Isaías 34 - Biblia Guaraní con Deuterocanónicos

Tetã nguéra ñembojovake

1Peñemboja tetã nguéra

pehendu haguã:

Pejapysaka porã tetãgua!

Yvy ha opa mba'e ipype oĩva,

yvy tuichakue ha opa mba'e

chugui osẽva, pehendu!

2Ñandejára ipochy hína

opa tetã

ha iñorãirõhára ndive.

Omboykéma chupe kuéra

ñehundirã,

ha ojejuka haguã

ohejáma chupe kuéra.

3Umi te'õngue

oñemombo okápe,

opu'ã pe inengue

ha umi yvytýre osyry tuguy.

4Kuarahy, jasy

ha mbyja kuéra

oiko yvy tĩmbo ramo

ha kuatiáicha

oñembyapakua yvága.

Mbyja kuéra ho'apáta

okuiháicha parral

ha ígo rogue piru.

5Péina che kyse puku

oka'úvaicha

yvágagui oguejýta

Edom ári,

che ha'émava

oñehundi ete haguã.

6Che kyse puku

tuguýgui henyhẽ,

kyrakuépe oñemonamba,

ovecha ha kavara mácho ruguy

ha pitikiri'ĩ kyra kuéicha,

che ajapógui

mymbajuka*f** Bosrápe,

jejuka guasu Edómpe.

7Tóro saite rangue

ho'áta pe tetã

ha tóro rangue

tetãgua py'a guasu.

Pe yvy,

tuguýpe oka'úta

ha kyra kuépe oñemonáta.

8Ha'égui ñemyengovia ára

Ñandejárape guarã,

ñemyengovia áño

Sión Mo'ãhára peguarã.

9Hi'ysyry kuéragui

oikóta vléke,

ijyvy timbógui asúfre,

ha ijyvy hendýta vlékeicha,

10ára ha pyhare ogue'ỹtava,

ha opa ára hatatĩva.

Upépe ndojeiko mo'ãi

maramove,

upe rupi ndojehasa mo'ãi

araka'eve.

11Hese oñemomba'éta

kavure'i ha suinda,

upépe oikóta

urukure'a ha yryvu.

Ñandejára hi'ári oipysóta

sarambikue ha mba'eve'ỹ.

12Mburuvicha kuéra

nomoĩ mo'ã véima avavépe

mburuvicha guasúrõ

ha mburuvicha guasu kuéra

ojejukapáta.

13Hóga guasu kuérape

okakuaáta karaguata,

hóga mbarete kuérape,

pyno ha ñuatĩ.

Oikóta chugui kuéra

aguara'i rekoha

ha ñandu guasu raity,

14upépe oñembyatýta

jaguarete'i ha aguara guasu,

upépe aña nguéra oñohenóita

ha upépe avei karai pyhare opytu'úta

ha upépe ovy'áta.

15Upépe mbói kuéra

ikuára oguerekóta,

ombo'a ha ombojáta hupi'a.

Taguato kuéra avei

upépe oñembyatýta,

oñondive mácho ha kuña.

16Peipyguara

Ñandejára kuatia

ha pemoñe'ẽ.

Peteĩ jepe umi mymba

naipore'ỹi,

ndaipóri iñirũ'ỹre opytáva,

péicha he'i haguére Ñandejára

ha ha'e voi chupe kuéra ombyaty.

17Ha'ete chupe kuéra

pe yvy omboja'o,

ha peteĩ-teĩ hendaguãme omoĩ.

Ha'e kuéra oguerekóta

imba'erã opa árape guarã,

upépe oikóta ára pave'ỹ meve.