha oñohẽta

ijurúgui arandu,

ha ñembo'épe omboaguijéta

Ñandejárape.

7Ñandejára

chupe oisãmbyhýta

oñemoñe'ẽ haguã hekópe,

ha ha'e oñamindu'úta

imba'e ñemíre.

8Hemimbo'épe

ohechaukáta imba'e kuaa

ha Ñandejára rembiapoukapy

ha'éta ijeroviaha.

9Heta oĩ oguerohorýtava

iñakã porã,

ha ndopyta mo'ãi tesaráipe,

héra ojererohorýta opa ára.

10Tetã nguéra rupi

oñeñe'ẽta iñarandúre,

ñembyaty guasúpe

ojererohorýta imba'e porã.

11Oikove aja

herakuã porãvéta

heta itereígui,

ha omanóvo

upéva iporãtama chupe.

Tojererohory opa mba'e Apohare

12Heta mba'e gueteri areko

ha'e vaerã,

che renyhẽ jasy pyahúicha.

13Che rendumi,

che ra'y marangatu,

ha pekakuaa rrósa potýicha

y rembe'ýpe,

14insiénsoicha

pene ryakuã asy,

pende poty lirio morotĩcha,

pepurahéi oñondivepa,

perohory Ñandejárape

hembiapokuére.

15Héra pemomba'e guasu,

pembyaguije chupe perohorývo

purahéi ha árpa púpe,

pejévo péicha:

16Iporãite piko

opa Ñandejára rembiapokue!

Opa ha'e he'íva

oiko hi'ára itépe.

Natekotevẽi ja'e:

“Kóva piko mba'e?

Kóva piko maerã?”

Opa mba'e niko hi'árape

ojekuaáta.

17Ha'e he'ívo

y kuéra oñembyaty,

ha'e oñe'ẽvo

oiko y guasu ryru.

18Ha'e oñe'ẽvo

oiko ha'e oipotáva,

ha ndaipóri ojapo'ỹva

upe ojapo vaerã.

19Ha'e ohecha

opa mba'e yvypóra ojapóva,

mba'evete nokañýi chugui.

20Ha'e ohecha opa mba'e

peteĩ ijapýgui ambuépe,

ha ndaipóri mba'eve

ha'e ohecha ramóva.

21Natekotevẽi ja'e:

“Kóva piko mba'e?

Kóva piko maerã?”

Opa mba'e niko oguereko

maerãpa ojejapo ra'e.

22Hovasakue osẽmba

ysyrýicha hembe'ýgui,

ha peteĩ ama guasúicha

ojaho'ipa ko yvy.

23Upéicha avei

tetã nguérape ome'ẽta

ipochykue imba'erã,

ha'e ojapo haguéicha

y porãgui

25Umi mba'e iporãva

iñepyrũha guive

ojejapo vaekue

imarangatúvape guarã,

ha ivaíva katu

heko añávape guarã.

26Umi tekotevẽ kuete

yvypóra oiko haguã hína

y, tata, fiérro, juky,

trígo, kamby, eíra,

parral, ñandyry ha ao.

27Ko'ã mba'e iporã

imarangatúvape,

heko añáva katu

ojapo ko'ãvagui ivaíva.

28Oĩ yvytu

ha'e ojapo vaekue ñenupãrã

ha ipochýrõ hína

ombopeju hatã,

ha'e kuéra oporohundisérõ

opoipaite imbaretekuégui

ha péicha ombopochy jera

Ijapoharépe.

29Tata, amandáu, ñembyahýi

ha mba'asy asãi

ojejapo vaekue ñenupãrã,

30Tymba ñarõ rãi nguéra,

mbói, alakran ha kyse puku,

heko añáva oñehundi haguã.

31Ko'ã mba'e ovy'a ojapo ramo

ha'e he'íva.

Yvy ári oĩ hikuái

iñe'ẽ ra'arõvo.

Ha'e he'írõ, ojapo kyre'ỹ

ongururu'ỹre.

32Ko'ã mba'e

yma guive aikuaa porã,

upévare añamindu'u

ha kuatiáre amoĩ.

33Ñandejára rembiapokue

iporãmbaite,

Hi'árape ha'e omoĩ

upe tekotevẽva.

34Natekotevẽi ja'e:

“Upéva ivaive amóvagui.”

Opa mba'e niko iporã

hi'árape.

35Ha ko'ágã

pende py'aite guive,

pepurahéi perohorývo

Ñandejára réra.