1-2Mugore rechipiri rokutonga kwaAhasuerusi mambo mutekwatekwa, pamusi wechiposhi wemwedzi waNisani, Modhekai mwanakomana waJairi mwanakomana waShimei mwanakomana waKishi wedzinza rokwaBhenjamini akarota hope.
3Akanga ari muJudha achigara muguta reSusa ari mukuru mukuru achishanda munhandare yokwamambo.
4Aiva mumwe wenhapwa pamwechete naJekoniya mambo weJudhia akatapwa kuJerusaremu naNebhukadhineza mambo weBhabhironi.
Akarota hope idzi:
5Akarota heyo mheremhere nenyonganyonga namabhanan'ana nokundengendeka kwenyika nebongozozo panyika.
6Ndopakati tutururu vhu mazigaranyanya maviri, ose akateya zvokurwa achidzvova zvinotyisa kwazvo.
7Paakangodzvova, marudzi ose avanhu chakava chipatapata kugadzirira kurwisa rudzi rwavakarurama.
8Onei pasi pano pose, rangova zuva rezarima, pose pachiti kwirindindi kusviba, hero zuva renhamo namatambudziko nepfumvu nebongozozo chairo!
9Ipapo rudzi rwose rwavarurami rwakadzudzikana mumwoyo, votya tsekwende dzakanga dzatarisana navo vongoti pavo pavaperera.
10Ndokubva vachema kuna Mwari, mukuchema kwavo ikoko, kubva mune kainge kachisipiti kadikidiki, makabuda rwizi rukuru rwaiva namafashamo emvura.
11Kwakabva kwati chiedza ngwe–e, zuva ndiye vhu–u kubuda ndokubva vapasipasi, vanhuwo zvavo vasumudzirwa pamusoro vakabva vatsakatisa vainzi ndovanoremekedzwa ivavo.
12Muchiroto ichochi, Modhekai akaona kuti zvaida kuitwa naMwari ndezvipi. Paakapepuka akanga achinazvo mumusoro akapedza muswere wose wezuva achiedza kunzwisisa twose twaakanga arota.
Who We AreWhat We EelieveWhat We Do
2025 by iamachristian.org,Inc All rights reserved.
