Eclesiástico 13 - Biblia Guaraní con Deuterocanónicos

Mboriahu ha mba'eta rereko

1Vlékere opokóva,

oñemongy'a,

ha oikóva ojejapóva ndive

ha'eichaguáta avei.

2Ani rehupi nde ati'ýre

ipohýi etereíva,

ha ani reiko

nde hegui imbareteve

ha oguereko hetavéva ndive.

Kambuchi piko ikatúta

oñemoirũ japepóre?

Japepo oñembotáne hese

ha ojokáne.

3Mba'eta rereko

oporoapo'i ha ojererovu,

mboriahu ojeapo'i

ha he'i ombyasyha.

4Ikatu aja reipytyvõ

mba'eta rerekuápe,

nde rerekoséta hembiguáirõ.

Ndererekovéivo mba'eve,

nde reja reíta.

5Rereko aja mba'eta

ovy'áta ne ndive,

ha ne moperõmbáta ombyasy'ỹre.

6Oikotevẽrõ nde rehe

oñeha'ãta ne mbotavy,

opukavýta

ha ojereroviaukáta ndéve.

Juru he'ẽme he'íta ndéve:

“Mba'épa reikotevẽ?”

7Ikaru guasu hápe

ne motĩta.

Ikatu aja nde poru,

ne mbotavýta,

heta ne mbyaguara rire

oñembohorýta nde rehe.

Nde rechávo katu ohasáta

ha oñemohembe jeguarúta

nde hegui.

8Ani

ne mba'e rerovia iterei,

cháke rejererekóne

itavýva ramo.

9Ipoguasúva

oñemboja ramo nde ypýpe

eñemboykemínte chugui,

ha he'íta ndéve

reho haguã hendápe.

10Ani reñemboja iterei

cháke ne mboykéne.

Ani avei

repyta mombyry eterei,

cháke hesaráine nde hegui.

11Ani reñe'ẽ hendive

ha'érõ guáicha ne irũ,

térã rejerovia hese

oñe'ẽ etereírõ,

ha'e ne ra'ã hína

ñe'ẽngatúpe,

ha puka-pukavýpe

nde pyguara hína.

12Ojejoko kuaa'ỹva,

tekove jero hína upéva.

Ha'e nde pokua

ha ne nupãne.

13Ema'ẽ porã ha ejerereko,

ani reiko tekove jero ndive.

14Rehendúrõ ko'ã mba'e

reke jave, epáy.

Ha eñembo'e Ñandejárape

nde pe'a haguã ivaívagui.

15Opa tymba oikovéva

ohayhu ha'eichaguápe,

ha yvypóra yvypórape.

16Oikovéva guive tymba

ojoaju ha'éicha guáre

ha yvypóra avei.

17Mba'éicha piko ojoajúta,

aguara guasu ha ovecha ra'y,

imarangatu ha iñangaipáva?

18Ndaikatúi oikóvo oñondive

py'a guapýpe

aguara'i ha jagua,

mba'eta rerekua ha mboriahu.

19Vúrro saitégui,

yvy ojeiko'ỹháme,

oiko jaguarete rembi'u,

ha mboriahúgui,

mba'eta rerekua rembi'u.

20Ojejapóva ojeguaru

oñemomirĩvagui,

ha mba'eta rerekua

ndohechaséi mboriahúpe.

21Mba'eta rerekua

oñepysãngárõ

ojoko chupe iñirũ nguéra,

ha mboriahu oñepysãngárõ,

omyaña chupe iñirũ nguéra.

22Oñe'ẽrõ poguasu

heta oĩ ojepopetéva,

noñe'ẽkuaái ramo jepe

he'i joa oñe'ẽ porãha.

Ojavýrõ mboriahu,

oñeñembohory hese,

ha oñe'ẽ ramo hekópe

avave nohenduséi.

23Oñe'ẽ mba'eta rerekua

ha maymáva okirirĩ,

ha ohupi chupe yvate.

Oñe'ẽrõ mboriahu oporandu:

Máva piko upéva?

Ha oñepysãngárõ

omyañave chupe.

24Iporã pe mba'eta

ipotĩrõ angaipágui.

Heko añávape guarã,

ivai pe mboriahu.

25Yvypóra py'apy,

ivai térã iporãvape,

ojekuaa hováre.

26Tova rory

he'ise py'a porã;

ñe'ẽ heta rei

he'ise py'a tyai.