Eclesiástico 4 - Biblia Guaraní con Deuterocanónicos

Ñepytyvõ oikotevẽvape

1Che ra'y, ani reñembohory

ovy'a'ỹvare,

térã reapo'i oiko asývape.

2Ani rembohasa asy

iñembyahýivape,

térã remoñeko'õi

mba'eve oguereko'ỹvape

3Ani rembopochyve

pe ipochýmavape

ha ani remoha'arõ

pe oikotevẽvape.

4Ani remboyke

ojerure asývape

térã reñembojere

mboriahúgui.

5Ani rehechagi

oikotevẽvape

ani upeichahágui

ojahéi mba'e nde rehe

6Cháke ojahéi ramo

py'aro reheve nde rehe,

Ijapohare ohendúne chupe.

7Ejehayhuka maymávape

ha ejapo mba'érõ

mburuvicha kuérape.

8Ejapysaka imboriahúvare

ha nde py'a ite guive

embojevy chupe imaitei.

9Eipe'a ojejopy vaívape

ijopyha po guýgui

ha ani rekyhyje

rejapo haguã heko jojáva.

10Eiko ityre'ỹva ru

ha isy ména ramo,

upéicha oikóta nde hegui

upe Yvatetegua ra'y

ha ha'e nde rayhuvéta

nde sy teégui.Mba'eichaguápa pe arandu

11Arandu omyakã rapu'ã

imemby kuérape

ha oñangareko

hekahárare.

12Umi ohayhúva arandu,

ohayhu hekove

ha umi ohekáva

ipy'aite guive,

henyhẽta vy'águi.

13Oguerekóva,

ojeapóta mba'e ramo

ha mamo ohohápe,

ohovasáta chupe Ñandejára.

14Omba'apóva chupe guarã,

omomorã Imarangatúvape.

Arandu rayhuhárape

Ñandejára ohayhu.

15Upe oikóva

ha'e he'iháicha

ombojovakéta

tetã nguérape,

ha hese ojapysakáva,

oikóta kyhyje'ỹre.

16Ojeroviáva hese,

ohupytýta imba'erã

ha ombohasáta

iñemoñare kuérape.

17Iñepyrũrã

oisãmbyhýta chupe

tape ikoni-koníva rupi,

omongyhyje

ha omopirĩmbáta chupe.

Ombohasa asýta chupe

hemimbo'e reheve

ojerovia peve hese.

Oikuaa haguã

mba'eichaguápa ha'e,

umi mba'e hasýva

ojapoukáva chupe rupi.

18Upéi oúta chupe tape

ikarẽ'ỹva rupi,

ombovy'áta

ha oikuaaukáta chupe

imba'e ñemimby.

19Ha'e opia ramo hapégui,

ojeíta chugui

ha ohejáta oñehundi.

Noñemomirĩ ha ndojejapóiva

20Emaña nde jerére,

ejerereko ivaívagui

ha ani retĩ nde jehegui.

21Oĩ ñemotĩ

ojapoukáva ivaíva

ha oĩ ambue oporombotuicha

ha oporomyerakuã porãva.

22Ejepy'apy'ỹ

upe oje'etavare,

ani haguã retĩgui

re'a ivaívape.

23Ani rekirirĩ

tekotevẽrõ reñe'ẽ

ha ani reñomi ne mba'e kuaa.

24Pe arandu

ojechauka pe máva ñe'ẽre,

ha mba'éichapa

ojeheko mbo'e ra'e pe máva,

ojekuaa upe he'ívare.

25Ani ere mba'eve

iñañete'ỹva,

etĩ uvei

nderejetavy'ói haguére.

26Ani retĩ

remombe'u haguã

ne angaipa

ha ani re'ytase

ysyry yvatévo.

27Ani reñemomirĩ

itavýva renondépe,

ha ani rembojerovia

hekope'ỹ ipoguasúvape.

28Remano meve eñorãirõ

pe añeteguáva rehehápe

ha Tupã Ñandejára

oñorãirõta nde ykére.

29Ani nde juru atã

reñe'ẽvo,

térã ne ate'ỹ

ha ne kangy ne rembiapópe.

30Ani jaguaretéicha

ne ñarõ nde rogapýpe

ha reiko tĩndyhápe

ne rembiguái kuéra

renondépe.

31Ani nde po jerure eterei

ha nde pojopy

reme'ẽ haguã.