Eclesiástico 1 - Biblia Guaraní con Deuterocanónicos

1Opa arandu ou tupãgui,

ha oĩ hendive opa ára.

2Mávapa ikatúne oipapa

yvy ku'i ra'ỹi oĩva

yguasu rembe'ýpe,

ama ndyky,

térã mboy árapa

oĩ ára pave'ỹme?

3Ava piko ikatu

oha'ã yvága yvatekue,

yvypekue,

tugua pypuku térã arandu?

4Opa mba'e mboyve

ojejapo vaekue arandu

ha akã porã

imba'e recha kuaáva

oikónte vaekue voi.

5Pe arandu ykua hína

Ñandejára Ñe'ẽ

oĩva ijyvatehápe,

ha umi hi'y rape hína

hembiapoukapy

opa árape guarãva.

6Avápe piko

ojekuaauka ra'e arandu rapo,

ha máva piko oikuaa ra'e

imba'e ñemimby?

7Mávape piko

ojehechauka ra'e

pe arandu kuaa,

ha mávape piko

hesakã ra'e umi hapeita?

8Peteĩnte oĩ iñarandúva,

ha upéva hína

peteĩ ojekyhyje etereiha:

Ñandejára oĩva iguapyhápe.

9Ha'e voi ojapo pe arandu,

ohecha, oha'ã

ha ohekuavo

opa hembiapokue ári.

10Ha'e ome'ẽ

heta rasa opa yvypórape,

ha omohembypa

umi chupe ohayhúvape.

Ñembyaje Ñandejárape

11Ñandejára ñembyaje

oporombotuicha

ha oporomyenyhẽ

ome'ẽ vy'a ha tova rory.

12Ñandejára ñembyaje

oporombyetia'e,

oporombopy'a rory,

oporombovy'a

ha oporomoingove puku.

13Ñandejárape

omomba'e guasúvape

amo ipahápe ho'a porãmba.

14Arandu oñepyrũ ñambyajévo

Ñandejárape

ha omoirũ hayhuhápe

isy rye guive.

15Ojogapo vaekue

yvypóra apytépe

oikóma haguã opa ára upépe,

ha opytáta añetehápe

hendive kuéra.

16Arandu ha'etéva

oĩ Tupã ñembyajépe

ha ha'e omohyguãtã yvypórape.

17Hóga kuéra opyta henyhẽ

opa mba'e ojepotáva guivégui,

ha hi'upýgui

ha'e rupi oñemono'õ vaekue.

18Ñandejára ñembyaje

ombojegua ñane akã

arandúpe.

Ha'e ombopoty py'a guapy

ha tesãi.

19Ñandejára ohecha ha oha'ã,

omongy mba'e kuaa ha arandu,

ha ombotuicha

umi iñarandúva reko mimbipa.

20Arandu rapo ha'e

Ñandejára ñembyaje

ha hakã nguérare

isarambi jeikove.

21Ñandejára ñembyaje

omomombyry angaipa,

pe ndojeíriva chugui

omboyke Ñandejára pochy.

22Pochy vai hekope'ỹ

ndaikatúi ñamoporã,

ipochy vai etereíva

ha'e voi oñehundi.

23Oporoha'arõ kuaávape

pochy'ỹre,

amo ipahápe

ojeréta chupe vy'ápe.

24Tekotevẽ aja pukukue

okirirĩva,

ohechauka opavavépe

iñakã porãha.

25Pe iñarandu porãva

oikuaa mba'épa he'ise

ñe'ẽnga ijapyte so'óva,

pe iñangaipáva katu,

Ñandejára ñembyajégui

mba'eve ndoikuaaséi.

26Reheka ramo arandu,

ejapo Tupã rembiapoukapy

ha Ñandejára

chugui ne myenyhẽta.

27Ñandejára ñembyaje

ojapo nde hegui

tekove iñarandúva

ha imba'e kuaáva,

ha'e ohayhu

oporombyengovia'ỹva

ha imirĩvape.

28Ani nerembyajeséi,

Ñandejárape

ha ani reñemboja hese

tova mokõime.

29Ani nde apeguypegua

nde rapicha ndive,

embotýke nde juru.

30Ani rejupi yvate eterei

nde re'aséi ramo,

ha reñemotĩ.

Ñandejára oikuaaukáta

ne rembiapokue ñemi,

ha ne motĩta

nde rapicha kuéra renondépe,

nerembyajeséi haguére

Tupãme

ha nde rova mokõi haguére.