Bharuku 4 - Shona Common Language Catholic Bible（SCLBD）

1Ungwaru ndihwo bhuku

romutemo yaMwari

nomurao unogara nokusingaperi;

vanoramba vakabatirira pahuri vachararama,

vanoukanda pasi vachafa.

2Pindukai, vokwaJakobho muhutore

muende kuchiedza chokupenya kwahwo,

3musape mbiri yenyu kune mumwe

kana kupa zvinokubatsirai imi kunomutorwa.

4Inga zvedu nhaimi, isu vaIsiraeri

nokuti tinoziva zvinoda Mwari.

5Tsungai mwoyo vanhu vangu

imi vacho munoita kuti Isiraeri

igare ichirangariwa.

6Chamakatengeserwa kumarudzi

kwakanga kusiri kuti muparadzwe,

makaiswa imi mumaoko avavengi venyu

pamusana pokuti makanga mashatirisa Mwari.

7Makadenha musiki wenyu

nokupira kwamakita kumweya

yakaipa muchirega kupira kuna Mwari.

8Makakanganwa Chidzachepo

akakurerai, mukatsamwisa Jerusaremu rakakukudzai.

9Rakaona hasha dzaMwari

dzakakuwirai dzichibva kuna Mwari

rikati, ‘Teererai imi vavakidzani neZioni,

Mwari andiunzira zvinondirwadza mwoyo.

10Chikonzero chacho ndechokuti

ndakaona ini kutapwa kwavana vangu

vakomana navasikana kwakauiswa pavari naChidzachepo.

11Ndakavarera ini nomufaro; asi

ndakasuruvara kukuonai muchienda

ndiine misodzi padama.

12Ngaparege kuva zvapo naanopembera

nokundifarirawo zvangu

ini chirikadzi ndakafirwa navakawanda.

Ndakasiiwa ndisina chandinacho

pamusana pezvitadzo zvavana vangu

chikonzero chacho chiri chokuti

vakafuratira mutemo waMwari.

13Havana kuita hanya nokuziva mirao yake

havana kufamba namakwara

emitemo yaMwari

kana kutevedza nzira dzokuzvibata

dzinodzidziswa noururami hwake.

14Dai imi vavakidzani veZioni

mangouyawo zvenyu waro

murangarire kutapwa

kwavana vangu vakomana navasikana

kwakauiswa pavari naChidzachepo.

15Nokuti akavaunzira rumwe rudzi rwaibva kure,

rudzi rwavanhu vasinganyari

vane mutauro usingazivikanwi

vakanga vasingaremekedzi munhu wakura

uye vasina tsitsi navacheche.

16Vakatinha vanakomana vapamwoyo vechirikadzi

vachiuraira mukadzi anongova oga vanasikana vake.

17Ko ini chiiwo zvangu chandingakubatsirei nacho.

18Nokuti iye akauisa matambudziko pamuri,

ndiye achakununurai mumaoko avavengi venyu.

19Endai zvenyu vanangu, endai

nokuti ndasara ndisisina chandinacho.

20Ndakabvisa zvinopfekwa nguva yorugare

ndikapfeka masaga okuratidza kuteterera kwangu,

ndichashevedzera kuna Chidzachepo

upenyu hwangu hwose.

21Tsungai mwoyo vanangu

mucheme kuna Mwari,

ndiye achakununurai mukudzvinyirira kwenyu,

nomumaoko avavengi venyu.

22Chiripo ndechokuti

ndakaisa chitarisiro changu

chokununurwa kwenyu kunaChidzachepo

nokuti ndiye achakununurai.

Ndakawana rufaro runobva kunaMutsvenemutsvene

pamusana petsitsi dzamuchaitirwa

noMununuri wenyu wokugara nokugara.

23Ndakasuruvara kukuonai muchienda

ndiine misodzi padama

asi Mwari achakudzorerai kwandiri

norufaro nokusingaperi.

24Sokuona kwakaita vavakidzani veZioni

kubatwa kwenyu,

vachaonawo kununurwa

kwamuchaitwa naMwari.

Kuchauya kwamuri nembiri huru

uye nokupenya kwaChidzachepo.

25Vanangu shirirai zvenyu nemwoyo murefu,

chirango chakauya pamuri chichibva kuna Mwari

vavengi venyu vakubatai zvavo

asi muchaona zvino uno kuparadzwa kwavo

muchatotsika pamitsipa yavo.

26Vana vangu vakanga vakagarika zvavo

asi nzira dzavakazoenda nadzo dzakaomarara,

vakaendwa navo sedanga rezvipfuwo

rakapambwa nomuvengi.

27Tsungai mwoyo vanangu

mucheme kuna Mwari,

iye akakuunzirai izvi pamuri,

achakurangarirai.

28Kutsauka kwamakaita panaMwari

saizvozvowo pindukai mutsauke

neshungu dzakapetwa kagumi

29nokuti iye akaunza matambudziko

iwaya pamuri,

achakuunzirai rufaro rusina mugumo

pamwechete noruponeso rwenyu.’

30Tsunga mwoyo iwe Jerusaremu

nokuti akakutumidza zita

achakunyaradza.

31Vachapinda pfumvu

vakakuonesa nhamo

vachifarira kuputsika kwako.

32Achapinda nhamo, maguta

emakaitira vana vako uranda.

Guta rakagamuchira vana vako

richapinda nhamo

guta rakagamuchira vanakomana vako.

33Sokupemberera kuputsika kwako

nokufarira kuparara kwako

richarwadziwa nokuparara kwaro.

34Ndichabvisa chavanozvikudza nacho ichocho

chakuwanda kwavanhu,

kuzvitutumadza kwaro kuchasanduka

kukava kusuruvara.

35Richanzi ririri nomoto unobva

kunaChidzachepo kwamazuva mazhinji

uye maari muchagara mweya yakaipa

kwenguva huru.

36Tarisa kumabvazuva, iwe Jerusaremu

uone rufaro ruri kuuya kwauri

ruchibva kuna Mwari.

37Tarisa uone vavakudzoka vana vako vawakaendesa,

vavakudzoka vachikokorodzwa

kubva kumabvazuva nokumadokero.

Pamusana peshoko raiye Mutsvenemutsvene,

vanouya vachipembera nokufara

nomukurumbira waMwari.