1Umi tetã ijereregua, oikuaávo Israel omopu'ã pyahu jey hague itupao ha omyatyrõ hague altar ipypegua, ipochy eterei hikuái,
2ha oñemoĩ peteĩ ñe'ẽme ojukapa haguã umi Israelgua, Jacob ñemoñare, oikóva ijapytépe kuéra; ha oñemoĩ hikuái ojuka peteĩ-teĩme ojukapaite haguã.
3Aipo ramo, Judas oho Iduméape, Acrabaténepe, oguerekóma haguépe hína ipópe kuéra umi Israel guápe, ha ondyry Esaú ñemoñare kuérare. Omona yvýre umi Idumea guápe ha oipe'a chugui kuéra imba'eta.
4Upépe Judas imandu'a avei umi Beón guáre, manterei ohape ra'arõ ha omoñuhãva Israelgua kuérape.
5Omyaña umívape oikepa haguã hóga guasu kuérape, oity hese kuéra ñe'ẽ haru ha ombojepota hese kuéra tata, ohapypa umi óga mbarete ipypegua reheve.
6Upégui ohasa amoníta kuéra retãme, ha upépe ojejuhu peteĩ ñorãirõhára aty renondépe, imbaretéva ha omyakãva mburuvicha hérava Timoteo.
7Heta ñorãirõme oheja chupe kuéra yvýre ha ohundi,
8ha omoĩ rire yvy Jazer Israel poguýpe, Judas ojevy Judéape.
Judas oñorãirõ Galiléa ha Galaádpe(2 Mac 12.10,31)9Umi heko jeroviaha'ỹva Galiléa pegua, oñemoĩ hikuái peteĩ ñe'ẽme ojeity haguã Israelgua kuérare, oikóva upépe. Ha'e kuéra katu osẽ oho oñemohatã oka guasu mbarete hérava Datemápe,
10ha upe guive omoguahẽ Judas ha tyke'ýra kuérape kuatia he'íva: “Heko jeroviaha'ỹva ore mbojeréva hína oñemoĩ peteĩ ñe'ẽme ore jukapa haguã.
11Oñembosako'íma hikuái ou haguã ore ári ko óga mbarete rokañy haguépe. Timoteo omyakã chupe kuéra.
12Peju ore pe'a jejopy vaígui, ore apytépe hetáma oime omanóva.
13Umi ore pehẽngue oiko vaekue Tobíaspe ojejukapáma, oguerahapa kuña ha mitã nguérape ha oipe'apa chugui kuéra oguerekóva. Ha 1.000 rupíma omano upépe”.
14Ohecha gueteri hikuái pe kuatia oñemoguahẽ vaekue chupe kuéra, oguahẽ-guahẽve ramo Galiléagui tembijokuái ijao soropáva ko marandu reheve:
15Umi Tolemaidagua, Tiro ha Sidongua ha umi heko jeroviaha'ỹva Galiléa pegua, ojoaju hikuái ore jukapa haguã.”
16Ohendúvo ko'ã mba'e, Judas ha iñorãirõhára kuéra oñembyaty hikuái ohecha haguã mba'épa ojapóta ipehẽngue kuéra rehehápe, ojejopy vaietéva hína ija'e'ỹva hese kuéra pópe.
17Judas he'i ipehẽngue Simónpe: “Eiporavo peteĩ atýra ñorãirõhára ha tereho Galiléape eipe'a ojejopyhágui umi ñane pehẽnguépe. Ñane pehẽngue Jonatán ha che katu rohóta Galaad retãme.”
18Ñorãirõhára hembýva katu oheja Judéape, José Zacarías ra'y ha Azarías pópe, mokõivéva karia'y oñemomba'éva tavagua pa'ũme.
19Ha he'i chupe kuéra: “Pepyta pe ñangareko táva guáre, anínteke peñorãirõ umi heko jeroviaha'ỹva ndive roju peve.”
20Simónpe oñeme'ẽ 3.000 ñorãirõhára oho haguã Galiléa ári ha Judas katu 8.000 reheve oho Galaádpe.
21Aipórõ, Simón oho Galiléape ha ondyry umi heko jeroviaha'ỹvare, oheja vaipaite,
22ha omuña chupe kuéra Tolemaida rokẽ meve. Umi tekove jeroviaha'ỹ oheja hikuái haimete 3.000 ha'e kuérava re'õngue, ha Simón oñemomba'epaite opa imba'e kuerakuére.
23Upéi ombyaty umi Israelgua oĩva Galiléa ha Arbatápe hembireko ha ta'ýra kuéra ndive, ha oguerahapa Judéape opa mba'e oguerekóva reheve tuicha vy'ápe.
