1Rega kubva waisa mwoyo paupfumi
kana kuzviti ndine zvakakwana ini.
2Usatevedze zvomusoro wako
kana kufuririka nesimba rako
uchitevedza zvako zvinodiwa nomwoyo wako.
3Rega kuti, “Handina anonditonga,”
nokuti Mwari anototi akurange chete.
4Usati, “Zvandakatadzira Mwari ndakagoitwei
nokuti Mwari ane mwoyo murefu?”
5Rega kubva wava nechokwadi
chokuzowadzana naMwari zvokuti
unovirika zvitadzo pamusoro pezvimwe.
6Usati, “Tsitsi dzake dzakawanda
achandiregererawo zvitadzo zvangu,
nomuwandiro wazvo iwoyo,”
nokuti tsitsi nehasha zvose anazvo,
asi hasha dzake dzinowira vatadzi.
7Usanonoke kupindukira kuna Mwari,
uchiita mberengera zuva nezuva,
nokuti hasha dzaMwari ndedzechibvuribvuri,
uye, nezuva rokurangwa kwako uchatsakatika.
8Usavimbe noupfumi
hwokuwana nounyengedzi
haukubatsiri nomusi wenhamo.
Kupotsa muromo pakutaura9Rega kuurutsa nemhepo yose yose
kana kungotevera nzira yose yose
huyakose yomutadzi ndiyo inodaro.
10Rambirira nezvaune chokwadi nazvo
chaunotaura chirambe chiri ichocho.
11Iva anokurumidza kunzwa,
asi upindure wafunga.
12Kana uine ruzivo nechinhu,
pindurawo mumwe wako,
asi kana usina chaunoziva, bata muromo.
13Mbiri nokushorwa
zvinobva mukutaura
chinoparadza munhu rurimi rwake.
14Rega kuti unzi munhu wamakuhwa,
kana kuhwandira vamwe norurimi rwako
nokuti mbavha mhedziso yayo kunyadziswa
ndizvowo zvino murevi wamakuhwa,
huyakose inowana chirango chinosiririsa.
15Muzvinhu zviduku kana zvikuru
nzvenga kukanganisa
usave mhandu panze pokuva shamwari.
Who We AreWhat We EelieveWhat We Do
2025 by iamachristian.org,Inc All rights reserved.
