Baruc 3 - Biblia Guaraní con Deuterocanónicos

1‘Tupã Israel Jára nde pu'akapáva, ore py'a ruguaite guive ndéve roñembo'e.

2Ore rendu kena ore Jára, ha ore poriahurereko. Rojapo niko ivaíva ne renondépe.

3Nde niko reime upe nde guapyhápe opa árape guarã, ore katu romano ha nda ore rapykuerevéi.

4Tupã nde pu'akapáva, Israel Jára, ehendu kena ore ñembo'e. Ore niko romanótama. Ore ru kuéra ypykue ndojapói vaekue ne ñe'ẽ, Tupã ore Jára, ha upévare ou ore ári ko'ã mba'e vaieta.

5Ani ne mandu'a ore ru kuéra ypykue rembiapo vaikuére. Ne mandu'a uvei ko'ágã nde pokatu ha nde rérare.

6Ndéko Tupã ore Jára, ha ndéve ore romomba'e guasu.

7Nde upe ore atõiva romomba'e ha roñembo'e haguã ndéve. Ha ko roikohápe mombyryguárõ, ndéve romomba'e guasu roipe'águima ore py'apýgui umi mba'e vai ore ru kuéra ypykue ojapo vaekue.

8Ko'ágã roime ko ore mosarambi haguépe, ojejahéi ha oñeñembohoryhápe ore rehe. Ha nde ore nupã hína ore ru kuéra ypykue rembiapo vaikuére, opu'ã vaekue nde rehe, Tupã ore Jára.Tupã rembiapoukapýpe oĩ arandu

9Israel, ehendu ñe'ẽ

ñane moingovéva,

ejapysaka ha eikuaa arandu.

10Mba'ére piko Israel

reime nde rayhu'ỹva retãme?

Mba'ére piko nde tuja

tetã ambuépe?

11Mba'ére piko reñemongy'a*f**

umi omanóva ndive,

ha reime umi ohótava ndive

omanóva ohohápe?

12Péicha ojehu ndéve

reheja haguére arandu yvu.

13Reiko rire Tupã rapére,

py'a guapýpe

reiko vaerã mo'ã opa ára.

14Eikuaána

mamópa oime arandu,

mamópa jajuhu pokatu,

ha mamópa mba'e kuaa.

Péicharõ reikuaáne

Mba'éichapa reikove pukúta,

mamópa rejuhúta

nde rape rehesape haguã,

ha mamópa rejuhúta

py'a guapy.

15Máva voi piko

oikuaa henda?

Máva piko Oguahẽ

oñeñongatuhápe?

16Mamo piko oime

umi tetã oisãmbyhýva

umi tymba ñarõ oheko mbo'éva.

17Ha guyra kuérare

oñemboharáiva

umi pláta ha óro mbyatyha

mayma yvypóra ojeroviaha,

umi ijyvy hetáva,

18umi plátare omba'apóva

avave oikuaa'ỹre

Mba'éichapa.

19Opa umíva ndaipóri véima,

omanombáma,

hendaguépe kuéra

heta jeýma opu'ãva.

20Upéi ou imitãvéva

ha oikove ko yvy apére,

ha ndoikuaáinte avei

arandu rape,

21ndoikuaái Mba'éichapa

oguahẽta hendápe,

ndaikatúi ohupyty, ta'ýra kuéra

mombyry opyta chugui.

22Canaánpe noñehendúi

chugui mba'eve

ndojehechái vaekue Temánpe.

23Agar ñemoñare kuéra

opáicha ohekáva

ko yvy apére

oñemoarandu haguã,

térã ñemuhára

Madián ha Temagua,

térã umi omba'e mombe'úva,

umi arandu ohekáva

ndoikuaái vaekue

arandu rape.

24Tuichaitépa, Israel,

Tupã rekoha,

hetaite mba'épa oguereko

ipo guýpe!

25Tuichaite ha ndaijapýrai!

26Upépe ndaje ymaite

umi hete rusúva

ñorãirõme ikatupyry etéva,

ou ypy vaekue yvy ári,

27Tupã katu

umívape ndoiporavói,

ndohechaukái chupe kuéra

arandu rape.

28Tavýgui umíva

omanomba vaekue,

výrogui oñehundipa.

29Máva piko

ojupi raka'e yvágape

ha araígui omboguejy

pe arandu?

30Máva piko ohasa raka'e

yguasu mboypýri

ha oroitére

ojogua pe arandu?

31Avave ndoikuaái hape,

térã moõ rupípa oheka vaerã,

avave ndaikatúi Oguahẽ

ha'e oĩháme.

32Tupã opa oikuaáva,

ha'e ñoite oikuaa henda.

Ha'e omoĩ hendaguãme ko yvy

ha omyenyhẽ

opaichagua tymbágui.

33Ára ha'e ohenói,

ha iñapysẽ ko'ẽ,

ha'e oipota vove,

ryrýi pópe ojapo hembipota.

34Mbyja kuéra

vy'águi omimbi joa

ha'e omohenda haguépe.

35Ohenóirõ chupe kuéra,

he'i hikuái: “Ápe roime”

ha vy'águi ohesape

Ijapoharépe guarã.

36Upéva hína Tupã

ha ndaipóri ha'eichagua.

37Ha'e oikuaapaite

arandu rape,

ha ome'ẽ hembiguái Israélpe,

tetã Tupã ohayhúva.

38Upéicha arandu

ou ypy vaekue yvy ári,

ha oiko

yvypóra kuéra apytépe.