Sabiduría 19 - Biblia Guaraní con Deuterocanónicos

1Ha umi heko añávare

katu ho'a ipaha peve,

peteĩ pochy ipohýiva,

oikuaáma voígui Tupã

mba'épa ojapóta hikuái:

2Ne retãgua kuérape

oheja rire osẽmba

ha omyañaña

ohopa haguã hikuái,

ha'e kuéra ombyasy jeýta

ha osẽta hapykuéri kuéra,

omuña haguã.

3Ha upéicha,

umi Egiptogua

oiko ramo gueteri

oguerojahe'o hetãgua mano

ityvy ári,

oguerekóma iñakãme

pe ivaivéva ojapo vaerã:

umi oho vaekuépe,

ha'e kuéra voi

ojerure asýgui

chupe kuéra oho haguã,

osẽ omuña hikuái,

oho reíva ramo guáicha.

4Upe ñenupã

oikóva hese kuéra

oñemyengoviávo

hembiapo vaikuére,

ojapouka chupe kuéra péicha

ha ombyesarái oiko vaekuégui,

ikatu haguã ohupyty

umi ñenupã rasy,

ou vaerãva gueteri.

5Ha péicha,

oipykúi aja hape

ne retãgua oñondive,

nde pepo guýpe oñemo'ãvo.

Ha'e kuéra

omanomba oimo'ã'ỹhágui.

6Opa ko yvy,

nde pokatu rupi,

omoambue heko tee

ani ojehu mba'eve ivaíva

nde ra'y kuérape.

7Ojehecha pe arai

omo'ã ramo hekoha kuéra.

Y rendaguépe

iñapekãvo pe yvy

Mar Rójogui.

Oiko tape potĩ,

ñu ne porãva

y pochy pa'ũme.

8Upe rupi ohasa hikuái,

nde pópe oñemo'ãvo,

ohechávo mba'e imomorãmby.

9Ha'ete umi kavaju okarúva

kapi'ipety rovyũ porãme,

ha ovecha ra'ỹicha isaraki,

ne momba'e guasúvo, Tupã,

Nde, imosãsohára.

10Imandu'a gueteri hikuái

teko asy ohasa vaekuére,

pe tetã ojejopy haguépe,

yvýpe oñemuña ramo guare

mymba rangue ñati'ũ

ha ýpe, pira rangue,

ju'i omumumbáva.

11Upe rire katu ohecha,

guyra kuéra oñemoñárõ

ndaha'éi jepiguáicha,

ha, ho'useve-sevégui hikuái,

ojerure ramo guare

tembi'u iporã porãvéva,

12ha omohyguãtã haguã chupe kuéra,

pe yguasúgui osẽ ynambu.Egipto hembiapo vaive Sodómagui

13Hembiapo vaívare katu

ho'a ñenupã ipohýiva,

ojekuaauka rire chupe kuéra

ára sunu pochy rupi,

hekópe

ha'e kuéra ohasa asy,

iñaña ha ndaija'éigui

ikatu'ỹha meve

ndaha'éiva hetã guáre.

14Sodomagua

nomoingéi hetãme

tapicha jekuaa'ỹ

oguahẽvape,

Egiptogua katu ojapo

tembiguái umi omba'apóvagui.

15Hi'ariete niko umíva,

--umi Sodoma pegua--

iñepyrũha guive,

ohechauka vaekue

ndaija'eiha hese kuéra;

16Ãva katu --Egiptogua kuéra--,

umi Tupã retã guápe,

oguerohory heta rire

hetã guáva ramo guáicha,

omoĩ hi'ári kuéra

opaichagua tembiapo pohýi.

17Upévare chupe kuéra,

oñemohesatũmba vaekue,

umi Sodoma guáicha

Lot, kuimba'e pyre rokẽme,

opytapa ramo hikuái

pytũmby etépe,

opovyvy joa hokẽre.Tupã reko mimbipa pokatu

18Péicha, opa ijapo pyre

oikepa vaicha ojopype

peteĩva reko ohasa ambuépe,

ojehuháicha mbaraka reheve,

isã nguéra

ipupárõ oñondive

peteĩ purahéinte oñehendu.

Péicha vaekue

ko'ã mba'e ojehúrõ guare.

19Tymba yvýre oikóva

y pegua ramo ohasa,

ha umi y rupi ho'ytáva

yvýre oguata joa.

20Tata hendy mbareteve ýpe,

ha y ndaikatúi ombogue tata.

21Tata rendy katu ndohapýi

tymba mimi ipype ho'áva,

ha nomboykúi pe maná*f**

yvága marangatúgui oúva,

y rypy'ápe ojoguáva

ha pya'eterei hykúva.

22Opa mba'épe, ore Jára,

rehupi

ha rembojerovia vaekue

ne retã guápe,

ha opa rupi ha opa ára

reipytyvõ.