Sabiduría 10 - Biblia Guaraní con Deuterocanónicos

Pe Arandu Adán guive Noé peve

1Arandu oñangareko vaekue

yvypóra ru ypykuére,

ha'eño vaekue upe ramo,

ho'a rire ivaívape

oipytyvõ vaekue

2ha omombarete

oguereko haguã

ipo guýpe opa mba'e.

3Ha peteĩ heko joja'ỹva,

heko pochýgui

ojei vaekue Arandúgui,

tyvýrape ojuka haguére

oñehundi.

4Yvypóra rembiapo vaikuére,

y oñuã yvy tuichakue,

ha Arandu jey oguenohẽ

jejopy vaígui heko jojávape

yvyra pehẽngue ári.Abraham guive José peve

5Tetã nguéra

ndojokupyty véimarõ

hembiapo vaikuére,

Arandu jey oiporavo

heko jojáva,

ha marã'ỹme oguereko chupe

Ñandejára renondépe

ha omombarete chupe

ojapo haguã Tupã rembipota,

ta'ýrape ohayhúrõ chupe.

6Oñehundi ramo hína

iñañáva,

Arandu omo'ã

peteĩ heko jojávape,

tata ho'a vaekuégui

5 táva ári.

7Umi heko aña nguéra

ojekuaa haguã

hatatĩ gueteri hína

umi táva ikusuguepa vaekue,

yvyra hi'áva ndahi'ajúi,

ha mandu'arã

peteĩ ojerovia'ỹ vaekuére,

hetégui oiko juky.

8Ojei haguére

Arandu rapégui

Umíva kuéra ndaikatuvéi

oikuaa mba'eve iporãva,

ha oheja mandu'arã itavykue,

ani haguã oiko tesarái

ijejavykuégui.

9Arandu katu oguenohẽ

kane'õgui

hayhuhára kuérape.

10Arandu oisãmbyhy

tape porãre

upe heko jojávape, okañýva

ityvýra pochýgui,

ohechauka chupe Tupã renda,

ha oikuaauka chupe

mba'e imarangatúva,

ohovasa chupe opa ojapóvape

ha omyakã rapu'ã chupe.

11Omo'ã chupe

imba'e potávagui

ha ome'ẽ chupe heta mba'e.

12Omo'ã

umi hese ija'e'ỹvagui,

ha ndohejái

ojehape ra'arõ;

oguenohẽ porã

ñorãirõ vaígui,

oikuaa haguã

poriahurereko

imbareteveha opa mba'égui.

13Ndohejái ha'eño

heko jojáva

oñeme'ẽ vaekue hepýre,

ha oipe'a chupe teko vaígui.

14Omoirũ chupe

ojejopyhápe,

ha ndohejái yvyrakuápe,

ojapo peve chugui

tetã sãmbyhyhára,

ha ipu'aka ijopyha kuérare,

péicha omyesakã

ijapúva rembiapo

ha ome'ẽ chupe

vy'a opa'ỹva.Israel ha Moisés

15Arandu oguenohẽ

ojejopyhágui

ne retãgua marangatu

imarã'ỹvape.

16Oike peteĩ Ñandejára

rembijokuái py'apýpe

ha omoñemoĩ mburuvicha guasu

ojekyhyjeháre,

mba'e rechapyrã reheve

ha techaukaha

ñaimo'ã'ỹva reheve.

17Ohecha kuaa

imarangatúva jehasa asykue,

ha omboguata chupe kuéra,

peteĩ tape ojajaipávare,

arakuépe kuarahy'ã,

ha pyharekue mbyja rendy.

18Ombohasa chupe kuéra

Mar Rojo

ha yguasu pochy mbyte rupi,

19hese kuéra

ija'e'ỹvape katu

omboyguy ha

upéi omombo okápe

yguasu pypuku ruguágui.

20Ha péicha heko jojáva

oñemomba'e

heko jerovia'ỹva mba'etáre

ha ogueropurahéi

nde réra marangatu,

ore Jára,

omomorãvo nde pyapy pokatu.

21Arandu omoñe'ẽ

iñe'ẽngúvape

ha oikytĩ ikusã mitãme.