Judit 6 - Biblia Guaraní con Deuterocanónicos

Holofernes oñemoĩ Aquior rehe

1Okirirĩmbávo umi ijere rupi oĩva, Asírio kuéra ñorãirõhára ruvicha Holofernes, he'i Aquiórpe, umi Moab ha ambue tetãgua rovake:

2“Máva piko nde, Aquior, reñeme'ẽ vaekue hepýre Efraínpe, reñemoĩ haguã ko'ágã maranduhára*f** ramo ha ere oréve ani haguã roñorãirõ Israel retã ndive, ikatúgui Tupã omo'ã chupe kuéra? Oĩ nga'u piko ambue tupã ndaha'éiva Nabucodonosor? Ha'e ipu'akáta hese kuéra ha ohundíta chupe kuéra, ha itupã ndaikatu mo'ãi oipytyvõ chupe kuéra.

3Ore, Nabucodonosor rembiguái, rombokusuguéta chupe kuéra peteĩme ramo guáicha, ha ndaikatu mo'ãi oñemoĩ umi kavaju ári guáre.

4Rohundipaitéta chupe kuéra. Ijyvyty kuérare osyrýta tuguy ha umi ñu henyhẽta te'õnguégui. Ndaikatu mo'ãi oñemoĩ ore rehe. Omanombáta hikuái! Upéicha he'i mburuvicha guasu Nabucodonosor, opa yvy jára! Ha'e oñe'ẽma ha iñe'ẽngue ndopyta rei vaerãi.

5Ha nde, Aquior reñeme'ẽ vaekue Amón guápe ha eréva ko'ã mba'e, nda che recha mo'ã véima aikuaauka peve ko'ã osẽ vaekuépe Egíptogui.

6Che aju jey rire, che ñorãirõhára kuéra ha opa che rembiguái kuéra nde kutúta ikyse puku akuápe, ha remanóta Israelgua kuéraicha.

7Che rembiguái kuéra nde reraháta yvytýpe ha nde rejáta peteĩ táva upe rupiguápe.

8Neremano mo'ãi upepete, remanóta hendive kuéra.

9Ha oimérõ reimo'ã ha'e kuéra noñehundi mo'ãiha, ndaipóri rejepy'apy haguã. Añe'ẽ ha ha'e hagueichaite oikóta.”

Aquior oñeme'ẽ Israelgua kuérape

10Holofernes he'i hembiguái kuérape ojapyhy haguã Aquiórpe, ogueraha ha ome'ẽ haguã Israelgua kuérape Betúliape.

11Hembiguái kuéra ojapyhy Aquiórpe, oguenohẽ ñu gotyo, upe guive ogueraha yvyty peve, Oguahẽ meve umi yvu kuéra oĩva Betulia guýpe.

12Upe yvyty ru'ã guive, umi tavagua ohechávo ojupiha hikuái, oñani ha mba'e ñorãirõrã ipópe osẽ upe távagui yvatevove, upe guive oha'ã itápe ani haguã ha'e kuéra ojupi.

13Upérõ Asírio kuéra ojokua Aquiórpe, ha oheja chupe upépe. Ha'e kuéra katu ojevy huvicha rendápe.

14Israelgua kuéra oguejy itávagui, oñemboja Aquior oĩháme ha ojora chupe. Upéi ogueraha Betúliape, imyakãhára*f** kuéra rendápe.

15Upe ramo, Ozías Miqueas ra'y Simeón ñemoñareguáva, Cabris Otoniel ra'y, ha Carmis Malquiel ra'y vaekue imyakãhára kuéra.

16Ko'ãva ohenoika umi itujavémava tavagua, ha oho avei umi imitãvéva ha kuña kuérava upe atyhápe. Omoĩ hikuái Aquiórpe maymáva apytépe, ha Ozías oporandu mba'épa ojehu chupe.

17Ha'e omombe'u chupe kuéra mba'épa upe oje'éva ha mba'épa ha'e he'i Holoférnespe iñorãirõhára kuéra renondépe, avei mba'éichapa Holofernes iñe'ẽ guasu Israel retãre.

18Opavave oñesũ ha omomba'e guasu Tupãme, he'ívo:

19“Tupã, yvága pegua, emaña umi oñemoha'entesévare ha ore poriahurereko, oñembohorýgui hikuái ore rehe. Ema'ẽ ko árape ore rehe roñemboyke vaekue ndéve guarã.”

20Upéi ombopy'a guapy Aquiórpe ha oguerohory chupe hikuái.

21Ozías oguenohẽ chupe upe atýgui ha ogueraha hógape, ha ojapo peteĩ karu guasu umi itujavémavape guarã. Upe pyhare pukukue ojerure hikuái Tupã, Israel járape, oipytyvõ haguã chupe kuéra.