Ungwaru 7 - Shona Common Language Catholic Bible（SCLBD）

Soromoni munhuwo savamwe

1Neniwo ndiri munhu anofa

savamwe vanhu vose,

chizvarwa chomunhu akatanga kuumbwa nevhu.

Ndakaumbwa nenyama munhumbu yaamai vangu

2mandaiva chinhu chaiumbwa neropa ravo,

kwemwedzi gumi,

chakabva mumbeu yomurume parufaro rwavakaroorana.

3Pandakaponwa ndakafema mweya

unofemwa navamwe vose,

ndakarariswa pasi, panongorarawo vanhu vose;

izwi rangu rokutanga kwaiva kuchema

zvinongoita vanhu vose.

4Ndairerwa zvakanaka ndichiputirwa namachira

5nokuti hakuna mambo ano mumwe muzvarirwo

wakasiyana nowavamwe vanhu,

6nokuti mapindiro omunhu wose muupenyu mamwechetewo,

nekaendero kavo kamwecheteko.

Soromoni anoyemura ungwaru

7Ndiko kusaka ndakanamata

ndikapiwa runzwisiso

ndakateterera kuna Mwari,

mweya woungwaru ukauya kwandiri.

8Ndakauda kupinda umambo tsvimbo youmambo

kana chigaro choumambo;

pano ungwaru upfumi ndakauona sechinhu pasina.

9Handina kumbohuenzanisa

kana nebwe rakakosha sei;

nokuti ndarama kuienzanisa noungwaru,

inongova twujecha zvatwo,

pano ungwaru sirivha munyakwe zvawo.

10Ndakauda kupinda utano norunako.

Ndakati zviri nani kuva noungwaru

pano kuva nechiedza

nokuti kupenya kwahwo hakudzimi.

11Kuuya kwahwakaita kwandiri, zvinhu zvosewo

zvakanaka zvakabva zvauya pamwe nahwo.

Mumaoko ahwo makanga muino upfumi husingaverengeki.

12Zvose ndakazvifarira

nokuti zvinotungamirirwa noungwaru,

asi handina kunge ndichiziva

kuti ungwaru ndiwo amai vawo.

13Ndinoudziidza nemwoyo wose

ndichiugoverana navamwe

ndisingatsutsumwi,

upfumi wahwo handiuvanziri vamwe.

14Ungwaru upfumi husingaperi kuvanhu.

Avo vanouwana vanowana ushamwari naMwari,

zvinoita kuti vafadze Mwari pamusana pemichero

inobva muzvidzidziso zvahwo.

Soromoni anokumbira kuti agoneswe kutaura

15Mwari ngaandipe kuti

ndigone kutaura zviri pamurawu

ndichiburitsa pfungwa

dzinokodzerana nezvandakawana,

nokuti iye ndiye mutungamiriri woungwaru,

nomudzidzisi wavangwaru.

16Isusu namazwi edu tiri mumaoko ake,

ndozvine runzwisiso rwedu rwose,

noumhizha hwedu hwose.

17Nokuti iye ndiye akandipa

ruzivo chairwo rwezvinhu zviripo,

akandiita kuti ndizive muvakirwo wapasi pose,

nomufambiro wezvinhu zvacho zvinopavaka

18nokuvamba kwenguva nokuguma kwayo,

uye nenguva yapakati nokusiyana kwamazuva,

nokutevedzana kwemwaka yegore,

19kusiyana kwegore negore,

uye nenzvimbo dzenyenyedzi,

20namaitiro emhuka namaitiro ezvikara,

nesimba remweya namafungiro avanhu,

nemhando dzezvinomera, namasimba emidzi.

21Ndakadzidza zvose zvakavandika

nezvinozivikanwa, nezviri pachena–chena,

nokuti ihwo hungwaru hunoita izvi

ndihwo hwakandidzidzisa.

Mamiriro akaita ungwaru

22Ndinodaro nokuti muungwaru

mune mweya worunzwisiso unoera;

unongova woga wakadaro,

unoita zvakawanda,

usingabatiki, unofamba

nyore nyore, une njere dzakapinza,

usina chakan'ora uri usingashamiswe

nechimwe chinhu,

usingakuvadziki, mudi wezvakanaka,

unodisisa kuita zvinhu,

23usingarambidziki unoitira vanhu zvakanaka,

unobata vanhu savanhu,

wakatsiga, une chokwadi nezvaunoita,

usingazvidyi mwoyo,

samasimba, mutariri wazvose,

unopinda mumweya yose

ine pfungwa, yakanakisisa, isingabatiki.

24Chikonzero chacho ndechokuti:

ungwaru hunofamba nyore

kupinda kufamba kupi nokupi zvako

pamusana pokuti ungwaru hwakanakisisa

hunogona kupinda

nokupfekenyedza muzvinhu zvose.

25Chimwezve ndechokuti,

ungwaru ifemo resimba raMwari

ndicho chimwe chinobuda mumbiri yaSamasimba

ndokusaka chinhu chose chakan'ora

hachipindi mauri.

26Ungwaru mumvuri wechiedza chisingaperi;

ndihwo chiringiriro chisina

kana kavara chokushanda kwaMwari

uye mufananidzo wokunaka kwaakaita.

27Kunyange zvahwo ndihwo hwoga

hunogona kuita zvose,

ihwo pachahwo hausanduki

asi hunovandudza zvinhu zvose.

Pachizvarwa choga choga

hunopinda mumweya yavakarurama

huchivaita shamwari dzaMwari,

uye vaporofita

28nokuti Mwari hapana chaanoda,

somunhu anogara upenyu huno ungwaru.

29Chimwezve ndechokuti

ungwaru hwakanaka kupfuura zuva.

Hunopfuurawo gurusvusvu renyenyedzi.

Hukaenzaniswa nechiedza,

chiedza chinosara pasi,

30nokuti chinozoteverwa nerima,

asi ungwaru haukundwi nezvakaipa.