Eclesiástico 44 - Biblia Guaraní con Deuterocanónicos

Israelgua ypykue rerohory

1Jarohory ojoapykuéri

umi ñande ypykue

ijoheipyrévape,

2upe Yvatetegua

omyerakuã guasu ete vaekue

ymaite guive,

3umi tetã sãmbyhyhára,

mburuvicha guasu ñemoñare,

tapicha herakuãva

ipokatúre,

isỹiva ñemoñe'ẽme

ha oporomomarandúva

mba'e ojehútavare,

4omyenondéva hendaitépe

hetã nguéra,

tembiapoukapy hekopegua

ome'ẽvo,

oñe'ẽ porãitéva

ha ohaíva ñe'ẽnga

arandu rypy'ũgui henyhẽva.

5Salmo ipu porãva apoha,

ha ñe'ẽ poty re'ẽ asy

mosãha.

6Mba'eta rerekua ha poguasu

py'a guapýpe oikóva

hóga pýpe.

7Opa umíva

ojererohory vaekue

ijavegua apytépe

ha herakuã porã vaekue

upérõ.

8Oĩ ha'e kuérava

oheja vaekue hapykuerépe

terakuã porã

ha hese kuéra

oñeñe'ẽ porã,

9ha oĩ ndopytáiva

chugui kuéra mandu'a,

opa rei

oiko'ỹ ramo guaréicha,

ohasa

noguahẽi ramo guaréicha

ko yvy ári, ha upéicha

ojehu iñemoñarépe.

10Opáichavo ko'ãva avei

tapicha joheipyre vaekue,

ha hembiapo porãngue

ndopyta mo'ãi tesaráipe.

11Imba'eta

opa árape guarãva

ha'e umi ñemoñare

ha'e kuéra ohejáva.

12Iñe'ẽ ome'ẽ vaekuére

nopyrũi

ha upéicha avei iñemoñare.

13Opa ára oĩta

hese kuéra mandu'a,

ha imba'e porãngue

tesaráipe ndopyta mo'ãi.

14Umi hetekue opytu'úma,

ha'e kuéra katu herakuãta

opa árape guarã.

15Iñarandukue omombe'úta

tetã nguéra,

ha imba'e porã

umi aty guasuha rupi

ojererohorýta.

Henoc ha Noé

16Henoc oguata

Ñandejára rape rupi

ha ojereraha yvágape,

ha oheja techaukarã

mba'éichapa

jahayhu vaerã Ñandejárape.

17Noé, kuimba'e marangatu,

ojejuhu ijoheipyre,

ha hese ae nomanói opavave

oñehundírõ guare opa mba'e.

Ha'e rupi oikove vaekue

peteĩ hembyremi,

ha iñe'ẽ me'ẽ rupi

opa pe ama guasu

ojaho'ipa vaekue yvy.

18Ñe'ẽ me'ẽ

opa árape guarãva

oiko vaekue hendive,

noñehundi véima haguã

ama guasu rupi yvypóra.

Abraham, Isaac ha Jacob

19Abraham,

heta tetã ru ypykue,

terakuã guasúpe

ndaijojahái vaekue.

20Ojapo vaekue

upe Yvatetegua rembiapoukapy

ha hendive Ñandejára ojapo

ñe'ẽ me'ẽ.

Hetére omoĩ

ñe'ẽ me'ẽ rechaukaha

ha ojepy'a ra'ã ramo

nopyrũi vaekue iñe'ẽnguére.

21Upévare Ñandejára

ome'ẽ chupe iñe'ẽ ijehe voi,

iñemoñare rupi

ojehovasataha tetã nguéra,

ombohetataha chupe

yvy arigua yvyku'i ra'ỹicha

ha mbyjaita yvágape guáicha,

ome'ẽvo chupe kuéra imba'erã

peteĩ yguasu guive

ambue yguasu peve,

ha pe ysyry guasu guive

yvy apyraite peve.

22Isaácpe avei ombopyahu

iñe'ẽ me'ẽ,

Abraham itúva rehehápe.

23Opa yvypóra jehovasa

ha iñe'ẽ me'ẽ,

Israel akã ári oguapy.

Ñandejára oguereko chupe

upe ta'ýra ypykue ramo

ha ome'ẽ chupe

opa upe yvy imba'erã,

omboja'o upe yvy

ha ome'ẽ umi 12

Israel ñemoñarépe.