1Mugore regumi nechipiri roumambo hwaNebhukadhineza aitonga vaAsiria ari muguta guru reNinivhe, Arifakisadhi akanga achitongawo vaMidhi ari kuEkibhatana.
2Arifakisadhi akavakirira Ekibhatana netsvingo dzamabwe akavezwa, ibwe rimwe nerimwe riine ukobvu hunopfuura mita rimwechete nechidimbu chepakati nepakati pemita urefu richida kusvitsa mamita matatu, akarurebesa kuenda mudenga mamita makumi matatu ana mamita mashanu mana upamhi hwarwo huri mamita makumi maviri namashanu.
3Kumisuo mikuru uku, akavaka nharire dzaiita mamita makumi mashanu kureba kuenda mudenga. Paugaro hwadzo, dzaisvitsa mamita makumi matatu upamhi.
4Kureba kwemisuo mikuru yacho kukwira mudenga, kwaiita mamita makumi matatu namashanu, upamhi hwayo, mamita makumi maviri kuitira kuti hondo dzake dzigonyatsobuda dzichifamba dzakarongana, varwiwo vetsoka vawane pokunyatsoronganirana.
5Mazuva iwayo ndiwo akaita hondo mambo Nebhukadhineza namambo Arifakisadhi muzibani guru riri mudunhu reRagai.
6Vaitsigirana naNebhukadhineza ndevemarudzi ose okunyika yamakomo, navose vokuna Yufuratesi nokuna Tigirisi nokuHudhasipesi, pamwechete novokubani vaitongwa naArioku mambo wevaEramu. Nezvo marudzi akawanda akaunganidzana kuzoita chirwirangwe muhondo yavanakomana vokwaKereoudhi.
7Nebhukadhineza mambo weAsiria akatumira shoko kuvagari vose vokuPezhiya, nokuvagari vose vokunyika dzokumadokero dzinoti: Kirikia neDhamasiko nokuRebhanoni nevokuAndi–Rebhanoni rokumabvazuva nokuvanhu vose vokumahombekombe kwegungwa
8uye marudzi ose okuKarimero nokuGiriadhi neveGarirea yokumusoro nebani guru reEsidhiraeroni
9nokuSamaria namaguta akaripoteredza nevokumhiri kwaJorodhani kusvikira kuJerusaremu nokuBhetania nokuKerusi nokuKadheshi kurukova rweIjipiti nokuTapanesi neRamesesi nokudunhu rose reGosheni
10uyewo nemberiwo kweTanisi neMemupfisi nokuvagari vose vokuIjipiti kusvikira kumuganhu neItiopia.
11Asi vagari vomunyika idzi havana kuita hanya neshoko rokukokwa kwavakaitwa naNebhukadhineza mambo wavaAsiria, vakaramba kubatana naye muhondo iyi nokuti vakanga vasingamutyi vachimuona somumwe munhuwo zvake. Vakadzosera nhumwa dzake dzisina kana chinhu vadzinyadzisa.
12Nebhukadhineza akavirukira nehasha nyika dzose idzodzi akati, “Ndinopika nechigaro changu choumambo noumambo hwangu kuti ndinototi nditsividze chete nyika dzose idzodzi dzinoti: Kirikia neDhamasiko neSiria ndigouraya namapakatwa vagari venyika yeMoabhu navanhu venyika yeAmoni neJudhea nomunhu wose ari muIjipiti kusvikira kumahombekombe kwamakungwa maviri.”
13Mugore regumi nechinomwe rokutonga kwake, Nebhukadhineza akarwisa mambo Aripakisadhi akamukurira muhondo. Hondo yose yaAripasadhi nehondo yavarwi vamabhiza nevengoro dzehondo nengoro dzake dzehondo vakaita bararamhanya kutiza.
14Akatora maguta aAripakisadhi kuaita ake. Akaenda kuEbhatana akakurira nharire dzaro, akapamba misika yaro, akabvisa runako rwaro akarifumura nenyadzi.
15Akabata Aripakisadhi mumakomo okuRagai. Akamubaya namapfumo okuvhimisa, akamuparadza zvokumutsakatisa kusvikira pari nhasi.
16Akazodzokera kuNinivhe, iye nehondo yake yose. Raiva riri gurusvusvu chairo rehondo nehondo. Ikoko, iye; nehondo yake vakazorora. Vakaita zana ramazuva rina mazuva makumi maviri vari mumabiko okudyiririra.
Who We AreWhat We EelieveWhat We Do
2025 by iamachristian.org,Inc All rights reserved.
