Sira 6 - Shona Common Language Catholic Bible（SCLBD）

1Nokuti zita rakaipa rinonyadzisa nokushoresa,

ndozvine mutadzi anoita huyakose.

2Rega kutungamirirwa namapangiro omuviri wako

nokuti zvingadaro zvikakubvarura–bvarura sehandira,

3zvichadya mashizha ako, zvodya michero yako,

uchisara wangova muti wakaoma.

4Mwoyo wakaipa unoparadza muridzi wawo,

uchimuita kuti ave chiseko chavavengi vake.

Ushamwari hwezvirokwazvo

5Kunatsa mukanwa pakutaura kunoita kuti

munhu ave neshamwari dzakawanda

munhu ane kuremekedza pakutaura

unowana vazhinji vaanofarirana navo.

6Iva munhu anonzwanana navakawanda

asi wokukupa mazano ngaave

mumwechete pachuru chavanhu.

7Kana uchida kuita ushamwari nomunhu,

tanga wamuedza,

usachimbidzike kutendeseka naye.

8Chiripo ndechokuti,

imwe ishamwari yamazuva anonakira iyo,

asi nezuva renhamo haamire newe.

9Imwe shamwari inosanduka kuva muvengi,

inokunyadzisa nokuparidzira vamwe

kukakavadzana kwamakaita.

10Imwe shamwari ishamwari pakudya chete,

asi nezuva renhamo haimiri newe

11kana zvinhu zvichakanaka,

anenge iyewe pachako,

achinekaidzawo varanda vako.

12Asi kana zvazokuipira anokupindukira,

asisadi kana kuonana newe.

13Gara kure navavengi vako

shamwari dzako udzichenjerere.

14Shamwari yakatendeseka idiziro kwaro;

anowana shamwari yakadaro awana upfumi.

15Hakuna chakakosha seshamwari yakatendeka;

kukosha kwayo hakuna chikero chingakuere.

16Shamwari yakatendeka mushonga woupenyu,

inowanikwa naanotya Mwari.

17Anotya Tenzi anotsvaga ushamwari hwakanaka

nokuti zvakaita munhu

ndozvakangoitawo shamwari dzake.

Kadzidzisiro kwoungwaru

18Mwanangu, kubvira pauduku hwako

sarudza kudzidza,

ugozoramba uchingowana ungwaru

kusvikira wachena musoro.

19Uya kuungwaru sezvinoita munhu

anorima nokudyara,

ugomirira goho rahwo

nokuti mukuukurisa

uchabata basa kwekanguva kakati kuti

wozobva wodya michero yahwo.

20Kuna vasina kuudzidza

ungwaru hunoita somudzidzisi wakaomarara.

Munhu akaneta–neta haangagari nahwo,

21huchange mutoro wezidombo rinomuremera,

haatani kuukanda pasi.

22Zita rakapiwa ungwaru

rakafanana naihwo ungwaru

hariwanikwi nevazhinji.

23Teerera, mwanangu,

unzwe zvandinofunga;

usarambe zano rangu.

24Isa tsoka dzako muzvikachiro zvahwo,

uisewo mutsipa wako mujoko rahwo.

25Rerekera mafudzi ako pasi pahwo uutakure;

usanetseke nengatani dzahwo.

26Nanga kwauri nomwoyo wako wose,

tevera nesimba rako rose

nzira dzinokusvitsa kwauri.

27Bvunza kwauri uutsvage,

ihwo huchazvionesa kwauri.

Kana waubata usahuregedze huchienda

28nokuti pakupedzisira uchawana zororo mauri,

huchipinduka hwova rufaro kwauri.

29Zvaikukachikira zvichakudzivirira nesimba;

zvahwakakushongedza zvichava gemenzi rinopenya.

30Joko rahwo richava chishongo chendarama,

ngetani dzahwo dzichava maribhoni oruvara rwehute.

31Uchapfeka ungwaru sechipfeko chamandiriri,

ugoudzika mumusoro sengundu yokufara.

32Mwanangu, kana uchida, unogona kudzidziswa.

Kana ukazvipira kudzidza sokugona kwako,

unova munhu anoungwaru.

33Kana uchida kuteerera uchava noruzivo,

ukarerekera nzeve yako unova mungwaru.

34Ivawo padare ravakuru,

waunenge waona kuti ndiye akangwara,

ramba wangova naye.

35Iva nemwoyo wokuda kunzwa zvose zvinotaurwa

urege kunzvengwa netsumo dzoungwaru.

36Kana waona munhu ano ungwaru,

fumirira kwazvo kumushanyira,

gumbo rako ngaripedze

chikumbaridzo chomusuo wake.

37Fungisisa nezvemirao yaMwari,

urangarire nezvemitemo yake nguva dzose

ndiye achavhenekera pfungwa dzako,

uye ungwaru hwacho hwaunoda uchaupiwa.