1Mugore rezana nechimakumi matanhatu Arekizanda Epifanesi mwanakomana waAndiokusi akasvika nengarava kuguta reToremaisi akariita rake. Vakamugamuchira akatangisa kutonga imomo.
2Mambo Dhemetiriusi paakazvinzwa akaunganidza gurusvusvu ravarwi vehondo akabuda kundoita hondo naye.
3Izvozvo Dhemetiriusi akatumira Jonatani tsamba yamazwi orugare yokumupa rukudzo
4nokuti aiti ngatitangei isu kuwirirana naye asati awirirana naArekizanda kuzotirwisa.
5Ndinodaro nokuti acharangarira zvakaipa zvose zvatakaita kwaari nokuvakoma navanun'una vake nokurudzi rwake.
6Saizvozvo Dhemetiriusi akamupa simba rokupinza vanhu muusoja nokuvawanisa zvombo zvehondo uye kuti ave shamwari yake uyewo akatema chirevo chokuti vasungwa vaiva munhare yokuzvidzivirira muhondo vasunungurwe vapiwe kwaari.
7Jonatani akaenda Jerusaremu akaverenga tsamba iyoyo vanhu vose navarume vaiva munhare yokuzvidzivirira iyoyo vachizvinzwa.
8Vakabatwa nokutya zvikuru pavakamunzwa achiverenga kuti akapiwa simba namambo rokupinza vanhu muusoja.
9Varume vaiva munhare yokuzvidzivirira muhondo vakasunungurira Jonatani vasungwa, iye akavadzorera kuvabereki vavo.
10Jonatani akazogara muJerusaremu akatanga kuvakiridza nokugadziridza guta iri.
11Akaronga kuti vaiite basa irori, vavake tsvingo vakomberedze Gomo reZioni vachirivakirira namabwe ana mativi mana akaenzana kuitira kuti pave norusvingo ruri nani. Vakabva vaitawo saizvozvo.
12Vatorwa vaya vakanga vari munhare yokuzvidzivirira muhondo yakavakwa naBhakidhesi iya vakabva vatiza,
13mumwe nomumwe akabva angosiya nzvimbo yake akaenda kunyika yokwake.
14MuBhetizuru chete ndimo makasara vamwe vakanga vakanda pasi zvomutemo nomurao pamusana pokuti ndoyakanga yava kutova senzvimbo yokupotera.
15Zvino mambo Arekizanda akanzwawo zvose zvamashoko echitsidzo aDhemetiriusi aakatumira kuna Jonatani, akataurirwawo nezvehondo dzakarwiwa naJonatani navakoma navanun'una vake nougamba hwavakanga vaita nenhamo dzose dzavakatirira.
16Nokudaro akati, “Tichawana mumwe akaita souyu here? Chiuyai timuite shamwari yedu nomudyidzani nesu.”
17Saka akanyora tsamba ndokutumira kwaari iine shoko rokuti,
18“Ini mambo Arekizanda ndinokunyorera
iwe hama yangu Jonatani ndichikukwazisa.
19“Takanzwa nezvako kuti pakurwa hondo
uri mvumba chaiyo uye uri munhu
akakodzera kuva shamwari yedu.
20Naizvozvo isu takusarudza nhasi uno
kuti uve mupristi mukuru kune
verudzi rwako.
Wava kuzonzi shamwari yamambo
uye unofanira kutsigirana nesu
uchichengetedza ushamwari hwedu newe.”
(Akabva amutumira hanzu yoruvara rwohute nengundu yendarama).
21Nezvo Jonatani akapfeka magemenzi anoera mumwedzi wechinomwe wegore rechizana namakumi matanhatu paMazuva Makuru aMatumba akapinzawo vanhu usoja akavapa matutu namatutu ezvombo zvokurwisa nazvo.
Tsamba yaDhemetiriusi22Dhemetiriusi paakanzwa zvinhu izvozvi izvi zvakamushungurudza mumwoyo ndokuti,
23“Ndochii ichochi chatakaita? Arekizanda atotitangira uyu kuita ushamwari navaJudha kuti azviwanire simba.
24Ini ndichatovanyorerawo shoko rokuvakurudzira nokutsidza kuvapa rukudzo nezvipo kuti ndiwanewo rubatsiro kwavari.”
25Nokudaro akavatumira nhume neshoko rinoti,
“Ini mambo Dhemetiriusi ndinokunyorerai
imi verudzi rwavaJudha ndichikukwazisai.
26Pamusana pokuti makachengeta chibvumirano nesu
mukaramba muino ushamwari hwenyu nesu
uye mukarega kutsigirana navavengi vedu.
Takazvinzwa tikafara.
