Tobit 12 - Biblia Guaraní con Deuterocanónicos

Tupã remimbou*f** ojekuaauka

1Opa rire vy'a guasu ñemenda rehegua, Tobit ohenói ita'ýra Tobíaspe ha he'i chupe:

—Che ra'y, ehepyme'ẽke pe ne irũ ne ndive oho vaekuépe. Ja'e haguéicha eme'ẽ chupe, ha ikatu voínte rembojo'amive.

2Tobías he'i chupe:

—Che ru, mboy piko ahepyme'ẽta chupe? Ame'ẽ ramo jepe chupe mbytere opa mba'e oñondive rogueru vaekuégui, upéva ndojapo mo'ãi che rehe mba'eve.

3Ha upéi, ha'e che reraha ha che reru jey mba'eve ojehu'ỹre chéve, omonguera che rembirekópe, che pytyvõ aru haguã pe pláta, ha hi'ári, ndéve ave ne monguera. Mba'éicha piko ikatúta ahepyme'ẽ chupe opa ojapo vaekuére?

4Tobit he'i chupe:

—Che ra'y, iporã niko reme'ẽ chupe mbyterénte jepe opa mba'e ogueru vaekuégui.

5Upépe Tobías ohenói Rafaélpe ha he'i chupe:

—Ne rembiapo repykue ramo eraha mbytere umi mba'e jaru vaekuégui, ha tosẽ porãmba ndéve opa mba'e.

6Upéma ramo Rafael ogueraha mokõivépe mombyrymi, ha he'i chupe kuéra:

—Pemomba'e guasu Tupãme ha perohory chupe opavave renondépe, heta mba'e porã ome'ẽ haguére peẽme. Péicharõ maymáva ogueropurahéi ha omomba'e guasúta Tupã réra. Peikuaauka maymávape umi mba'e Tupã ojapo vaekue pende rehe ha pene mandu'a manté hese.

7Mburuvicha guasu omombe'u ramo peẽme peteĩ mba'e ambue oikuaa'ỹva, iporã perokirirĩ. Umi mba'e Tupã ojapóva katu, ñamombe'u vaerã hekópe ha ñamyasãi vaerã ojekuaa haguã opa rupi. Akóinteke pejapo mba'e iporãva, ha mba'e vai ndou mo'ãi pende ári araka'eve.

8Iporãve ñañembo'e karu'ỹ reheve ha tupã mba'e me'ẽ teko joja reheve, jareko rangue mba'e repyeta ha ñande reko aña. Iporãve ñame'ẽ oikotevẽvape ñambyaty rangue óro

9Ñame'ẽ ramo oikotevẽvape nañamano mo'ãi, ha ojeíta ñande hegui ñande angaipa. Ome'ẽva oikotevẽvape oikove pukúta.Tob 4.7-11; Eclo 3.30; 29.8-13.

10Umi iñangaipáva ha heko añáva ijehénte ojapo hína.

11Ko'ágã amombe'úta peẽme peteĩ mba'e ha mba'evete narokirirĩ mo'ãi. Ha'éma kuri peẽme mburuvicha guasúgui peikuaa ramo peteĩ mba'e ojekuaa'ỹva, perokirirĩ vaerãha. Umi mba'e Tupã ojapóva katu pemombe'u vaerã hekópe.

12Nde ha Sara peñembo'e ramo guare, che vaekue pe omoguahẽva Tupã reko mimbipa renondépe opa mba'e pejeruréva.Hch 10.4; Ap 8.3-4. Ha péicha avei ajapo vaekue ne ndive Tobit, reñotỹ ramo umi omano vaekuépe.

13Pe repu'ã ramo meságui ha reheja ne rembi'u reho haguã reñotỹ nde rapicha retekue repena'ỹre mba'evére, che pe añembou vaekue roheko ra'ã haguã.

14Tupã che mbou avei romonguera haguã ndéve ha nde ra'y rembireko Sárape avei.

15Che hína Rafael, Tupã remimbou peteĩ, umi 7 apytégui,Dn 9.21; 10.13; Lc 1.19; Ap 8.2. roĩva Ñandejára reko mimbipa renondépe ha ikatúva roñemboja hendápe.

16Tobit ha Tobías tuicha oñemondýi upéva ohendúvo, ha oñesũ hikuái ombojávo isyva yvýre, kyhyje pópe.

17Tupã remimbou katu he'i chupe kuéra:

—Ani pekyhyje. Py'a guapy aru peẽme. Pemomba'e guasu Tupãme.

18Che aju aiko pende apytépe, ndaha'éi che aipotágui, Tupã oipotágui aju. Chupe pemomba'e guasu ha peropurahéi vaerã opa ára.

19Peẽ che recha ramo jepe akaruha, vaichánte peẽme.

20Upévare pemomba'e guasu Ñandejárape yvy ári ha peropurahéi chupe. Ko'ágã katu che aháta Tupã, che mbouhare, rendápe. Pemoĩ kuatiáre opa umi mba'e ojehu vaekue peẽme.

Ha upéva he'ipávo, oho yvate.

21Ha'e kuéra opu'ãvo ndohecha véima chupe.

22Upéi, purahéipe oñepyrũ omomba'e guasu Tupãme ha omomorã chupe opa umi mba'e hechapyrãva ojapo vaekuére, ha Tupã remimbou ojehechauka haguére chupe kuéra.