24Judas Macabeo ha ipehẽngue Jonatán katu upe aja ohasa hikuái ysyry Jordán ha oguata mbohapy ára pukukue yvy ojeiko'ỹháre.
25Upépe ojojuhu peteĩ atýra nabatéo ndive, ohechaukáva omoguahẽva chupe kuéra py'a guapýpe, ha omombe'úva chupe kuéra opa mba'e ojehúva Galaádpe hetãgua Israelgua kuérape,
26heta ha'e kuérava oimeha oñemboty Bosrápe, Bosor, Alema, Caspín, Maqued ha Carnáinpe, opavave táva guasu imbaretéva.
27He'i avei hikuái, umi ambue táva guasúpe oimeha avei heta Israelgua oñemongoráva, ha umi hese kuéra ija'e'ỹva oñombosako'iha hikuái ojeitývo hese kuéra pe ára oúvape, ojukapaite haguã chupe kuéra upe árape voi.
28Upepete voi Judas ha iñorãirõhára kuéra opu'ã ha oipyhy tape Bosrá gotyo. Judas ojeity upe táva guasúre, ojukapa kysépe kuimba'éva guive ha omondapa, upéi katu ohapy.
29Pyhare vove, oñemomýi hikuái ha oho táva mbarete Datemápe.
30Ko'ẽmbávo ohecha hikuái oĩmaha ondyrýva pe táva mbaretére: oguereko hikuái jupiha ha umi mba'e ojeporúva oñeñorãirõ hatãve haguã.
31Judas ohecha kuaa oñepyrũma hague ñorãirõ ha upe táva guasu guive opu'ãha yvágare ayvu guasu ñorãirõ rehegua.
32Ombopuka turu ha he'i iñorãirõhára kuérape: “Peñorãirõ ko árape ñane pehẽngue kuérare!”
33Mbohapy henda rupi oñemboja hapykue guio umi hese kuéra ija'e'ỹvare. Ombopu turu ha sapukáipe oñembo'e hikuái ojerurévo pytyvõ Tupãme.
34Timoteo ha iñorãirõhára kuéra, ohecha kuaávo Macabeoha pe oúva hi'ári kuéra, oñemondyipa hikuái ha Judas omona chupe kuéra yvýre. Isarambipa hikuái ha oheja hapykuerépe 8.000 te'õngue rupi.
35Upégui Judas oho Alema gotyo, ojeity hese ha omoĩ ipoguýpe, ojukapa kuimba'évape guive ha upéi omondapa ha omboja tata upe táva guasúre.
36Upe rire ohasa tenonderã ha omoĩ ipoguýpe Caspín, Maqued, Bosor ha ambueve táva upe Galaad yvy pegua.
37Kóva rire katu, Timoteo ombyaty hetaiteve ñorãirõhára ha oho opyta Rafón renondépe, peteĩ ysyry mboypýri.
38Upe guive Timoteo omondo oma'ẽ ma'ẽ vaerã umi hese kuéra ija'e'ỹva rekoha rupi, ha umíva ou omombe'u, umi heko jeroviaha'ỹva upe jereregua oñemoirũmbaite hague Timoteo rehe, ha heta ha imbareteha hikuái;
39ha ijapytépe kuéra oĩha avei heta Arabiagua oipytyvõva chupe kuéra, ha oĩha hikuái ysyry mboypýri ondyry haguãicha hese kuéra. Upémarõ, Judas osẽ ohenonde'a chupe kuéra.
40Timoteo ohecha, Judas ha iñorãirõhára kuéra oñembojaha ohóvo pe ysyrýre, ha he'i imburuvicha kuérape: “Judas ohasárõ pe ysyry ñande mboyve ha ondyry ñande rehe, ndaikatu mo'ãi jajapo mba'eve ha ñande rejáta yvýre.
41Okyhyjérõ ha opyta pe ysyry rembe'ýpe katu, ñande jahasáta ha ñandyry hese kuéra jajukapa haguã.”
42Judas oñembojávo pe ysyry rembe'ýpe ombohysýi imburuvicha kuérape ha he'i ani haguã oheja hikuái avavépe oñembyaty upépe, ojeho haguã tenonderãvo.
43Aipórõ, Judas tenonderã ha iñorãirõhára kuéra hapykuéri ohasa hikuái pe ysyry, ondyry umi heko jeroviaha'ỹvare, opoíva pýgui ha oho okañymba hikuái Carnáin tupaópe.2 Mac 12.26.