27Zvino chirambai makatendeseka kwatiri,
isu tichazokutsivai tichikuitirai
zvakanaka pamusana pezvamunotiitira.
28Tichakupai rusununguko kune zvinhu zvakawanda
nokukupaiwo zvipo.
29Saka zvino ndinokusunungurai, ndinotema kuti
vaJudha vose zvavo havachatera mutero
nomutero womunyu nezvirehwarehwa zvengundu zvokwamambo
30uye munzvimbo yokuunganidza chikamu chechitatu
chembesanwa nechikamu chemichero yemiti yemichero
zvandaifanira kugamuchira, ndinoti
hapasisina zvakadaro kubvira nhasi uno
zvichienda mberi.
Handichazvitora munyika yaJudha kana
mumatunhu matatu anobatanidzwa
pamwechete nayo kubvira kuSamaria
kudzamara kuGarirea kubvira nhasi uno narini wose.
31Jerusaremu nenharaunda dzaro, zvechegumi
zvaro nemari yaro inowanikwa mumitero
ngazviereswe zvirege kutererwa mitero.
32Ndinotiwo nhare yokuzvidzivirira nayo muhondo
yomuJerusaremu, haisisiri mumaoko mangu.
Ndinoikumikidza kumupristi mukuru kuti
iye agoisa mairi varume vaanoda vokuichengetedza.
33Uye munhu wose wechiJudha anenge ari
nhapwa akambotapwa kunyika yokwaJudha
akaendwa naye chero kupi zvako
munyika yandinotonga ndatomusunungura pasina muripo.
Machinda ose ngaataurirewo vanhu kuti
hapasisina mutero wezvipfuwo zvavo.
34Ose mazuvawo makuru namaSabata nokugara
kwayo mwedzi namazuva akatemwa uye
namazuva matatu zuva guru risati rasvika
uyewo mazuva matatu anotevera mushure
mozuva guru, ndinoti mazuva iwayo ose
ngaave mazuva evose zvavo vechiJudha okuti
vave vanhu vakasununguka vari pakufurwa
zvavo nemhepo munyika yandinotonga.
35Hapana achange aine mvumo yokuvatorera
kana kai zvako kunyange kugumbura
ani naani zvake wavo nezvenyaya ipi neipi zvayo.
36“Makumi matatu ezviuru zvavarume vechiJudha,
ngavanyorwewo vapinzwe muhondo yokwamambo.
Zvose zvinopiwa varwi vose vehondo yokwamambo,
ngazvipiwewo ivo.
37Vamwe vavo ngavaiswe munhare huru
dzokuzvidzivirira nadzo muhondo dzamambo uye
vamwe vavo ngavapiwewo zvinzvimbo
zvoukuru–ukuru munyika yandinotonga.
Machinda navatungamiriri vavo ngavave
vanobva mukati mavo, mumagariro avo
ngavatevedze zvavo mitemo yavo sokutemwa
kwazvaitwa namambo munyika yokwaJudha.
38“Kana zviri zvamatunhu matatu aye akabviswa
kunyika yeSamaria achibatanidzwa neJudhia,
ngaabatanidzwe neJudhia zvokuti ave nomutongi
mumwechete varege kuteerera ani naani zvake anganzi
mukuru kunze kwomupristi mukuru chete.
39Guta reToremaisi nenyika yomunharaunda yaro
ndapa sechipo kuNzvimbo Inoera muJerusaremu
kuitira kuti pawanike mari inodiwa
yokushandisa paNzvimbo Inoera.
40Ndichapawo zviuru gumi nezvishanu zvemari
yamashekeri yesirivha gore negore ichange
ichibva pamari yokwamambo inowanikwa
mumitero ichibva kunzvimbo dzinotosarudzirwa izvozvo.
41Dzimwewo mari dzisina kunge dzabhadharwa namakurukota
amambo sezvadzaimboitwa mumakore okutanga,
kubvira iye zvino zvichienda mberi ngavadziendese
kubasa reTemberi.
42Uyezve, zviuru zvishanu zvemari
yemashekeri yesirivha yanga
ichitereswa namakurukota angu pabasa
repaTemberi gore negore naiyoyiwo ngairege kunge
ichaterwa pamusana pokuti imari yavapristi vanoshandamo.
43Munhu wose anenge apotera paTemberi
iri muJerusaremu kana dzimba dzakabata neTemberi, pamusana
pokuti anenge aine chikwereti chemari kuna mambo
kana kuti rimwewo ngava zvaro,
ngaasunungurwe hake adzorerwe twake
twose munyika yandinotonga.
44“Basa rokuvakiridza nokugadziridza zvinhu
zvinovakwa muNzvimbo Inoera ngariripwe
nemari yokwamambo inowanikwa mumitero.
