1Áño 151 ramo, Demetrio Seleuco ra'y osẽ Rómagui ha peteĩ atýra iñirũ nguéra ndive oguahẽ peteĩ táva guasúpe yguasu rembe'y pegua ha upépe oñemoingo mburuvicha guasúrõ.
2Ha ojehu kóicha: Oikéta jave Demetrio ijypy kuerakue róga guasúpe, ñorãirõhára kuéra omyakãsã Antíoco ha Lisíaspe ha ogueru ome'ẽ haguã chupe.
3Oikuaávo Demetrio upéva, he'i: ‘Ndahechaséi chupe kuéra!”
4Aipórõ umi ñorãirõhára ojuka Antíoco ha Lisíaspe, ha Demetrio ojupi mburuvicha guasúrõ.
5Umi Israelgua heko jeroviaha'ỹva ha ojere vaekue Tupãgui, oho hendápe; omohenonde chupe kuéra Alcimo, oikoséva pa'i guasúrõ,
6ha oñe'ẽ hikuái hetã guáre: Judas ha ipehẽngue kuéra ojukapa umi nde rayhúvape ha oréve katu ore mosẽmba ore retãgui.
7Emondo peteĩ nde jeroviahápe tohecha umi mba'e vaieta ojapo vaekue ore rehe Judas, ore rehe ha pe yvy ne mba'évare, ha einupã chupe kuéra ha opa ipytyvõhárape.”
8Mburuvicha guasu oiporavo Báquidespe, oisãmbyhýva yvy ysyry Éufrates mboypyrigua, poguasu ijeroviaha,
9ha omondo pe tekove jeroviaha'ỹ Alcimo ndive, oñemoĩ vaekue pa'i ruvicha ramo, oho haguã oinupã Israelgua kuérape.
10Ha'e kuéra oñemoĩ tapépe peteĩ ñorãirõhára aty nde tuicháva reheve, ha oguahẽ hikuái Judéape. Báquides omondo hembijokuái Judas ha ityvýra ha ityke'ýra rendápe oikuave'ẽvo chupe kuéra gua'uhápe py'a guapy.
11Ha'e kuéra katu, ohechávo oguahẽha hikuái pe ñorãirõhára aty nde tuicháva reheve, nohendúi upe tembijokuáipe.
12Upéicha ramo jepe, oñembyaty umi iñarandúva tembiapoukapýpe, ha oho ohecha hikuái Alcimo ha Báquidespe ohechávo mba'éichapa ikatu oñeguahẽ peteĩ ñe'ẽme teko jojápe porã.
13Umi hasideo raẽvete oñemotenonde ojerure haguã mba'éichapa ikatu oñeguahẽ py'a guapýpe.
14Ha'e kuéra he'i: “Peteĩ Aarón ñemoñare ou pe ñorãirõhára aty ndive. Anichéne ojapo ñande rehe ivaíva.”
15Alcimo voi oñe'ẽ chupe kuéra py'a guapy oipotáva ramo, ha ome'ẽ ave chupe kuéra iñe'ẽ: “Ndorojapo mo'ãi mba'eve ivaíva pende rehe ha pene ndivegua kuérare.”
16Ha'e kuéra oguerovia. Alcimo katu omyakãsã 60 Israel guápe ha ojukauka peteĩ araitépe, he'iháicha Tupã ñe'ẽngue kuatia:
17“Omosarambi hikuái umi ojerovia vaekue nde rehe re'õngue ha oñohẽ tuguy Jerusalén jerére, ha ndaipóri oñotỹ vaerã chupe kuéra!”Sal 79.2-3.
18Maymáva oñemondýi ha okyhyjepa, ha he'i: “Umi tekove hova mokõi ha ndaipy'a porãi. Ndojapói he'i vaekue ha opyrũ hikuái iñe'ẽre.”
19Upe rire Báquides osẽ Jerusaléngui ha oho opyta Bet-Zétpe, ha upépe omyakãsãuka umi Israelgua oñemoĩ vaekue hendive ha ambue Israel guápe, ojukauka ha oity peteĩ yvykua pypukúpe.
20Álcimope omoĩ mburuvicha ramo upe yvy upévape ha oheja chupe heta ñorãirõhára oipytyvõ vaerã chupe, ha upéi ha'e ojevy mburuvicha guasu rendápe.
21Alcimo oñemoĩ oñorãirõ oñemohatã haguã pa'i ruvicha ramo.
22Oñemoĩ ijykére opa umi oikóva oporomongyhyje, ha omoĩ hikuái ipoguýpe kuéra Judea, heta mba'e vai ojapóvo Israélpe.
23Ohechávo Judas umi mba'e vaieta Alcimo oguerúva Israélpe, ivaivéva umi heko jeroviaha'ỹva mombyrygua ojapóvagui,
24Judea javeve oiko oinupã umi Israelgua mombyrygua gotyo ohasa vaekuépe, ha ndohejái chupe kuéra oiko tetãpýre.