44Israelgua kuéra oike upe táva guasúpe ha ohapy upe tupao ipype oĩva guive reheve. Ha péicha omoĩ ipoguýpe Carnáin. Upe rire, avavéma ndaikatuvéi ojapo mba'eve Judas renondépe.
45Judas ombyaty Israelgua oĩva guive Galaádpe, tembireko, mitã nguéra, opa oguerekóva reheve, oguerahapa haguã Judéape. Heta etei hikuái.
46Oho ha oguahẽ hikuái Efrónpe, peteĩ táva tuicháva ha imbaretéva, opytáva hapépe. Ndaipóri ambue tape ohasa haguã, upe rupi mante.
47Umi Efrongua katu ndohejái chupe kuéra ohasa; itápe ombotypa hikuái pe táva rokẽ.
48Judas omondo he'i vaerãme: “Rohasasemínteko pene pa'ũ rupi roguahẽ haguã ore retãme. Avave ndojapo mo'ãi pende rehe ivaíva. Rohasasemínteko.” Ha'e kuéra katu ndohejái ohasa.”
49Aipórõ Judas omomaranduka iñorãirõhára kuéra, peteĩ-teĩ opyta haguã hendápe.
50Oñemoĩ hikuái oñorãirõ haguãicha ha ojeity hese kuéra upe ára pukukue ha upe pyhare, ho'a peve upe táva guasu ipópe kuéra.
51Judas ombohasauka kyse puku rupi kuimba'éva guivépe, omondapa ha oheja yvýre ha ohasa hikuái te'õngue ári.
52Upégui oho ohasa ysyry Jordán ha oguahẽ pe ñu guasu Bet-Seán renondépe oĩvape.
53Tape pukukue, Judas ombyaty umi itapykuévape ha oporomokyre'ỹ, oguahẽ peve hikuái Judéape.
54Ojupi hikuái yvyty Siónpe ha oikuave'ẽ mymbahapy ojevy haguére hetãme hesãi joa ha omano'ỹre avave.
Oñesẽ vai ha oñesẽ porã ave(2 Mac 12.32-45)55Judas ha Jonatán oñorãirõ aja hikuái Galaádpe, ha Simón katu Galiléape, Tolemaida renondépe,
56José, Zacarías ra'y, ha Azarías, ñorãirõhára ruvicha mokõivéva, opyta ra'e Judéape. Oikuaávo ambue kuéra Israelgua ojapóva, umi ñorãirõháme,
57he'i hikuái ojupe: Ñañemoherakuã guasu avei Ñande! Jaha ñañorãirõ umi ñande jereregua heko jeroviaha'ỹva ndive!”
58Upémarõ omopu'ã hikuái umi ñorãirõhára omyakãva ha'e kuéra ha ondyry Jábniare.
59Gorgias katu, iñorãirõhára kuéra reheve osẽ ohuguãitĩ chupe kuéra.
60Ha omboguevi José ha Araríaspe. Omuña chupe kuéra Judea rembe'y peve. Upe árape omano 2.000 Israelgua rupi.
61Ha péicha osẽ vaiete vaekue Israel retãgua, nohendúi haguére Judas ha ityke'ýra kuérape, oimo'ãgui ikatupyry etereiha.
62Ha'e kuéra katu ndaha'éi ete voi umi Israélpe oipe'a vaekue jejopy vaígui rehegua.
63Judas, ipy'a guasuetéva, ha tyke'ýra kuéra herakuã mbuku Israel tuichakue ha umi heko jeroviaha'ỹva retãme, mamo oñehenduhápe oñemandu'a hese kuéra.
64Opavave ojeréva hese kuéra oguerohory haguã.
65Judas ha ipehẽngue kuéra oho ondyry Esaú ñemoñare kuérare, yvývo gotyo. Omoĩ ipópe kuéra Hebrón ha itava'i kuéra, oitypa hóga mbarete kuéra ha ohapypa umi óga yvate oĩva ijerére.
66Upéi oho umi filistéo retãme, ohasávo Maresá rupi.
67Upe árape ho'a ñorãirõháme peteĩ atýra pa'i, mba'e guasu ojaposégui osẽ vaekue hikuái oñorãirõvo oñeñangareko porã'ỹre.
68Upéi Judas opia Azoto gotyo, umi filistéo retãme, ha upépe oitypa umi altar teko jeroviaha'ỹ megua, ohapypa itupã ra'ãnga kuéra, omondapa upe táva guasu, ha upe rire oho jey Judéape.
Who We AreWhat We EelieveWhat We Do
2025 by iamachristian.org,Inc All rights reserved.