45Kuvakiridza tsvingo dzeJerusaremu
nokurivakirira kurikomberedza uye
nokuvakawo tsvingo dzeJudhia, ngakuripwe
nemari yokwamambo inowanikwa mumitero.”
Jonatani akasarudza kutsigira Arekizanda46Jonatani navanhu pavakanzwa mashoko ose iwaya, havana kuabvuma kana kuagamuchira nokuti vakarangarira kukanganisirwa kukuru kwakaitwa naDhemetiriusi muIsiraeri uye udzvanyiriri hwakaipisisa kwazvo hwaakanga aitira Isiraeri.
47Vakada zvavo Arekizanda pamusana pokuti ndiye akava wokutanga kutaura kwavari mazwi okuwadzana, vakaramba vari shamwari dzake mazuva ose oupenyu hwake.
48Zvino mambo Arekizanda akaunganidza hondo huru akandodzika musasa wematendhe vakatarisana naDhemetiriusi.
49Madzimambo maviri aya vakarwisana, hondo yaDhemetiriusi ndokubva yaparamuka kutiza, Arekizanda ndokutsikirirana naye kutevera ndokuvakurira.
50Arekizanda akarwisa zvakasimba kudzamara zuva radoka, Dhemetiriusi akafa musi iwoyo.
Kuremekedzwa kwakaitwa Jonatani51Arekizanda akazotumira vamiriri kuna Toremi mambo weIjipiti neshoko rokuti,
52“Kubvira kudzokera kwandakaita kunyika
yandinotonga, ndikagara pachigaro changu choumambo
hwemadzibaba angu ndikaita kuti umambo
hwangu hudzike midzi, ndinodaro nokuti
Dhemetiriusi ndakamuparadza,
ndikaita kuti nyika
yedu ive mumaoko medu,
53ndakarwisana naye muhondo
tikamuparadza iye pamwechete nehondo
yake tisu tagara zvino pachigaro chake
choumambo hwake
54naizvozvo ngatichishamwaridzanai.
Chindipaiwo mwanasikana wenyu kuti ave
mukadzi wangu ini ndive zvangu
mukuwasha wenyu.
Ini ndichakupaiwo imi naiye
zvipo zvinoenderana nezvamuri.”
55Mambo Toremi akapindura achiti,
“Tinoti makorokotoi nezuva
ramakadzokera kunyika yamadzibaba enyu
mukandogara pachigaro
choumambo chenyika yavo.
56Saka zvino ndichakuitirai sezvamanyora, asi uya
tisangane kuToremaisi kuitira kuti tionane
ini ndigova vatezvara venyu sezvamakareva.”
57Saizvozvo Toremi akapinda murwendo achibva kuIjipiti, iye nomukunda wake Kireopatira akasvika kuToremaisi mugore rezana namakumi matanhatu nerechipiri.
58Mambo Arekizanda akasangana naye, Toremi akamupa mukunda wake Kireopatira kuti ave mukadzi wake. Akapemberera muchato womukunda wake kuToremaisi zviya zvine mukurumbira sezvinongoitawo madzimambo.
59Mambo Arekizanda akanyorera Jonatani kuti auye kuzosangana naye.
60Saizvozvo Jonatani akaenda kuToremaisi zvine mbiri akandosangana namadzimambo maviri aya. Akapa ivo neshamwari dzavo sirivha nendarama nezvipo zvakawanda vakamufarira.
61Chimwe chikwata chemhandupandu dzavanhu chokuIsiraeri chavarume vasina mutemo chakamuunganira chichimupomera mhosva. Asi mambo haana kumbovateerera.
62Mambo akarayira kuti Jonatani abviswe hembe dzake, apfekedzwe hembe dzoruvara rwohute, vakaita saizvozvo.
63Mambo akamuita kuti agare parutivi rwake, akati kumachinda ake, “Endai naye pakati peguta mudaidzire kuti hapana munhu anobvumirwa kupomera Jonatani mhaka ipi neipi zvayo, uye ngaparege kuva nomunhu anomushatirisa pamusana pechikonzero chipi nechipi zvacho.”
64Vaya vaimupomera mhosva pavakaona rukudzo rwaaipiwa maererano nezvaidaidzirwa zviya uye vakaona apfekedzwa hanzu dzoruvara rwohute, vose vakabva vatiza.
65Saizvozvi mambo akamuremekedza akamunyora zita pakati peshamwari dzake dzapamwoyo akamuita mutungamiriri wehondo mukuru, sadunhu weruwa irworwo.
66Jonatani akazodzokera zvake Jerusaremu zvakanaka achifara.
Kukurira kwakaita Jonatani Aporoniusi67Mugore rezana namakumi matanhatu nechishanu Dhemetiriusi mwanakomana waDhemetiriusi akabva kuKireti akaenda kunyika yamadzibaba ake.
