Sabiduría 9 - Biblia Guaraní con Deuterocanónicos

Ñembo'e ojehupyty haguã arandu

1Tupã

ore ru kuéra ypykue Jára,

reporoporiahurereko kuaáva,

ne ñe'ẽme

rejapo vaekue opa mba'e,

2ha ne arandu rupi

rejapo yvypórape,

oguereko haguã ipo guýpe

opa rejapo vaekue,

3oisãmbyhy haguã ko yvy

marangatu ha teko jojápe,

ha ome'ẽ haguã hekópe

peteĩ-teĩme imba'éva:

4Eme'ẽ chéve pe arandu

nde guapyhápe oĩva,

ha anítei che pe'a

nde ra'y kuéra apytégui.

5Che ha'égui ne rembijokuái,

ha ne rembijokuái membyre,

yvypóra ikangy

ha oikove puku'ỹva,

ikatu'ỹva oikuaa teko joja

ha ne rembiapoukapy.

6Ha oĩrõ jepe

heko porã ha ojavy'ỹva,

ndoguerekóirõ pe arandu

nde hegui oúva,

ndaha'éi mba'evete.

7Nde che poravo vaekue

ne retã ruvicharã,

aisãmbyhy haguã

nde ra'y ha rajy kuéra,

8ha ere chéve

ajapo haguã tupao

nde yvyty marangatúpe

ha peteĩ altar

ko táva reikohápe,

ojoguáva pe Tekoha

marangatúpe

rembosako'i vaekue

iñepyrũha guive.

9Ne ndive oĩ pe arandu,

ne rembiapokue oikuaáva,

ha oĩ vaekue nde ykére

rejapóvo ko yvy,

ha'e oikuaa umi mba'e

nde rehayhu ha ne mbovy'áva,

ha ne rembiapoukapy

he'iháicha oikóva.

10Embou

pe yvága marangatúgui,

nde guapyha omimbipávagui,

ha'e omba'apo haguã

che ykére

ha che mbo'e haguã

reipotávare

11upéicha ramo ha'e,

oikuaa porãva opa mba'e,

hekopete che sãmbyhýne

opa ajapóvape,

ha che rehe oñangarekóne

heko mimbipápe.

12Péicharõ iporãne ndéve

che rembiapokue,

aisãmbyhýne ne retã

teko jojápe,

ha namotĩ chéne

che ru guapyha.

13Máva piko ikatu oikuaa

mba'épa ojapo Tupã,

térã oimo'ã

mba'e mba'épa oipota?

14Yvypóra remiandu niko,

ndaha'epái jeroviaha,

ha na'añetepái.

15Ñande rete ituju vaerãva

ñane ángape ipohýi,

ha ojopy ñane apytu'ũ

jepy'apy opaichaguápe.

16Hasy jaikuaa haguã

opa yvy ári oĩva,

ha pe ikatúva jahupyty

hasýpe ñamyesakã,

ha oimépa ohecha vaekue

mba'épa yvágape oĩ?

17Máva nga'úpa oikuaáta

ne rembipota,

nde voi nereme'ẽi rire,

pe arandu

ha rembou pe yvatégui

ne espíritu marangatu?

18Péicha rupi naikarẽvéi

yvypóra rape

ha upéicha ha'e oikuaa

ne rembipota,

ha arandu rehe ae osẽ

jejopy vaígui.