Sira 45 - Shona Common Language Catholic Bible（SCLBD）

Mosesi

1Mwari akabudisa muchizvarwa chaJakobho

munhu wetsitsi,

akafadza vanhu vose,

aidiwa naMwari uye navanhu,

Mosesi munhu achiri kuyeukwa

nanhasi norufaro.

2Mwari akamupa mbiri yakaenzana nayavatumwa vake

akaita kuti vavengi vake vamutye.

3Akaitawo kuti kukumbira kwaMosesi manenji amire

zvikaita kuti aremekedzwe pamberi pamadzimambo.

Akamupa mitemo yokupa vanhu vake,

akamuratidza chidimbu choupenyu hwokuvapo kwake.

4Akamuita muteketerwi wake pamusana pokutendeseka

kwake nounyoro hwake, akamusarudza pakati pavanhu vose.

5Akamubvumira kuti anzwe izwi rake pachake,

ndokumutungamirira makasviba kuti ndindoo

akamupa mitemo vakatarisana uso nouso.

Ndiwo mutemo woupenyu noruzivo

kuti adzidzise vokwaJakobho chitenderano,

ivava vokwaIsiraeri zvirongwa zvake.

Aroni

6Mwari akasimudzira Aroni mukoma waMosesi pamusoro,

munhu akarurama

wedzinza rokwaRevhi.

7Akaitirana naye chitenderano chokugara nokugara

achimupa upristi hwavahu vake.

Akamushongedza nhumbi dzakakosha, kwazvo

akamupfekedza gemenzi rembiri.

8Akamupfekedza zvinhu zvakaruramisisa,

akamupa nyembe dzoutongi.

Akamutiwo apfeke bhurukwa rerineni,

negemenzi refu nehanzu yeefodhi.

9Akamutenderedza pahanzu netwainge mapomegraniti

notudare twendarama tuzhinji

twokuti turire panhanho yoga yoga yaanoita

kuitira kuti kurira kwatwo kugochinzwika

muNzvimbo Inoera,

kurira kwatwo kugovawo chiyeuchidzo kuvanhu vokwake.

10Akamupawo gemenzi rinoera

rakanyatsorukirirwa,

neshinda yendarama, neyeruvara rwedenga,

neyoruvara rwehute,

riri basa romusoni wamachira

nenyembe youtongi, yaiva notunhu twokubvunzisa

Mwari natwo tweUrimu neTumimu.

11Yakanga yakashongedzwa neshinda dzakaminingidzwa

dzakatsvuka kuti piriviri zvakanga zvaitwa nenyanzvi.

Uye tutombo twakakosha twakatsvenenzverwa twokudhindisa.

Kamwe nekamwe katwo kakanga kakanamatidzwa pakarata

kendarama noumhizha hwebasa rezvishongo

chiri chiyeuchidzo chamadzibaba ose okwaIsiraeri

chakanyorwa namavara maererano

nokuwanda kwamadzinza avo.

12Akamuisa katsungare kendarama kaaisungira panguwani,

kakanga kakanyorwa kuti: “Nyakutsaurirwamwari.”

Zvokupfeka izvi zvakaitwa noumhizha huzere

zvairatidza zvoga kuti ibasa roumhizha

uye zvaitorawo mwoyo

zvakashongedzeka zvakanakisisa.

13Iye asati ambovapo

kwakanga kusati kwambova nezvinhu zvakanakisa kudai,

uye, hazvina kumbopfekwa nomumwe munhu wokunze kusiya

navana vake voga,

navatevedzeri vavo nokusingaperi.

14Zvibayiro zvake zvaifanira kuti zvipiswe zvokuroromeswa

kaviri pazuva nokusingaperi.

15Mosesi akamugadza upristi

akamuzora mafuta anoera.

Izvozvi zvaiva chitenderano chaMwari naye chisingaperi,

uye navose vechizvarwa chake,

kusvikira kuguma kwamatenga,

kuti ave iye mutungamiriri mune zvokuteurira Mwari

nokuitawo basa roupristi

uye kuti akomborere vanhu nezita raMwari.

16Akamusarudza pana vamwe vose vapenyu

kuti apire kuna Mwari chibairo norusenzi, nomupiro

wezvinonhuwirira sechiyeuchidzo

chokupfupira zvitadzo zvavanhu.

17Pamitemo yake

akamupa simba rokuti adzidzise mirairo,

noMutemo, kuti agochizivisa vokwaJakobho

mitemo yaMwari nokujekesera vokwaIsiraeri nomutemo wake.

18Vakanga vasiri vemba yake, vakamupandukira

vakamuitira shanje, pavaiva mugwenga.

Vaiti Dhatani naAbhiramu, navamwe vavo,

uye Kora neboka rake, vakapenga nehasha.

19Tenzi Mwari akazviona akasafadzwa nazvo,

ndokubva avavirukira nehasha akavaparadza.

Akavaitira zvinogara zvakadaro

achivaroromesa namarimi omoto wake.

20Pamusoro pembiri yaakapa Aroni, Mwari

akamupa nhaka, akatiwo anofanira kuwana

michero yakanakisa pamichero yokutanga;

naizvozvi akaita kuti awane chokudya chakawanda

kupinda zvimwe zvinhu zvose.

21Ndinodaro nokuti

vapristi vanodya zvinopirwa kuna Mwari

zvaakapa Aroni nevechizvarwa chake.

22Asi iye munyika yavaIsiraeri haapiwi

nhaka uye haana mugove

ndiye oga asina kugoverwa dunhu sezvakaita vamwe,

nokuti Tenzi Mwari ndiye mugove nenhaka yake.

Finiyasi

23Finiyasi, mwana waEreazaru, ndiye wechitatu

watinoyeuka mukurumbira wake,

pamusana peshungu dzake mukuremekedza Mwari

akaonesa mwoyo wakanaka akaramba aine ushingi

vanhu pavakapandukira Mwari paya.

Nokuita izvozvi akaripira vaIsiraeri mhosva yavo.

24Nokudaro Mwari akaita naye

chitenderano chokuwadzana,

achimuita mukuru mukuru weNzvimbo Inoera, uye mukuru

wavanhu kuti basa roupristi ukuru rive

rake nezvizvarwa zvake narini wose

25sechitenderano chakaitwa naMwari naDhavhidhi

mwanakomana waJese, wechizvarwa chokwaJudha chokuti

umambo hwavo huchave hwemagamuchidzanwa

chete huchibva kumwana huchienda kumwanawo wake.

Ndizvozvowo nenhaka yaAroni

ndeyezvizvarwa zvake.

26Dai waro Mwari akupai ungwaru mumwoyo yenyu

kuti mugotonga vanhu vake zvakarurama,

kuitira kuti kubudirira kwavo kurege kuparara

uye kuti mbiri yavo irambe iripo

kuzvizvarwa zvavo zvose.