Eclesiástico 35 - Biblia Guaraní con Deuterocanónicos

Tembiapoukapy ha mymbajuka*f**

1Ñandejára

rembiapoukapy apo

ha'ete heta mba'e kuave'ẽ,*f**

hembiapoukapy ñembyaje

ha'ete

mymbajuka joajurã.

2Jehepyme'ẽ iporãvare

ha'ete

trígo iporãvéva kuave'ẽ,

ha tupãmba'e me'ẽ, ha'ete

mymbajuka hyakuã asýva

Ñandejárape.

3Ivaívagui jajeírõ

ñambovy'a Ñandejárape,

teko joja'ỹgui japoírõ

ha'ete

mymbajuka ojeheja rei haguã

ñane angaipa.

4Ani reñemboja po nandi

Ñandejára renondépe,

péicha niko he'i

Ñandejára rembiapoukapy.

5Imarangatúva mymbajuka

omongyrárõ upe altar,*f**

hyakuã porãngue ojupi

upe Yvatetegua rendápe.

6Imarangatúva mymbajuka

ojererohory,

ha tesaráipe ndopyta mo'ãi

imba'e kuave'ẽ.

7Nde po jeráke

remomba'e guasúvo

Ñandejárape,

ha ani ne rakate'ỹ

reikuave'ẽvo chupe

nde koga'a tenondere.

8Opa mba'e reikuave'ẽvape

ta nde rova rory,

ha vy'apópe eme'ẽ

upe 10gui peteĩ.

9Eme'ẽ upe Yvatete guápe

ha'e ome'ẽ haguéicha ndéve,

eme'ẽ heta porã

ndéve ikatuháicha.

10Ñandejára niko

ohepyme'ẽ kuaa

ha hetavépe omyengoviáta

ndéve.

11Ani rembopopeguase chupe,

cháke ha'e upéva

ndoguerohorýi,

ha ani rejerovia

mymbajuka hekopegua'ỹre.

12Ñandejárako hína

mbojovakeha heko jojáva

ha avavépe

nombojeroviái hekope'ỹ.

13Poguasu rehehápe

ndoapo'íri mboriahúpe,

ha ohendu ojejopýva

rembijerure.

14Nomboykéi tyre'ỹme

ojerurérõ,

térã imenave'ỹvape

ipyahẽrõ.

15Imenave'ỹva resay,

ndaha'éipa

hováre osyrýva,

isapukáipa ndojupíriva

upe chupe oñohẽkávare?

16Ñandejárape

omomba'e guasúva,

ojererohory,

ha imba'e jerure

oguahẽ yvága peve.

17Mboriahu ñembo'e

ohasa arai,

ha oguahẽ meve ijapýpe

ndopytu'úi.

18Naikane'õi

upe Yvatetegua oike peve

ombojovake haguã

imarangatúvape,

ha ojapo upe ipo jojáva.

19Ñandejára

ndaitapykue mo'ãi,

ha ndoikuaase mo'ãi mba'eve

heko añávagui,

20omyangu'ipa peve

umíva pokatu

ha omyengovia hembiapokuére

tetã nguérape,

21Ohapo'o peve

itĩ atãva atýra,

ha omopẽmba peve

heko añáva pokoka.

22Nomyengoviái peve

yvypórape hembiapokuére,

ha peteĩ-teĩme

upe iñakãme oguerekóvare,

23ojapo peve ipojojáva

hetã guápe,

ha ombovy'a chupe

ipy'a poriahurerekópe.

24Iporãitépa

pe poriahurereko,

vy'a'ỹ jave!

Ha'ete arai ama reruha

aréma ndokyvéirõ.