Eclesiástico 33 - Biblia Guaraní con Deuterocanónicos

1Ñandejárape ombyajéva

mba'eve ivaíva ndojehúi,

chupe ho'a vaírõ jepe

oñerenohẽta.

2Iñarandúva nomboykéi

Ñandejára rembiapoukapy,

hova mokõiva katu

ojogua mbayru ypegua,

yvytu ratãme ojetyvyróva.

3Iñakã porãva ojerovia

Ñandejára rembiapoukapýre,

upéva chupe guarã

Tupã momarandu ramo.

4Reñe'ẽ mboyve,

eikuaa porã upe erétava

ha reñehendúne.

Embyapu'a ne mba'e kuaa,

ha ere upe oñeporandúva.

5Itavýva akã ojogua

karréta rruédape,

ha oñemongetárõ,

upe éhe ojerévape ojogua.

6Kavaju ra'ýpe ojogua

hapicháre oñembohorýva,

opopo taha'e ha'éva

pe hi'ári ojupíva.

Ñandejára ohechakuaa

7Mba'ére piko iporãve

peteĩ ára ambuégui,

ko peteĩ kuarahýnte

ohesapéva opa umíva

upe áño pukukue?

8Ñandejára ñe'ãme

oñemoambue vaekue umíva

ojuehegui,

Ha'e omoĩ vaekue ára haku,

ára ro'y ha arete kuéra.

9Oĩ ára ojehovasáva,

ára oñembyaretéva

ha ára oñemba'apoha.

10Avei opavave yvypóra

yvýgui guare;

Adán ojejapo vaekue

ñai'ũgui.

11Ñandejára katu

iñarandu rupi omoingoe,

ha omboguata peteĩ-teĩme

hape tee rupi.

12Oĩ ohovasa

ha omoĩ porãva,

omomarangatu

ha ijykére omoĩ.

Ha ambue kuérare ojahéi,

chupe kuéra omotĩndy

ha omongúi iguapyhágui.

13Ñai'ũ oĩháicha

kambuchi apoha pópe

ojapo haguã chugui

ojaposéva,

upéicha yvypóra oĩ

Ijapohare pópe,

ome'ẽva chupe hembiaporã.

14Ivaíva rovái oĩ iporãva,

mano rovái, jeikove,

imarangatúva rovái, iñañáva.

15Emañami avei

Ñandejára rembiapokuére:

oĩ mokõi-mokõi ojohovái.

16Che, ipaha pegua,

apyta che páype

trígo kytĩha rapykuéri

opopívaicha.

17Ñandejára che rovaságui,

añemotenonde

ha parral mono'õháraicha

amyenyhẽ che parral amiha.

18Pehecha kuaáke

namba'apói hague

che mba'erã añónte,

amba'apo avei opavave

arandu ohekávape guarã.

19Pehendúke ko ha'éva,

tetãgua ruvicha,

pejapysaka che ñe'ẽre,

aty guasu sãmbyhyhára.

Ijehegui aéva

20-21Reikove aja, ani reñemoĩ

avaveichagua po guýpe,

taha'e nde ra'y

térã ne rembireko,

taha'e nde ryke'y

térã ne irũ tee,

ha reguerekóva ani reme'ẽmba,

cháke rembyasýne

ha tupãmba'e járarõ

reikóne.

22Nde ra'y kuérare ho'ave

ojerurévo,

resãingo rangue

nde hese kuéra.

23Ani reheja

avave oñembojára nde rehe

térã reheja

oñemongy'a nde réra.

24Repa potávo ko yvy ári,

emboja'o upe reguerekóva.

25Ne rymba vúrrope guarã

tembi'u, tukumbo

ha mba'e pohýi,

ne rembiguáipe katu

tembi'u, tekombo'e

ha tembiapo.

26Emomba'apo ne rembiguáipe

ha rejuhúta pytu'u,

eheja oiko rei

ha ojetyvyróta nde hegui.

27Guéi ra'y

mba'e pohýi guýpe,

pya'e oñeme'ẽ,

ha tembiguái ate'ỹ,

tukumbo púpe,

28Emomba'apóke,

ani oiko rei,

cháke teko rei ogueru

heta mba'e ivaíva.

29Ejapouka chupe

ojapo kuaáva,

ha ndojapóirõ,

itasã ikupýre ejokua.

30Ani avave ndive

rejopy rasa,

térã rejapo rejapo'ỹ vaerã.

31Peteĩnterõ ne rembiguái,

ndeichaguávarõ ereko chupe,

nde ruguy repykuépe niko

rejogua vaekue.

32Peteĩnterõ ne rembiguái,

ereko chupe ne pehẽnguérõ,

reikotevẽ niko hese,

nde jehe reikotevẽháicha.

33Rereko asýgui okañýrõ,

mamópa rejuhuvéta?