1 Macabeos 8 - Biblia Guaraní con Deuterocanónicos

Judas oñemoĩ peteĩ ñe'ẽme Roma ndive

1Judas apysápe oguahẽ umi Romagua imbarete tereiha, ipy'a porãvaha umi oñoñe'ẽ me'ẽha ndive, ha ohóva hendápe kuérapente omoguahẽ porãha.

2Tenonderãite oje'e pe imbareteha. oñemombe'u chupe mba'éichapa heta ñorãirõ mbaretépe omoĩ ra'e ipoguýpe upe Galias, ha ojehepyme'ẽka chupe;

3ha upéi mba'épa ojapo Espáñape oñemomba'epa haguã umi pláta ha óro renda upépe oĩvare;

4mba'eichaitépa omoĩ ipópe opa upe yvy, oñorãirõ kuaa ha oha'arõ kuaa rupi, opyta ramo jepe mombyry hetã teégui; mba'éichapa omona ra'e yvýre opa mburuvicha guasu yvy arigua ondyry vaekue hesépe, ha ojehepyme'ẽka chupe kuéra, áño ohasa vove jepi.

5Ñorãirõme avei oity ra'e ha omoĩ ipoguýpe Filipo ha Perséope, mokõive mburuvicha guasu Macedonia pegua, ha opa ondyry vaekue hese kuérape.

6Oikuaa avei, Antíoco, Tuicháva, mburuvicha guasu Asia pegua oho hague umi Romagua ári 120 elefánte reheve, ñorãirõhára kavaju arigua ha yvy rupigua heta etei reheve, ha osẽ vai hague:

7ho'a ipópe kuéra ha upete guive ha'e ha iñemoñare kuéra ohepyme'ẽ hepy vaerã chupe kuéra; heta oheja oñembyekovia vaerã hepýre

8ha ome'ẽ ijyvy India, Media ha Lidia, umi Romagua ome'ẽva upéi Euménespe.

9Ohendu avei oje'e ramo, umi griégo oho hague oñorãirõvo ha ohundívo Rómape,

10ha oikuaávo upéva, umi Romagua omondo huguãitĩvo peteĩ mburuvicha añoite. Ondyry ojuehe ha umi griégo heta etei omano, kuña ha mitã nguéra ojererahapa, oñembojára hikuái opa mba'ére, ohundipa umi óga mbarete ha ojapopa tembiguái opavavégui ko'agãite peve.

11Judas oikuaa avei, umi tetã ha yvy y mbyte pegua ha opa opu'ã vaekue Rómare, opytapa hague yvýre ha oikopa chugui kuéra tembiguái, ha umi oĩva hendive katu, umi ohekáva ipytyvõ ha ojeroviáva hese, umíva ndive nosẽ iñe'ẽgui ha oiko porã hendive kuéra.

12Upéicha, umi Romagua omoĩ ipoguýpe heta tetã ha mburuvicha guasu aguĩ ha mombyrygua, ha opa ohendúva upeichaha okyhyje joa.

13Umi oikoséva mburuvicha guasúrõ, Roma oipytyvõ ramo ojupi; umi oitysévape katu oity. Upéicha rupi ou imbarete terei.

14Ha upéicharõ jepe, mavavéva umi Romagua ndoikói mburuvicha guasúrõ ha nomoĩri ijapére ao pytã guasu ohechauka potávo ipu'akaha.

15Oguereko hikuái peteĩ Senado, 320 mburuvicha ijatýva oñomongeta haguã mba'épa iporãve ojejapo tetãgua rehehápe.

16Áño ohasávo jepi, oiporavo hikuái peteĩ ijeroviaha oisãmbyhy vaerã tetã, ha ndaipóri ipochýva térã ipy'aróva upevakuére, térã oñua'ãva pokarẽme ojoapytépe.

Ñoñe'ẽ me'ẽ Roma ndive

17Aipo ramo, Judas oiporavo Eupólemo,2 Mac 4.11. Juan Acos pegua ra'y ha Jasón, Eleazar ra'ýpe ha omondo chupe kuéra Rómape, ojapo haguã peteĩ ñe'ẽme'ẽ upe tetã ndive,

18upéicha Israel osẽ haguã umi griégo poguýgui, ojapóva ohóvo chugui tembiguái.

19Osẽ oho hikuái Rómape, ha heta oguata rire oguahẽ —ko mombyry opytáva—, ha he'i hikuái upe Senádope:

20“Judas Macabeo, ipehẽngue kuéra ha opa Israelgua ore mbou rojapo haguã pene ndive ñe'ẽ ñome'ẽ py'a guapy ha ñopytyvõ rehegua. Roipota ore rereko pene irũ ha pende rayhuha ramo.”

21Senador kuéra Romagua ojuhu porã upéva ha omonei hikuái Israelgua rembijerure.

22Upéi ojehai vrónsere ñe'ẽ oñemondóva Jerusalénpe, upépe opyta haguã, py'a guapy ha ñopytyvõ ojoapyte pegua rechaukaha ramo.

23“Tovy'a ha toiko porã opa árape guarã Romagua ha Judeagua, yvy ári ha yguasúpe! Tamombyry chugui kuéra ñorãirõ ha hese kuéra ija'e'ỹva!

24Peichahágui sapy'a rei Rómare térã oimeraẽva hendive oĩvare oñendyry ramo mamo oimehápe,

25Judea retãguáva oñemoĩne ijykére térã hendive oĩva ykére ipy'aite guive, taha'e ha'évape.

26Nome'ẽi chéne Rómare ija'e'ỹvape tembi'u, mba'e ojeporojukaha, viru térã ygára guasu. Upéva ha'e Roma rembipota. Israel retãgua ojapo vaerã upéicha, ojerure'ỹre ojehepyme'ẽ haguã chupe upévare.

27Upéicha avei, oimérõ ondyrýva Israel retãguáre, Romagua kuéra oñorãirõne ijykére ipy'aite guive, taha'e ha'évape,

28ha nome'ẽi chéne tembi'u, mba'e ojeporojukaha, viru térã ygára guasu umi Israel rehe ija'e'ỹvape. Upéva ha'e Roma rembipota, ha ojapóne upéicha añetehápe.

29Péicha opyta peteĩ ñe'ẽme umi Romagua Israel retãgua ndive.

30Upe rire, oimérõ oipe'ase térã omoĩsevéva hikuái ko ñe'ẽ ñe'ẽme'ẽme, ikatu ojapo oipotaháicha, ha pe ojepe'áva térã oñemoĩvéva opyta añeteguáva ramo.”

31Upéi ave, Umi Romagua he'i omondomaha kuatia mburuvicha guasu Demétriope, mba'e vaieta Israelgua retãre ojapo vaekuére: “Mba'ére piko reiko rejopy ore irũ ore ykeregua Israelgua kuérape?

32Ha'e kuéra omombe'u jey ramo oréve reikonteha reikóvo upéicha, rondyrýta nde rehe, yvy rupi ha y rupi”.