Sira 30 - Shona Common Language Catholic Bible（SCLBD）

Kuyarutsa vana

1Anoda mwana wake mukomana

anogaromubatira shamhu,

kuitira kuti mangwana azofadzwa naye.

2Anodzidzisa mwana wake mukomana

achawana mubairo wake

achizvikudza naye pana vamwe vake.

3Anodzidzisa mwana wake mukomana

anosakisa muvengi wake kuti

amuitire shanje

uye achadada naye pakati peshamwari dzake.

4Kana baba vakafa vanoita savasina kufa,

nokuti vanosiya akafanana navo.

5Vachiri vapenyu vaifara nokumuona,

vafa hapana chavanogunun'una nacho mumwoyo.

6Vakasiya munhu anovatsividzira vavengi

nowokudzorera kandiro kwakabva kamwe

kushamwari dzavo.

7Baba vanoregerera mwanakomana wavo

vachazova nebasa rokumusunga maronda,

vakangonzwa kunochemwa chete, mwoyo wavo unomira mudenga.

8Bhiza risina kunyatsopingudzwa hariteereri,

ndizvowo zvine mwana mukomana asina kudzikamiswa,

anoita musikanzwa.

9Jaidza mwana, iye achakukatyamadza

ita zvokutamba naye, iye achakuchemedza.

10Rega kuita zvokuseka naye, newewo hauzochema naye

wopedzisira nokuzvidya mwoyo.

11Usamurege achiita zvaanoda pauduku hwake

kana kuita sousingaoni zvako kukanganisa kwake.

12Mupingudze achiri muduku,

mutwasanudze mativi asati akura,

angadaro akazokura ari tsvuuramuromo, asingateereri

akazokuitira zvinokuodza mwoyo.

13Yarutsa mwana wako mukomana uchimuvaka,

kuti arege kuzokushungurudza nomugariro wake wakaipa.

Utano

14Zviri nani kuva murombo iwe uine utano, nomuviri

wakagwinya, pano kuva mupfumi ano muviri unorwadza.

15Utano nomuviri wakasimba zvinokunda ndarama iri yose,

uye muviri wakasimba unopfuura upfumi hwose.

16Hakuna upfumi hunokunda muviri wakasimba,

hakunawo rufaro runokunda rufaro rwomwoyo.

17Zviri nani kufa pano kugara upenyu hwokutambura

zororo risingaperi riri nani pano

kuramba uchingorwara–rwara.

18Machikichori anodiraniswa pamuromo wakazarirwa,

akafanana nemikonde yesadza inoiswa paguva.

19Zvinobatsirei kupira michero

kuchifananidzo chisingakwanisi kudya kana kunhuhwidza?

Ndozvakangoita munhu apiwa undonda naMwari.

20Anongotarisa chokudya nameso, otura femo,

sezvinoitawo muyuniki anogumbatira musikana

ongotura femo.

Mafaro

21Usabva wazvinetsa nepfungwa dzinobaya mwoyo,

kana kutozvisvibisa zvako mwoyo nokuzvidya mwoyo.

22Kufaranuka mwoyo ndihwo upenyu kumunhu,

kufara kunoita kuti uve noupenyu urefu.

23Zvifaranutse, unyevenutse mwoyo wako,

dzingira kure pfungwa dzinoodza mwoyo,

nokuti kuzvidya mwoyo kwakaparadza vazhinji

uye, hazvinawo wazvinobatsira.

24Shanje nehasha zvinodimurira upenyu hwomunhu,

uye, kuzvitambudza mumwoyo kunochembedza

munhu achiri muduku.

25Munhu ano mwoyo wakafaranuka anodavirana nezvaanodya.