Judit 10 - Biblia Guaraní con Deuterocanónicos

Judit oho Holofernes rendápe

1Judit, oñembo'epa rire Tupã Israel Járape,

2opu'ã upégui, ohenói hembiguáipe ha oho upe hóga ohasahápe pytu'uha ára ha arete jave.

3Omboi ijao vosakue, ojahu, oñemohyakuã porã, oñakã karãi ha omoĩ ijehe peteĩ jeguaka. Omonde ijao iporãvéva, ojapo haguéicha iména Manasés oikove ramo guare.

4Upéi omonde sapatu, omoĩ kuãirũ, namichãi, mbo'y ha opa umi mba'e jegua oguerekóva. Oñemoporã hesaho haguãicha hese oimeraẽ kuimba'e.

5Ome'ẽ hembiguáipe peteĩ hyru kaguy ha peteĩ hyru ñandyry. Upéi omyenyhẽ peteĩ vosa guasu seváda ku'ígui, mbujape he'ẽ ígo guigua ha mbujape ipotĩva*f** ha ome'ẽ hembiguáipe ogueraha haguã.

6Oho hikuái Betulia rokẽ gotyo ha upépe ojuhu Ozíaspe, avei Cabris ha Cármispe, myakãhára kuéra.

7Ohechávo mba'éichapa Judit ko'ágã oñemonde, ijurujái opytávo hikuái iporãgui, ha he'i:

8—Tupã ñande ru kuéra ypykue Jára ta ne pytyvõ ha tosẽ porãmba ndéve upe reipotáva, ojererohory haguã mayma Israelgua ha Jerusalengua.

9Judit omomba'e guasu Tupãme ha he'i chupe kuéra:

—Peipe'auka chéve táva rokẽ, taha tajapo peẽ pejeháicha chéve.

Ha'e kuéra he'i umi mitã rusúpe oipe'a haguã táva rokẽ, ha'e ojerureháicha.

10Upéicha ojejapo, ha osẽ Judit hembiguái ndive. Umi kuimba'e oma'ẽ hese oguejykuévo upe yvytýgui ha ohóvo upe ñúre, ndojekuaavéi peve.

11Ha'e kuéra oho pe ñúre, ojejuhu peve peteĩ Asírio kuéra aty ndive.

12Umíva ojoko Judítpe ha oporandu chupe:

—Moõgua piko nde? Moõguipa reju ha mamópa reho?

Ha'e he'i:

—Che niko hebréa ha asẽ che retãgui ho'a potáguima hína pende pópe.

13Ahechase pende ruvicha Holoférnespe, amombe'u haguã chupe aikuaáva. Ha'ese chupe moõ rupípa ikatúta oguahẽ umi yvyty ári omano'ỹre peteĩnte jepe iñorãirõhára kuéra.

14Umi ohendúva chupe, ijurujaipa opytávo Judit iporã itereígui. Upéi he'i chupe:

15—Reju haguére rehecha ore ruvichápe neremano mo'ãi. Tereho oikohápe ha ore romondóta ore apytégui nde rerahátava hendápe.

16Anínte reñemondýi reime vove henondépe. Ere chupe reikuaáva, ha ha'e ohecha kuaáta ndéve.

17Oiporavo hikuái 100 kuimba'e oho haguã Judit ha hembiguái ndive Holofernes rendápe.

18Ojekuaa vove oguahẽha oĩháme Asírio kuéra, oñembyatypa hikuái ijerére oha'arõ aja ojeheja chupe oike Holofernes rendápe.

19Oguerohory chupe iporã itereígui, ha he'i hikuái: “Máva piko ojapo'íta tetã oguerekóva ãichagua kuñáme? Iporãvéta jajuka ramo opa kuimba'e ha'e kuéravape. Peteĩnte jepe opyta ramo, ikatúta omoĩ ipo guýpe opavavépe.”

20Umi Holofernes jere rupi oĩva, hese oñangareko haguã, ha mayma oĩva guive hendive, osẽ ha he'i Judítpe oike haguã.

21Holofernes oñeno hupápe. Hi'ári omo'ã chupe peteĩ poyvi pytã ojeguáva órope, ha ita ojegua ha overapávape.

22Oñemombe'úvo chupe Judit oĩmaha upépe, ha'e opu'ã ha oho pe okẽ meve. Henonderã ohesape chupe mba'e rendy pláta guiguápe.

23Judit oñembojávo henondépe ha ipytyvõhára kuéra renondépe, ha'e kuéra opyta ijurujaipa, ohechávo mba'éichapa iporã ko kuña. Ha'e katu oñakãity ha oñesũ henondépe. Holofernes rembiguái kuéra katu pya'e omopu'ã jey chupe.