Eclesiástico 45 - Biblia Guaraní con Deuterocanónicos

1Ñandejára ha yvypóra

ohayhu vaekue chupe,

Moisés, mandu'a rory

oiko hese,

2omoherakuã guasu chupe

imarangatúva apytépe

ha omombarete chupe

tuicha pokatu reheve.

3Ha'e ojerure rupi

ndojapovéi hechapyrãva,

ha mburuvicha guasu kuéra

renondépe

ombotuicha chupe.

Hetã guápe guarã

ome'ẽ chupe hembiapoukapy

ha ohechauka chupe

heko mimbipa,

4heko jeroviaha

ha imba'e porã rupi

oiporavo chupe

opa yvypóra apytégui.

5Ohenduka iñe'ẽ

ha omoinge chupe araípe.

Ha upépe ome'ẽ chupe

hembiapoukapy

jeikove ha akã porã reruha,

oheko mbo'e haguã

iñe'ẽ me'ẽ Jacóbpe

ha hembiapoukapy Israélpe.Aarón

6Oiporavo avei Aarón,

Moisés, ityvýra,

imarangatúva

ha Leví ñemoñaréva.

7Ojapo hendive

ñe'ẽ me'ẽ opave'ỹva

ha omoingo chupe pa'i ramo

hetã guárape guarã,

ombovy'a chupe ao jeguapápe

ha omonde chupe

ao omimbipávape.

8Ao iporã etereívape

omonde chupe

ha ome'ẽ

ipokatu rechaukahárõ

kasõ, ao puku ha efod.*f**

9Ijahoja ruguáire omosãingo

opa ijerekuévo

granáda ra'ãnga

ha mba'epu mimi óro

ipu haguã ha'e oguatávo,

ha hyapu haguã tupaóre,

mandu'arã

hetãgua róga guáre.

10Ome'ẽ chupe ao

oñemomarangatúva

óro, poyvi pytãũ

ha pytãvagui

ojepyaha vaekue

po katupyrýpe,

jeguaka pyti'a rehegua

Urim ha Tumim*f** reheve,

efod ha ku'a jokuaha,

oñembovyvýva inimbo pytãme

po katupyrýpe.

11Ita jegua reheve

oñemboguapýva óro rehe,

mba'e porã apoha rembiapo,

ohaíva hese kuéra umi 12

Israelgua ñemoñare réra.

12Jeguaka akã rehegua óro

ojehaihápe ipa'i ñemoingo,

mba'e hechapyrã omimbipáva

ha ojehechasetéva.

13Ha'e mboyve

ndojehechái vaekue

mba'eve iporãvéva

ha ndaipóri vaekue mombyrygua

péicha oñemondéva.

Ita'ýra kuéra mante

ha iñemoñare kuéra

opa árape guarã.

14Imba'e kuave'ẽ*f**

ojehapypaite vaekue

mokõi jevy peteĩ árape

oso'ỹre araka'eve.

15Moisés

omoingo chupe pa'i ramo

omonávo hese

ñandyry marangatu,

ome'ẽ

chupe ha iñemoñarépe

ñe'ẽ me'ẽ

opa árape guarãva,

hembiapo haguã tupaópe

pa'i ramo

ha ohovasa haguã hetã guápe

Ñandejára rérape.

16Oiporavo chupe

opa yvypóra apytégui

oikuave'ẽ haguã chupe

mymbahapy*f**

ha mymbajuka joajurã,

insiénso mandu'arã

ha mymbajuka

ojeheja rei haguã hetã guápe

iñangaipa.

17Ipópe oheja hembiapoukapy

ha iñe'ẽ me'ẽ

oheko mbo'e haguã hembipota

Jacóbpe

ha hembiapoukapy Israélpe.

18Ojeporavo'ỹ vaekue

opu'ã ha ongururu hese

yvy ojeiko'ỹháme:

Datán ha Abiram ndivegua

ha Coré ykeregua

ipochy rendy hikuái.

19Ñandejára ohechávo

ipochy hendive kuéra

ha ipochy rendýpe

ohundi.

Ojapo hechapyrãva,

ha oñeñandukávo chupe kuéra

omondo hata hese kuéra

ha ombokusugue.

20Omyerakuã guasuve gueteri

Aarónpe,

ha oheja chupe imba'erã

umi mba'e kuave'ẽ tenondere

ha he'i oĩ haguã chupe

opa ára heta hi'upyrã.

21Ha'e kuéra niko okaru

pe Ñandejárape

oñekuave'ẽvagui,

ha'e ome'ẽ vaekue

Aarón ha iñemonãrépe.

22Hetãgua apytépe katu

chupe kuéra noñemboja'ói

yvy imba'erãva,

Ñandejára he'ígui:

Che voi hína upe imba'erãva

ha che ndive oguerekóma

opa mba'e.

23Finees, Eleazar ra'y,

mbohapyha terakuãme,

hakate'ỹ haguére

Tupã opa mba'e Járare,

ha oñemyatã haguére

hetãgua kuéra

opu'ã ramo guare,

ipy'a guasu rupi,

omyengovia Israelgua

angaipáre.

24Upévare ojejapo hesehápe

ñe'ẽ me'ẽ

py'a guapy rehegua,

ojapóva chugui

tupao ha tetãgua myakãha,

oiko haguã pa'i guasúrõ

ha'e ha iñemoñare kuéra

opa árape guarã.

25Oiko vaekue avei

ñe'ẽ me'ẽ

Jesé ra'y David,

Judá ñemoñaregua ndive,

chupe

ha peteĩ ta'ýrape guarãnte,

Aarón mba'éva katu ohasa

opa ita'ýra kuérape.

26Ha ko'ágã perohory

Ñandejárape imba'e porãgui

ha pene myenyhẽ vy'águi,

ha arandúgui,

pembojovake haguã hekópe

hetã guápe,

ha topa'ỹ araka'eve

pende vy'a ha pende pokatu.