Mburuvicha guasu ombou Nicanórpe(2 Mac 14.5-36)25Upémarõ Alcimo ohechávo imbaretetereiha ohóvo Judas ha iñirũ nguéra, ha ndaikatu mo'ãiha ipu'aka hese kuéra, osẽ oho mburuvicha guasu rendápe, ha ohova api chupe heta mba'e vai ojapo hague.
26Mburuvicha guasu omondo Nicanórpe, imburuvicha herakuã guasuvéva ha ojekuaáva ndaija'e tereiriha Israel rehe, ojukapa haguã Israelgua kuérape.2 Mac 8.9.
27Nicanor oguahẽ Jerusalénpe ñorãirõhára aty nde tuicháva reheve ha oguerahauka Judas ha ipehẽngue kuérape, py'a guapy gua'u rehegua ñe'ẽ, he'íva:
28“Anítei ñañorãirõ oñondive! Che aháta mbovymi che irũ ndive ñañomongeta haguã py'a guapýpe porã.”
29Ha oho ojojuhu Judas ndive ha oñomomaitei py'a guapyetépe. Umi Israel guáre ija'e'ỹva katu ohónte voi oguerokañy haguã Júdaspe.
30Judas, oikuaávo upe Nicanor jeju ñuhãnteha, oñemondýi ha ndojohechasevéi ete hendive.
31Nicanor, ohecha kuaávo iñuhã oñemyesakã hague, oho Cafarsalámape ha ondyry Judas rehe.
32Upépe, 500 Nicanor ñorãirõhára ho'a omano, hembyre katu okañymba upe David táva guasúre.
33Upe rire, Nicanor oho yvyty Siónpe. Peteĩ atýra pa'i ha tetãgua itujáva osẽ tupaógui omomaiteívo Nicanórpe ha ohechauka chupe mymbahapy oikuave'ẽ vaekue hikuái Mburuvicha guasu rérape.
34Ha'e katu opuka, oñembohory ha ondyvu hese kuéra iky'a haguã, ha iñe'ẽ guasu chupe kuéra.
35Pochýpe ome'ẽ iñe'ẽ: “Noñemoĩri ramo che pópe ko'agãite voi Judas ha iñorãirõhára aty, aju jeýta che pu'aka rire opavavére ahapypávo ko tupao.” Ha osẽ oho pochýpe.
36Pa'i kuéra oike pe tupaópe, oñemoĩ hikuái pe altar oñemymbahapyha renondépe ha he'i jahe'ópe:
37‘Nde reiporavo vaekue ko tupao ogueraha haguã nde réra ha ko'ápe oñembo'e haguã ne retãgua,
38Einupã pe kuimba'e ha iñorãirõhára atýpe, hembiapo vaikue ojerureháicha. Kyse pukúpe to'a hikuái! Ne mandu'a umi ñe'ẽ ky'a oity vaekue nde rehe, aníke reheja opytu'u!
Nicanor oñenupã vai ha omano(2 Mac 15.1-36)39Nicanor osẽ Jerusaléngui ha oho opyta Bet-Horónpe, upépe ojehe'a hese ñorãirõhára aty Siria pegua.
40Judas katu opyta Hadásape, 3.000 ñorãirõhára reheve. Ha upépe oñembo'e kóicha:
41“Ou ramo guare mburuvicha guasu Asiriagua oñe'ẽ reity ndéve, rembou vaekue yvága rembiguái ha ojuka 185.000 ha'e kuérava.2 R 19.35; Is 37.36; 2 Mac 8.19.
42Upéicha avei, ore resa renondépe emosarambipa ko ñorãirõhára aty, opavave oikuaa haguã, huvicha iñe'ẽ ky'a hague nde tupaóre, ha einupã ojerureháicha heko añangue.”
43Ha upéicha, mokõive ñorãirõhára aty ondyry ojuehe, ára 13, pe Mes hérava Adárpe. Nicanor ñorãirõhára aty opyta yvýre ha ha'e raẽvete voi ho'a upe ñorãirõháme,
44ha iñorãirõhára kuéra, ohechávo ha'e ho'aha, omombopa ikyse puku ha ihu'y kuéra ha opoi pýgui.
45Umi Israelgua oho hapykuéri kuéra peteĩ ára aja pukukue, trompéta púpe Hadasá guive Guézer peve.
46Upe jereregua tava'i kuéragui osẽ joa Israelgua kuéra ohape joko ha oity chupe kuéra ojuehe; peteĩ jepe ndopytái, omanombaite hikuái kyse pukúpe.
47Israelgua kuéra ohupi mba'eta opyta vaekue upe ñorãirõháme, oñakã'o Nicanórpe ha oikytĩ pe ijyva akatúa jejapópe ohupími vaekue, ha ogueraha Jerusalénpe oñemosãingo ojehecha haguã.2 Mac 14.33; 15.32-35.
48Opa tetãgua ovy'a ha oguerohory hikuái upe ára arete guasúrõ,
49ha ojeheja ojegueromandu'a haguã áño jerére oguahẽ jave ára 13 mes hérava Adárpe.2 Mac 15.36.
50Ha Judea ipy'a guapy opytávo, heta ára tenonderã.
Who We AreWhat We EelieveWhat We Do
2025 by iamachristian.org,Inc All rights reserved.