68Mambo Arekizanda paakazvinzwa, zvakamurwadza mwoyo kwazvo akabva adzokera kuAndioku.
69Zvino Dhemetiriusi uyu akagadza Aporoniusi kuti ave sadunhu weKoeresiria akaunganidza hondo huru yavarwi vakandodzika musasa wematendhe wokurwisa Jamunia. Akazotumira shoko kuna Jonatani mupristi mukuru achiti,
70“Iyewe ndiwe woga woga chete uri kudai kutimukira.
Iye zvino ndatova zvanguka chiseko chenyika ini,
munhu anoshoreka pamusana pako.
Sei uchizvipa simba rokutirwisa
munyika yamakomo?
71Zvino kana iwe uchitovimba navarwi
vako vehondo, chiburukira mugan'a
uuye tisangane timirisane tione anokundwa
nokuti ini kuno ndine simba ramaguta andinawo.
72Imbobvunzawo uzive kuti ndini ani
uye kuti ndivanani vari
kutsigirana nesu.
Vanhu vachakuudza kuti haungamirisane nesu
nokuti madzibaba ako akadzvamutswa
kaviri kese munyika mavo imomo.
73Saka zvino haungapamiri iwe navarwi
vangu vamabhiza nehondo yavarwi yakadaro
mugan'a musina kana dombo kunyange
katombo zvako kana kwokutizira.”
74Jonatani paakanzwa mashoko aAporoniusi akabva azara mwoyo neshungu. Akasarudza gumi rezviuru zvavarume akasimuka Jerusaremu oenda, mukoma wake Simoni akasangana naye kuzoita chirwirangwe naye.
75Akandodzika musasa wematendhe kumusuo kweguta reJopa, asi varume vomuguta iri vakapfiga misuo mikuru yaro nokuti Aporoniusi akanga aine chikwata chavarwi muJopa.
76Vakabva varirwisa ndokubva varwi vomuguta irori vabatwa nokutya ndokuzarura misuo mikuru yaro, Jonatani ndokuzviwanira guta reJopa rikabva rava rake.
77Aporoniusi paakazvinzwa akaunganidza zviuru zvitatu zvavarwi vamabhiza nehondo huru yavarwi, akananga kuAzotusi achiita sokunge ava kutopfuurira zvake mberi. Panguva yakareyo akapinda mugan'a sezvo aiva negurusvusvu ravarwi vamabhiza raaivimba naro.
78Jonatani akadzingirirana naye kusvikira kuAzotusi ndokubva patorwiwa hondo.
79Zvino Aporoniusi akanga asiya ahwandisa chiuru chavarwi vamabhiza kuseri kwavo.
80Jonatani akaziva kuti shure kwake uku kune vamwe vakahwandira nokuti vakanga vakomberana hondo yake vachikanda miseve kuvarwi vake kubvira mangwanani kusvikira zuva ranyatsorereka.
81Asi varwi vake vakaramba vangosimbawo sokuudzwa kwavakanga vaitwa naJonatani, Mabhiza omuvengi akabva aneta.
82Simoni ndopaakaunzawo hondo yake ndokurwisa vakanga vakarongana vaya (nokuti varwi vamabhiza vakanga vapera simba) akavakurira vakati ware kutiza.
83Varwi vamabhiza vakaita chimwanda–mwanda mubanimo vakatizira kuAzotusi vakandopinda muBhetidhagoni, temberi yechifananidzo chavo chokunamata vachipotera.
84Asi Jonatani akapisa Azotusi namaguta omunharaunda yacho akaapamba. Temberi yaDhagoni nevose vakanga vapoteramo zvakaroromesa nomoto.
85Vanhu vakaurayiwa namapakatwa nevakaita zvokupiswa nomoto vari vapenyu vose pamwechete vakasvika zviuru zvisere zvavanhu.
86Jonatani akabva ipapo akandodzika musasa wematendhe pakatarisana neAsikoroni ndokubva vanhu vomuguta vabuda kuzomuchingura vachipembera zvikuru kwazvo.
87Jonatani navaaiva navo vakadzokera kuJerusaremu vaine zvinhu zvizhinji zvavakanga vapamba.
88Mambo Arekizanda paakanzwa zvinhu izvi akabva atoremekedza Jonatani zvakanyanya kwazvo.
89Akabva atomutumirawo chikochekero chebhande chendarama chinowanzopiwa vanhu vapaukama namambo. Akamupawo guta reEkironi nenharaunda yaro yose kuti ive nhaka yake.
Who We AreWhat We EelieveWhat We Do
2025 by iamachristian.org,Inc All rights reserved.
