Sabiduría 11 - Biblia Guaraní con Deuterocanónicos

1Arandu omyakã rapu'ã

ne retã guápe

peteĩ maranduhára*f**

marangatu rupi.

2Ohasa hikuái

yvy ojeiko'ỹha rupi,

ha omopu'ã hóga kuéra

tape ojeguata'ỹha rupi;

3Opu'ã hese kuéra

ija'e'ỹháre

ha omboguevi chupe kuéra.

4Ijyuhéi jave

ha'e kuéra ne renói,

ha peteĩ ita

ome'ẽ chupe kuéra y

ha upe ita ne ratãva

ombogue ijyuhéi.

5Ha péicha,

upe mba'e oñenupã hague

ija'e'ỹva hese kuéra,

iporãite vaekue chupe kuéra,

osẽ haguã jejopýgui.

6Ne retãguáre ija'e'ỹva

ysyry opa'ỹva rangue,

ojuhu hikuái peteĩ

ojehe'áva tuguy ha tujúre

7mitã nguéra

ojukauka haguére,

ne retã guápe katu reme'ẽ

heta y porã oha'arõ'ỹhágui,

8reikuaaukávo chupe kuéra

yuhéi ohasa vaekuére,

mba'eichaite pevépa

reinupã rasy vaekue

ijopyha kuérape.

9Upe jehasa asy

oisu'u vaekue rupi,

oñenupãrõ ramo jepe

poriahurerekópe,

oikuaa vaekue hikuái

jehasa asy oisu'úva

Tupãre ija'e'ỹva,

oñenupã pochýrõ guare.

10Ne retã guápe

reipy'a ra'ã

túva oja'oháicha ta'ýrape,

umi ambuépe katu, reinupã

mburuvicha py'a hatã

oporonupãháicha.

11Taha'e hi'aguĩva

taha'e imombyrýva

ne retãguágui,

peteĩcha ohasa asy vaekue.

12Ñembyasy jo'a

oñuã chupe kuéra,

ha ojahe'o

imandu'ávo yma guarére;

13Ohecha kuaávo

iñenupã nguéra,

ou porã hague ne retã guápe,

oñandu vaekue nde pokatu.

14Pe ojeheja rei vaekue

ýpe imitãme,

ha upéi oñemosẽ jejahéipe,

ipahápe ojererohory.

Yuhéi ohasa vaekue

ipy'a hatãva, tuicha oikoe

heko jojáva yuhéigui.

15Heko aña ha itavy rupi,

omomba'e guasu vaekue hikuái

tymba rei

ha mbói opaichagua,

ha nde remondo

chupe kuéra ñenupãrõ

umi tymba rei umíva,

16oikuaa haguã

hembiapo ky'akuépe voi

oñenupãha.

17Nde niko --nde po teépe

rejapo vaekue

opa mba'e mba'evetégui--

ikatu voi vaekue

repoi hese kuéra

jaguarete

ha aguara guasu iñarõvéva,

18térã rejapo tymba ñarõ

ojekuaa'ỹva,

ipytuhẽva tata rendy

ỹrõ itĩgui tatatĩ opoíva,

térã heságui

tata piriri pochy.

19Ndaha'éi ikatúnteva

ojuka chupe kuéra

peteĩ ipo nupãme,

ima'ẽmente voi katu,

ivai etereígui.

20Ko'ãva'ỹre jepe

ikatu porãnte vaekue voi,

peteĩ jepejúpe ho'apa hikuái

nde reko joja

ha nde reipapa

ha remohenda vaekue hekópe

opa mba'e.

21Nde pokatu

opa ára oĩ nde pópe,

Avápa oiméne ipu'akáva

nde pyapy mbaretére?

22Opa mba'e oĩva ivevýi

peteĩ yvy ra'ỹicha

ne renondépe,

peteĩ ysapy resáicha

ho'áva yvy ári.

23Opavavépe

reiporiahurereko,

ikatúgui rejapo opa mba'e,

remboty nde resa

yvypóra rembiapo vai

renondépe,

jahechápa ndojevýi

heko añágui.

24Nde niko

rehayhu opa mba'e,

ha opa rejapo vaekuégui

neremboykéi mba'eve,

rehayhu'ỹta rire,

nderejapói vaerã mo'ã.

25Mba'e nga'u piko opytáta

ndereipotái ramo nde?

Mba'éicha piko oikovéta

nerehenói ramo nde?

26Nde reiporiahurereko

maymáva,

ne mba'égui opa mba'e,

ha opa mba'e rehayhúgui.