1 Macabeos 4 - Biblia Guaraní con Deuterocanónicos

Emaúspe guare ñorãirõ(2 Mac 8.24-29,34-36)

1Gorgias ombosako'i 5.000 ñorãirõhára yvy rupigua ha 1.000 kavaju arigua iporavo pyrekuete, ha oho heseve oguahẽ rire pyhare

2ojeity haguãicha umi Israelgua ha upéicha ohundi chupe kuéra. Tape rechaukaha ramo oho hendive kuéra, táva Jerusalén guáva.

3Judas katu oikuaa upéva ha omopu'ã iñorãirõhára kuérape ohenonde'a haguã umi mburuvicha guasu ñorãirõhárape, oĩva hikuái Emaúspe,

4isarambi aja gueteri hikuái mombyry-mbyry ojuehegui.

5Gorgias oguahẽ pyhare pe oimo'ã haguépe oĩha Judas, ha ndojuhúi avave. Upémarõ oheka chupe umi yvytýre, oimo'ã rupi okyhyjégui okañymbaha chugui kuéra.

6Ha Judas, pyharevete osẽ sapy'a ñúme 3.000 ñorãirõhára reheve, ndahete mo'ãhái jepe hikuái ha ndaikyse puku hetái, oipota haguéicha.

7Judas ha iñirũ nguéra ohecha pe ñorãirõhára aty ne mbaretéva henondépe kuéra, hete mo'ãha iporãva, heta kavaju arigua reheve, ikatupyry-pyrýva ñorãirõme.

8Aipórõ Judas he'i: “Ani pekyhyjétei pehechávo imbarete tereiha ha ani peñemondýi pehechávo ojeity ñande rehe.

9Pene mandu'ánte mba'éichapa ñande ru kuéra ypykue osẽ raka'e jejopy vaígui Mar Rójope, Faraón iñorãirõhára kuéra reheve ou ramo guare hapykuéri kuéra.

10Jajerure asy ko'ágã Tupãme ta ñane pytyvõ, imandu'ávo ñe'ẽ ñome'ẽ ojapo vaekuére ñande ru ypy kuerakue ndive, ha tohundi pe ñorãirõhára aty oĩva ñane renondépe.

11Upéicha ramo, tetã nguéra ohecha kuaáne oĩha peteĩ oguenohẽva Israélpe jejopy vaígui.”

12Umi mombyrygua, ohechávo Israelgua kuéra ouha chupe kuéra,

13osẽ ohuguãitĩ ondyry haguã hese kuéra. Judas ñorãirõhára kuéra katu ombopu turu ha oñepyrũ ñorãirõ.

14Umi mombyrygua opyta yvýre, isarambipa ha okañymba pe ñúre.

15Umi itapykue vaekue katu ojejukapa kyse pukúpe. Israelgua kuéra omuña umi hembývape Guézer ha Idumea ñu, Azoto ha Jabnia peve. Ha 3.000 Israel guáre ija'e'ỹva retekue ojepyso upépe.

16Ou jeýmavo hikuái, omuña rire umi mombyry guápe, Judas he'i iñorãirõhára kuérape:

17“Ani pene ragẽ pehupi haguã umi mba'eta ñorãirõ haguépe opytáva, ñañorãirõvéta gueteri ñaína.

18Gorgias heta iñorãirõhára reheve oime hína pe yvytýpe, aguĩ ñande hegui. Pejepytaso mbareténte pehóvo umi ñande rehe ija'e'ỹva renondépe ha ñañorãirõ hendive kuéra. Upe rire, py'a guapýpe porã, umi mba'eta opyta vaekue ñorãirõ haguépe.”

19Oñe'ẽ jave gueteri hína, iñakãsẽ sapy'a peteĩ ñorãirõhára aty, oma'ẽva hína pe yvyty guive.

20Umíva ohecha kuaa, iñirũ nguéra isarambipaha, pe oĩ hague hikuái okaipaha: pe tatatĩ opu'ãva ohechauka porã mba'épa oiko ra'e upépe.

21Ohechávo hikuái upéva oñemondyipa, ha ohechávo Judas ñorãirõhára kuéra omumu joáva pe ñúre, opoi pýgui

22ha okañymba hikuái filistéo retã rupi.

23Judas ha iñirũ nguéra ojevy hikuái pe oñeñorãirõ haguépe ha oñemoĩ ohupi umi mba'eta opytapa vaekue: heta óro ha pláta, aorã pytãva ha hetave mba'e hepýva omono'õ hikuái.

24Ou jeývo hikuái, Israelgua kuéra ogueropurahéi ha ombyaje joa Tupãme, ipy'a porãre ha imborayhu ndopáigui araka'eve.

52Ára 25hápe, mes 9 jave hérava Kislev, áño 148 ramo, opu'ã hikuái voi porã,

53ha omymbajuka, tembiapoukapy he'iháicha, pe altar pyahu ojejapo vaekue ári.

60Umi ára umívape, omopu'ã hikuái Sión jerére peteĩ korapy yvate, óga yvate mbarete reheve, anive haguã ou umi mombyrygua ha oitypa opa mba'e ojapo haguéicha hikuái ymave.

61Judas oheja upépe ñorãirõhára, ha omombarete Bet-Sur, Israel oñeñangareko kuaa haguã Idumea guio.